Media-icmal 09.07.20

Bakının “20Yanvar” ərazisindəki özbaşınalıqlar, Böyükşor gölü ətrafındakı vəziyyət, Bakı sakinlərinin rayonlara gedə bilməsinin mümkünlüyü və s. məsələlər medianın aparıcı mövzularıdır.

“20 Yanvar”, yoxsa “Özbaşınalıq” meydanı”

“Azərbaycan” qəzeti “Özbaşınalıq meydanı” sərlövəhli məqalədə müəllif Bakının “20 Yanvar” deyilən ərazisində karantin qaydalarının kütləvi şəkildə pozulduğunu bildirir.

Müəllifə görə, həmin ərazi koronavirusa kütləvi yoluxma mənbələrindən biri ola bilər.

Müəllif əlavə edir ki,  söhbət təkcə ərazidəki maskasız sürücülərdən, yolun ortasında meyvə-tərəvəz, bişmiş qarğıdalı, dəmlənmiş çay  satanlardan getmir, həm də rayonlara müştəri daşıyan sürücülərin müştəri səsləməsindən gedir. 

Müəllif vurğulayır ki, belə halda koronavirus pandemiyasına qarşı mübarizədə maska taxmaq, sosial məsafə gözləmək kimi davranışlar arxa plana keçir: İndi gəl,  bu yerdə sosial məsafə gözlə, görüm, necə gözləyirsən”.

Müəllifə görə, müvafiq qurumlar bu “virus ocağı”nı söndürməlidirlər , yoxsa bura kortəbii avtovağzal, icazəsiz taksi dayanacağı və qanunsuz küçə ticarətinin “çiçəkləndiyi” ərazidir.

Müəllifə görə, “20 Yanvar” ərazisinini həm paytaxta, həm daşıdığı ada layiq olması üçün yerli və mərkəzi icra qurumları diqqətlərini bu əraziyə yönəltməlidirlər,

Əks halda 20 Yanvar yaddaşlarda təkcə azadlıq şəhidlərinin anım tarixi deyil, Bakının özbaşınalıq və antisanitariya hökm sürdüyü ərazisi kimi də qala bilər.

Xəstəlik mənbəyi  

“Oxu.az” saytında dərc olunan  “Böyükşor gölündəki vəziyyət xəstəliklərin artmasına səbəb ola bilər” sərlövhəli məqalədə müəllif son günlərdə burada yaranmış vəziyyəti ekspertlərlə dəyərləndirir.

Müəllifə görə, göldə ionun miqdarı 11 dəfədən çox artıb, bu, canlı aləmə pis təsir edə, bu rəqəmin normaya qayıtması xeyli çəkə bilər.     

Tibb elmləri doktoru, professor Adil Qeybullaya görə, ion miqdarının artması Böyükşor gölü ətrafında yaşayanlar, eləcə də Bakı əhalisi üçün ürək-damar, tənəffüs yolları, onkoloji xəstəliklərin çoxalmasına  da səbəb ola bilər.

Onun fikrincə, ekoloji təhlükəsizlik bu gün Azərbaycanda ən unudulmuş sahədir və odur ki, bu laqeyd münasibət göl ətrafındakı canlı aləmin də məhvinə səbəb ola bilər.

Ekologiya və Təbii Sərvətlər Nazirliyi Dövlət Ekoloji Təhlükəsizlik Xidməti bildirir ki, göldən götürülən analizlərin hamısının nəticəsi bəlli deyil, buna bir zaman lazımdır, amma göldə ionun və bəzi maddələrin miqdarı normadan çoxdur, boya fabrikində baş verən yanğının söndürülməsi zamanı gölün suyuna kimyəvi maddələrin qarışdığı sübut olunarsa, təmizlənməsi üçün tədbirlər görüləcək.

“Sobsan” boya fabriki rəhbərliyi isə tullantıların Böyük Şor gölünə axıdılması ilə bağlı xəbələri əsassız saymışdı.

“Azərsu” ASC isə isə üç gün əvvəl yanğın baş vermiş “Sobsan” boya fabrikinin tullantı sularının Böyükşor gölünə axıdıldığını bildirmişdi.

Xatırladaq ki, 2020-ci il iyulun 5-i gecə Binəqədi rayonundakı  “Sobsan” boya fabrikində yanğın baş verib. İyulun 6-da isə Bakının Binəqədi və Nərimanov rayonlarında kəskin iy-qoxu hiss edilib. Mütxəssislər müəyyən ediblər ki, iy-qoxu Böyükşor gölündən gəlir. Gölün suyundan və göl üzərindəki havadan nümunələr götürülüb, araşdırmalar davam edir. Həm də ehtimal edilir ki, yanğının söndürülməsi zamanı əmələ gələn tullantı sular da gölə axıdılıb.

Niyə xaricə olar, amma rayonlara yox

“Redaktor.az” isə “Niyə xaricə getmək olar, rayonlara yox?” sərlövhəli məqalədə verilən suala cavab axtarır.

Müəllif deyir ki, bəzi deputatlar vətəndaşların koronavirus testi verib Bakıdan rayonlara getmələrinin də mümkünlüyü məsələsini qaldırıblar, amma Operativ Qərargah buna reaksiya verməyib.

Müəllif deyir ki, ən çox yoluxma Bakıdadır və onların burada qalması yoluxma sayını daha çox artıra bilər, hazırda Bakıda karantin qadağalarına görə rayona gedə bilməyən xeyli rayon qeydiyyatı olan insan var və onların rayona getməsi Bakıdakı sıxlığı azalda bilər ki, bu da virusla mübarizədə bizə kömək edəcək. Müəllifin deməsinə görə, professor Adil Qeybulla da açıqlamasında bu təklifi məqsədəuyğun hesab edib: “Ümumiyyətlə, Azərbaycan daxilində görülən tətbirlərdə xeyli yanlışlıq və çaşqınlıqlar var. Karantin davranışlarını elə təyin etmək lazımdır ki, qaydalar bu şəkildə sərt olmasın. Çünki insanların azadlıqlarını məhdudlaşdırmaq düzgün deyil. Çünki  bu məhdudlaşdırma effekt verməyəcək”.

A.Qeybulla hesab edir ki, insanlar maska taxmaq, sosial məsafə gözləmək, gigiyenaya əməl etmək kimi karantin davranışlarına əməl etsələr hərəkətlərinin məhdudlaşdırılmasına ehtiyac qalmaz.