Media-icmal 08.10.20

"Azərbaycan" qəzeti  "Azərbaycançılıq ideyası Qarabağ qələbəsinin zəminidir" sərlövhəli məqalədə işğalda olan Azərbaycan torpaqlarının azad edilməsi uğrunda sentyabrın 27-dən başlanmış hərbi əməliyyatların mahiyyətini dəyərləndirir.

Müəllif deyir ki, Azərbaycanın ərazi bütövlüyünün təmin edilməsi üçün indiki mərhələdə azərbaycançılıq qədər ciddi, məqsədyönlü təsir vasitəsi yoxdur və azərbaycançılıq ideoloji dayaqdır.

Müəllifə görə, bu ideyanın əsasında duran leytmotiv xətt vətəni, dövləti hər cəhətdən qüdrətləndirməkdən, onun ərazilərinin toxunulmazlığına və bölünməzliyinə təminat yaratmaqdan ibarətdir: "Azərbaycançılıq azad vətəndaş cəmiyyətinin inkişafına, dövlət quruluşunun güclənməsinə fövqəladə stimul yaradır. O, milli və bəşəri niyyətləri vəhdət halına gətirir. Avropaya inteqrasiya azərbaycançılıq konsepsiyasının aparıcı istiqamətlərindən hesab olunur", deyə müəllif bildirir.

Müəllif deyir ki, gənc nəslin könüllü surətdə Milli Ordu sıralarına yazılmaq istəyi qürurvericidir və böyük qələbəyə aparan həmrəyliyin əsasında məhz azərbaycançılıq əqidəsi dayanır və bu birlik, bu əqidə xalqı daha da sarsılmaz edir, tezliklə qazanılacaq zəfər Azərbaycan tarixinə qızıl hərflərlə yazılacaq və bu, azərbaycançılığın qələbəsi olacaq.

"Bizimyol.info" saytı Azərbaycanla Yunanıstan arasında gərginlik yaşandığını bildirir. "Azərbaycanla Yunanıstan arasında gərginlik: səfir geri çağrılıb" sərlövhəli yazıda bundan bəhs edilir.

Müəllifin sözlərinə görə, Yunanıstan vətəndaşı olan muzdluların ermənilərin tərəfində döyüşmək üçün Qarabağa göndərilməsi barədə yayılan məlumatlar bu ölkənin narazılığına səbəb olub.

Rəsmi Afina Azərbaycandakı səfirini məsləhətləşmələr üçün geri çağırmaq qərarına gəlib və "Reuters" agentliyi bu barədə Yunanıstan Xarici İşlər Nazirliyindəki mənbəyə istinadən məlumat yayıb.

"Bizimyol.info" isə bildirir ki, bir neçə gün öncə Yunanıstandakı erməni diasporu Qarabağda Azərbaycana qarşı döyüşmək üçün orada ermənilərə müraciət edib: "Bu barədə Afinadakı "Ermənistan" Mədəniyyət Mərkəzinin rəhbəri Minas Ovanesyan özü məlumat yayaraq bildirib ki, üç gün ərzində 100 könüllü toplanıb.

O iddia edib ki, Qarabağda Azərbaycana qarşı döyüşmək üçün müraciət edənlər əsasən erməni əsilli Yunanıstan vətəndaşları olsa da, aralarında yunanlar da var", deyə müəllif bildirir.

Müəllif vurğulayır ki, bundan əvvəl isə yunan bloger, aktivist və "Greek City Times" nəşrinin müəllifi Paul Antonopoulos muzdlu Yunanıstan vətəndaşlarının işğal altında olan Azərbaycan ərazilərinə göndərilməsi barədə məlumat yaymışdı. "Yunanıstandan Qarabağa gedən könüllülər: birinci qrupda Yunanıstandan 50 etnik erməni və 30 yunan olacaq", deyə Paul Antonopoulos "Twitter"də yazmışdı.

Yunanıstan XİN isə bu ölkənin ərazisində muzdlu döyüşçülərin yaşaması və Qarabağa göndərilməsi barədə iddiaların əsassız olduğunu iddia edir.

Müəllif deyir ki, "Yunanıstan Xarici İşlər Nazirliyi səfirini geri çağırmaqla yanaşı, Bakıya rəsmi qaydada etiraz notası da göndərib",deyə "Reuters"in məlumatında bildirilir.

Azərbaycan Xarici İşlər Nazirliyi hələlik bu məlumata münasibət bildirməyib.

"Müsavat.com" saytında dərc edilən "Ermənistan prezidenti İrana yalvarır: Azərbaycanı dayandırın" sərlövhəli məqalədə erməni tərəfin Azərbaycanı dayandırmaq üçün diplomatik yollar axtarmasını ön plana çıxarır.

Müəllif deyir ki, döyüş meydanında mövqelərini sürətlə itirən Ermənistan hər vəchlə İranı münaqişəyə cəlb etməyə çalışır.

Onun sözlərinə görə, Bu məqsədinə çatmayan düşmən ölkənin prezidenti Armen Sarkisyan İrandan nə gözlədiklərini açıq dillə ifadə edib.

Müəllif deyir ki, Rusiya jurnalistlərinin suallarını cavablandıran A.Sarkisyan İranın hərbi əməliyyatları dayandırmaq üçün Azərbaycana təsir edə biləcəyini deyib.

"İran Azərbaycana olan təsir imkanlarından atəşin dayandırılması üçün istifadə edə bilər. Mən istərdim ki, İran özünün bütün kanallarından – siyasi, etnik və digər – müharibəni dayandırmaq üçün istifadə etsin. Aydındır ki, öz sərhədlərində hərbi əməliyyatlar İran üçün xoş deyil. Çoxlu sayda terrorçunun, döyüşçünün olması kimə xoş gələr ki…".

Erməni təbliğat maşını bir həftəyə yaxındır aktiv şəkildə İranı Azərbaycana qarşı addımlar atmağa təhrik edən materiallar yayır. Açıq görünür ki, Rusiyadan, Avropadan gözlədiyi dəstəyi ala bilməyən ermənilər son çarə kimi İrana üz tutublar.

"Redaktor.az" saytı "Qarabağ müharibəsi: Regionda hər şey dəyişir - Azərbaycanın gücü" sərlövhəli məqalədə Azərbaycanın

Qarabağ torpaqlarını işğaldan azad etməsi fonunda bölgədəki mümkün dəyişiklikləri Milli Məclisin İqtisadi siyasət, sənaye və sahibkarlıq komitəsinin sədri, deputat Tahir Mirkişili ilə dəyərləndirir.

"İşğal altında olan torpaqların azad olunması bölgədə sülhün bərqərar olması deməkdir.  Bu, bütövlükdə Azərbaycana bundan sonra xarici investisiyaların daha da artmasına imkan verəcək", deyə deputat bildirir.

Onun sözlərinə görə, işğal altında olan ərazilərin işğaldan azad olunması Azərbaycan iqtisadiyyatına müsbət təsir edəcək, regionda müharibə  riskinin  aradan qalxması bir çox investorların ölkəyə yatırım etməsinə səbəb olacaq.

"Çünki müharibə hər zaman risk deməkdir. Bir çox investorlar müharibə riski olan ərazilərdə yatırım etməkdə ehtiyat edirlər. Bölgədə riskin olmaması isə investorları əmin şəkildə yatırım etməyə təşviq edir. Bu cəhətdən baxsaq, bütövlükdə Azərbaycan üçün münaqişənin həlli bölgəmizin inkişafı üçün çox mühüm və əhəmiyyətli amildir", deyə deputat bildirir.

Deputat qeyd edir ki, işğal altında olan Dağlıq Qarabağ ərazisində qiymətli metal yataqları mövcuddur, Kəlbəcərdə və digər ərazilərdə qızıl yataqlarını misal göstərmək olar.

Həmçinin, dağ mədən sənayesini də qeyd etmək olar. Bu istiqamətdə T.Mirkişili ərazilərin geri qaytarılmasının turizim sektorunun inkişafında da mühüm rol oynayacağını bildirib.

"Metbuat.az" saytı isə "Ermənistan atəşkəs təklif edib vaxt qazanmaq istəyir" sərlövhəli məqalədə Ermənistanın atəşkəs təklifinin arxasında xoş niyyət durmadığını bildirir.

''Ermənistan baş naziri Nikol Paşinyanın Qarabağla bağlı güzəşt barədə danışması atəşkəsə nail olub, vaxt qazanmaqdır", deyə politoloq Məhəmməd Əsədullazadə bu fikri qüvvətləndirir.

O hesab edir ki, danışıqlar yalnız müharibəni davam etdirməklə aparılmalıdır:

"Ermənistan birinci Qarabağ müharibəsində müharibə apararaq danışıqlara qatılırdı. Onlar qəti şəkildə atəşkəsə razı olmurdular. Həmin illərdə tərəflərin müzakirələr keçirdiyi saatlarda belə ermənilər ərazilərimizi işğal edirdilər". 

Onun sözlərinə görə, Paşinyanın hazırkı güzəşt ilə bağlı açıqlamasına Azərbaycan o halda razılaşa bilər ki, Ermənistan ordusunu Azərbaycanın işğal altında olan ərazilərindən çıxarsın, indiki situasiyada Paşinyanın güzəşt planının məqsədi yalnız atəşkəsə nail olmaqdır.

Azərbaycan işğal altında olan ərazilərini azad etməyincə, güzəşt şərtlərinə razılaşmayacaqdır: "Ermənistan ordusu ərazilərdən çıxmayınca, Paşinyanın güzəşt ilə bağlı açıqlaması manipulyasiyadan başqa bir şey deyildir".

Politoloq Elman Vəliyevə görə isə, legitimliyini qaldırımaq üçün Paşinyan ən yaxşı yol kimi Azərbaycanla müharibəni seçdi, amma axır nəticəni yanlış hesabladı.

E.Vəliyevə görə, Rusiya bu dəfə meydanda Ermənistan iqtidarını tək buraxaraq kimin nəyə qadir olduğunu sübut elətdirdi. Azərbaycan 30 ildir danışıqların nəticə vermədiyini və bu işin ancaq müharibə ilə olacağını deyərək öz əzəli torpaqlarını geri almaq siyasətinə başladı.

Müəllifə görə, Paşinyan görür ki, xalq hər an onu devirə bilər. Bunun üçün media qarşısında Azərbaycanla razılaşa biləcəyini bəyan etdi.