Media-icmal 09.02.21

"Yenisabah.az" saytında "Laçın dəhlizində sülhməramlılarla yanaşı, Azərbaycan sərhədçiləri də dayanmalıdır - sabiq nazir" sərlövhəli məqalədə müəllif Azərbaycanın icazəsi olmadan Rusiya və Ermənistan vətəndaşlarının Qarabağa səfər etmələrinin Azərbaycan üçün təhlükə olub-olmaması sualını gündəmə gətirir.

Bu sualın yaranmasına səbəb bu günlərdə Ermənistanın razılığı ilə Qarabağa getmək istəyən Fransa jurnalistlərinin əraziyə buraxılmaması olub. Belə ki, Rusiya sülhməramlılarının komandiri eməni tərəfə bildirib ki, Ermənistan və Rusiya vətəndaşları istisna olmaqla, digər ölkələrin vətəndaşları Qarabağa Azərbaycanın icazəsi ilə gedə bilərlər.

Keçmiş xarici işlər naziri Tofiq Zülfüqarov hesab edir ki, bu məsələyə çoxdan aydınlıq gətirilməli idi: "Laçında sülhməramlılarla yanaşı bizim sərhədçilər də dayanmalıdır".

Eks-nazir deyir ki, MDB ölkələri arasında vizasız rejim tətbiq edilir, amma münaqişə tərəfi olan ölkələrlə bağlı düzəliş var ki, vizasız rejim münaqişənin həllindən sonra ola bilər. Ona görə müzakirələr getməli, məsələ birdəfəlik həllini tapmalı, sərhəd nəzarətini Azərbaycan sərhədçiləri keçirməlidir. 

"Mətbuat.az" saytında "Kirayə bazarında gözlənilən bahalaşma dalğası - ekspertdən proqnoz" sərlövhəli məqalədə kirayə mənzil bazarında gözlənilən bahalaşmanın səbəbləri araşdırılır.

Müəllif deyir ki, pandemiya dövrü bütün sahələr kimi mənzil bazarına da təsir etdi, amma son günlər yanacaq və suyun bahalaşması insanlarda bu səbəblə digər sahələrdə də bahalaşma olacağı fikri yaradıb. Müəllif əlavə edir ki, hazırda əmlak sektorunda tikinti materiallarının da bahalığı mənzil bazarında qiymətlərə təsir edir.

Əmlak sahəsi üzrə ekspert Elnur Fərzəliyev deyir ki, şirkətlər bir neçə ildir ki, əvvəlki kimi tikinti həyata keçirmirlər, bu da son günlər yeni tikili binaların qiymətində bahalaşmanın göstəricilərindən biridir.

Ekspertin sözlərinə görə, yay aylarında mənzil bazarında qiyməti yüksələn həyətyanı ərazilər idi, indi isə durum bir qədər dəyişib, Bakıda tikinti aparmaq üçün torpaq sahələri yox kimidir.

Ekspertə görə, karantin yumşaldıqda, rayonda yaşayan vətəndaşların Bakıya iş yerlərinə döndükdə kirayə mənzil bazarına tələb artacaq. Ekspert əlavə edir ki, kirayə mənzil bazarında 200-250 manatlıq evlərə üstünlük verilir, Bakının mərkəzindəki yeni tikililərdə aylıq kirayə isə 1000-2000 manat arasında dəyişir.  

"Müsavat.com" saytında isə "Yarım milyardlıq "pul evi": Qoy tikilsin də, evi tikilmiş…" sərlövhəli məqalədə müəllif Mərkəzi Bank üçün tikilməsi nəzərdə tutulan yarım milyard manatlıq yeni bina mövzusunu müzakirəyə çıxarır.

Müəllif bu məsələyə cəmiyyətdə tənqidi baxış olmasına baxmayaraq, hesab edir ki, bu bina tikilməlidir, çünki  "Koroğlu" metrostansiyasından şəhərədək olan ərazidə yeni və möhtəşəm binalar tikilib: "SOCAR, Neft Fondu, Vergilər Nazirliyi, Azərsu, Çinar Plaza və digər yeni tikilmiş binaların səbəbinə Heydər Əliyev prospektinin bu hissəsi Bakının yeni vizit kartına çevrilib".

Müəllif fikrinin əsaslı olmasını təsdiqləmək üçün XIX əsrin sonları, XX əsrin əvvəllərində Bakı milyonçularının şəhərdə apardıqları tikintilərlə indikilər arasında paralel aparır. 

Müəllifə görə, əgər o zaman o milyonçular həmin binaları tikməsə idilər indi Bakıda hansı maddi mədəniyyət nümunələri ola bilərdi?

Bundan sonra isə müəllif daha bir arqrument ortaya qoyur: "Bizim marağımızda olmaldır ki, ölkənin vəsaiti oğurlanaraq, xaricə daşınmaqdansa heç olmasa göz önündə olan tikililərə xərclənsin.Tikilən bizim hamımızın şəhəridir".

"Modern.az" saytında "Məmurlar bizneslə məşğul olduqca qiymətlər də artacaq – problem" sərlövhəli məqalədə ölkədə qiymət bahalığının səbəbləri ekspertlərlə şərh edilir.

Ekspertlər hesab edirlər ki, ərzaq bazarında müşahidə olunan qiymət artımı məmur biznesinin varlığına bağlıdır.

Ekspertlərin düşüncələrinə görə, nə qədər ki, məmur bizneslə məşğul olacaq, qanunların qəbulunda, yerli bazarın dünya bazarına inteqrasiya olunmasında maneçilik edəcək, o vaxta qədər də vəziyyət olduğu kimi qalacaq.

Azərbaycanda ərzağın bahalaşmasına gəlincə, ekspertlər bunu dünya bazarndakı bahalaşma ilə əlaqələndirirlər:

Ekspertlər bahalığa daha bir səbəb kimi isə ölkədə inhisarçılığın olmasını göstərirlər.

Ekspertlər buna da diqqət çəkirlər ki, dünya bazarında hansısa malın qiyməti enəndə Azərbaycan bazarı ona reaksiya vermir. amma qiymət bahalaşmasına reaksiya verir. 

Ekspert hesab edir ki, qiymətlərin bahalaşmasının daha bir səbəbi marketlərdə olan hərc-mərclikdir.