Media-icmal 08.05.21

“Bizimyolinfo.az” saytı “Bakıda təcili yardım həkimləri tətil elan etdi: Problem çox kəskin və məşəqqətlidir” sərlövhəli məqalədə təcili yardım stansiyalarının bəzilərində tətil edilməsinin səbəblərini dəyərləndirir.

Mayın 7-də Bakı şəhəri Təcili və Təxirəsalınmaz Tibbi Yardım Stansiyasının 7, 8 və 9 saylı köməkçi yardım stansiyasının işçiləri tətil elan edərək işi dayandırıblar.

Tibb işçiləri öz həyatlarını, ailə üzvlərini təhlükə qarşısında qoyaraqalın təri ilə qazandıqları qanuni əmək haqlarını ala bilmədikləri üçün çağırışlara getməkdən imtina etməyə məcbur olduqlarını bildirirlər. Onlar virusdan qorunmaq üçün lazımi mühafizə vasitələri ilə vaxtında təmin olunmadıqlarına görə ailə üzvlərini də yoluxdurduqlarından  şikayətlənirlər: “Dəfələrlə rəhbərliyə müraciət etsək də məsələ həllini tapmayıb. Məcbur qalaraq səsimizi eşitdirə bilmək üçün kütləvi formada işi dayandırmaq qərarına gəlmişik”, deyə tibbi personal bəyan edir.

Tibb işçiləri deyirlər ki, COVİD-19 pandemiyasına qarşı mübarizədə onların əməkhaqlarına aylıq vəzifə maaşlarının 4 misli qədər müddətli ödəniş əlavə olunması qərarı verilib. 

Məsələni şərh edən deputatlar isə deyirlər ki, əgər həkimlər bu addımı atıblarsa, demək, problem kəskin və məşəqqətlidir, elə buna görə də məsələ 3tezliklə həllini tapmalı və ödəniş icra edilməlidir. 

“Sfera.az” saytında isə ““Dini etiqad azadlığı haqqında” qanun dəyişdi, fikirlər haçalandı – razılar və narazılar” sərlövhəli məqalədə haqqında bəhs edilən qanuna dəyişikliklər şərh edilir.

Bu günlərdə Milli Məclisdə “Dini etiqad azadlığı haqqında” qanuna edilən dəyişikliklərə əsasən, uşaqların dini etiqada məcbur olunması qadağan edilir. Amma bu dəyişikliklərə baxışlar birmənalı deyil, fikirlərdə haçalanma var.

Belə ki, qanunun tələblərinin sərtləşdirilməsini, eləcə də yumşaldılmasını dəstəkləyənlər var. Qanuna əsasən, uşağı dini radikalizmə yönəltməyə icazə verilmir, uşaq hansı istiqamətə meyllidirsə, həmin istiqamətdə də inkişaf etməlidir, həm də yeni tələblər ortaya çıxarsa müddəalarına baxıla bilər.

İlahiyyatçılara görə isə, müzakirəyə çıxarılmadan, ictimaiyyətin fikirləri öyrənilmədən qəbul edilən qanunda kimin öz istəyi ilə, kimin zorla etiqad etməsini, uşağın zorla etiqada gətirilməsi, valideynlərə qarşı hansı tədbirlərin görülüməsi suallarını hansı qurumların cavablandıracağı açıq qalır.     

“Yenisabah.az” saytı isə “İti qovduq, qaldı yiyəsi” sərlövhəli məqalədə Rusiya xarici işlər naziri Lavrovun mayın 6-da Ermənistanda keçirdiyi mətbuat konfansında vurğuladığı “Ermənistan razılıq verməsə, Zəngəzur dəhlizi açıla bilməz” ifadəsini izah edir.

Müəllifə görə, Lavrovun dediyini erməni tərəf özü deməyə cürət etmir, Azərbaycanla Rusiya nazirinin dili ilə danışır.

Onun fikrincə, “Zəngəzur dəhlizi” təkcə Zəngilandan Gorusa yol çəkmək, deyil, Mehridən keçərək Naxçıvana çatmaq deməkdir.

Müəllifə görə, Lavrov deməli idi ki, 2020-ci il 10 noyabr üçtərəfli bəyanatını imzalayan Ermənistan kommunikasiyaların açılması ilə bağlı öhdəlik götürüb, indi də zəhmət çəkib bəyanatın şərtlərini yerinə yetirməlidir.

Müəllif xatırladır ki, Ermənistanın Zəngəzur dəhlizini açmaqdan imtina etməsi 10 noyabr bəyanatının müddəalarının qüvvədən düşməsi deməkdir və sənəd qüvvədən düşərsə, Rusiya sülhməramlılarına veriləsi bir sual qalır: “Sizin burada nə işiniz var?”.

“Mətbuat.az” saytında isə “Bakının ictimai nəqliyyat dərdi: Sıxlığa qarşı niyə seyrək tədbirlər görülür?” sərlövhəli məqalədə ictimai nəqliyyatda sıxlığın hələ də aradan qaldırılmamasının səbəbləri araşdırılır.

Müəllifə görə, koronavirus infeksiyasının qarşısını almaq üçün tədbirlər görülsə də, ictimai nəqliyyatda sıxlığı aradan qaldırmaq hələ də mümkün olmayıb.

Müəllif deyir ki, ayrı-ayrı istiqamətlərdə sərnişindaşıma xidmətini yerinə yetirən xətt avtobuslarının işində də nöqsanlar var. 

Bakı Nəqliyyat Agentliyi bildirir ki, ölkənin avtobus parkının yenilənməsinə başlanılıb, yeni, iritutumlu avtobuslar gətirilir, onlar ayrı-ayrı xətlər üzrə fəaliyyət göstərəcək.

Ekspert Eldəniz Cəfərli isə deyir ki, paytaxtda nəqliyyat sıxlığı yaşanmasının əsas səbəblərindən biri metropolitenin hələ də fəaliyyət göstərməməsidir. Daha bir səbəb isə müxtəlif istiqamətlərdə avtobus çatışmazlığıdır. Ekspertin fikrincə, bir səbəb də intervalların nəzərə alınmaması, dispetçerlərin keyfiyyətsiz xidmət göstərməsidir. Daha bir səbəb isə uzun illər Bakıda nizamsız tikinti işlərinin yol strukturunu sıradan çıxarmasıdır.

Cəfərliyə görə, paytaxtın nəqliyyat infrastrukturunun qurulmasında özəl şirkətlərin cəlb olunması, Nəqliyyat, Rabitə və Yüksək Texnologiyalar Nazirliyinin özəl daşıma şirkətlərini bu prosesə cəlb etməsi vəziyyətə müsbət təsir göstərərdi.