Media-icmal 08.09.20

Pandemiyada ilə mübarizədəki uğurlar, paytaxt binalarının qızdırıcılıq problemləri, taksi fəaliyyətində BNA-nın yanaşmasına baxış və.s. məsələlər medianın aparıcı mövzuları sırasındadır. 

"Azərbaycan" qəzeti  "Azərbaycan pandemiya dövründə ortaya yaxşı nümunələr qoyur" sərlövhəli məqalədə  pandemiyaya qarşı mübarizədə ölkənin qazandığı uğurları dəyərləndirir.

Müəllif son zamanlar pandemiya ilə bağlı sərt karantin rejimində yumşaltmalara gedilməsini Azərbaycanda həyatın normal məcraya yönəlməsi kimi dəyərləndirir.

Müəllif əlavə edir ki, yoluxma sayında müsbət dinamika əldə edilib, bir çox sərt karantin qaydaları aradan qaldırılıb, bir sıra xidmət və istehsal sahələrinin fəaliyyətinə icazə verilib.

Məqalə müəllifi vurğulayır ki, təhsil müəssisələri də mərhələli şəkildə açılır, sentyabrın 15-dən Bakı şəhəri üzrə fəaliyyət göstərən dövlət və özəl uşaq bağçalarının da açılmasına icazə verilib.

Müəllif deyir ki, sanitar-epidemioloji vəziyyətə uyğun olaraq sentyabrın 8-dən Bakı, Sumqayıt şəhərləri və Abşeron rayonuna gediş-gəlişlə əlaqədar tətbiq olunmuş məhdudiyyətlər aradan qaldırılır (şəhərlərarası və rayonlararası sərnişindaşıma istisna olmaqla).

İctimai iaşə müəssisələrində müştəri qəbulu qüvvədə olan normadan iki dəfə az olmaqla qəbul olunmalı, iki metrlik sosial məsafə gözlənilməlidir.

Müəllifə görə, yumşalma tədbirlərinin davamlılığı vətəndaş məsuliyyətindən asılıdır və kiçik bir diqqətsizlik yenidən məhdudiyyətlərin tətbiqinə rəvac verə bilər.

Müəllif həm də xəbərdarlıq edir ki, gigiyenik tələblərə riayət edilməzsə, yumşalma tədbirləri yenidən məhdudiyyətlərlə əvəzlənə bilər.

"Metbuat.az" saytı "Qazanxana problemi: Kombi sistemləri təhlükəlidirmi? – açıqlama" sərlövhəli məqalədə paytaxt Bakıda binaların qızdırıcı sisteminin vəziyyətindən bəhs edir.

Ekspert Elman Fərzəliyev deyir ki, paytaxtda hələ də illərdir istilik üzünə həsrət qalan yaşayış binaları var, mərkəzi istilik sistemi olan binaların qazanxanalarının əksəriyyətinin isə istismar müddəti başa çatıb.

Ekspert əlavə edir ki, əsas problem həmin qazanxanaların əksəriyyətinin istismar müddətini başa vurmasıdır. E.Fərzəliyevə görə, daha bir problem binalardakı mənzil sahiblərinin çoxunun ümumi qızdırcı xətləri kəsərək mənzillərdən ləğv etməsidir.

Binalardakı mənzilləri qızdırmaq üçün qazanxana tikilməsi lazım gələndə qazanxanaya veriləcək qazı və suyu ikiqat kommersiya qiymətinə satırlar, bu isə baha olduğu üçün iqtisadi maraq doğurmur. Kombi sisteminə gəlincə, ekspert hesab edir ki, bu qızdırıcı növü ekoloji baxımdan təhlükəlidir.

Ekspert vurğulayır ki, çıxış yolu binaların istixanalarına verilən qaz və suyun qiyməti kommersiya qiymətləri ilə iki qat qiymətə yox, elə adi vətəndaşlara satılan qiymətə verilərsə, tikinti şirkətləri də həmin istixanaları qurmaqda maraqlı olarlar.

"Moderator.az" saytı isə  "Sanki kimlərsə ölkədə vətəndaş-hakimiyyət qarşıdurması yaratmaq üçün fəaliyyətə keçiblər" sərlövhəli məqalədə ölkədə sosial gərginlik yaşanması barədə iqtisadçı Fikrət Yusifovun düşüncələrinə yer verib.

İqtisadçı iddia edir ki, koronavirus pandemiyasının yaratdığı iqtisadi çətinliklər fonunda ölkədə sosial gərginliyin artdığı açıq görünür.

Müəllif davam edərək deyir ki, insanların iş yerlərini itirməsi, biznes fəaliyyəti ilə məşğul olanların əksəriyyətinin ağır maliyyə durumuna düşmələri gərginliyi bir az da artırır: "Belə bir durumda ailəsini dolandırmaq üçün xırda ticarətlə və ya taksi xidməti ilə məşğul olan on minlərlə insanın cüzi qazanc əldə etdikləri qapıları bağlamaq nə qədər doğrudur?", deyə iqtisadçı sual ünvanlayır. 

F.Yusifov əlavə edir ki, söhbət bu günlərdə hökumətin gömrük sərhədlərindən keçərkən xaricdən ölkəyə gələn vətəndaşların özləri ilə gətirdikləri 1500 ABŞ dolları ekivalentində malların məbləğinin 800 dollara endirilməsi, onları müşayət edən ailə üzvlərinin hər birinə 500 dollar məbləğində mal gətirilməsı fürsətinin aradan qaldırılması, beynəlxalq poçt daşımaları vasitəsilə vətəndaşların xarici bazarlardan sifarişlə gətirdikləri malın dəyərinin 1000 ABŞ dollarından 300 dollara qədər azaldılması ilə bağlı müvafiq qanunvericilik aktında Nazirlər Kabinetinin etdiyi dəyişiklikdən gedir. 

İqtisadçı taksi xidmətində vahid tariflərin tətbiqi ilə bağlı Bakı Nəqliyyat Agentliyi NK-nə təklifinin də cəmiyyətdə qalmaqala səbəb olduğunu bildirir və insanların hakimiyyətdən narazı qalmasına əsas verdiyini bidirir.

"Real olaraq bu qərar monopolistlərin maraqlarına xidmət edəcək və ölkədə qiymətlərin artmasına gətirib çıxaracaqdır. Bax, bu, aşkardır", deyə ekspert bildirir.

Müəllif deyir ki, indiki Pandemiya şəraitində inzibati yollarla taksi xidməti ilə məşğul olan on minlərlə insanın qazanc qapılarına qıfıl vurub, onlarda hökumətə qarşı qıcıq yaratmaq lazım deyil.