Media-icmal 09.09.2016

Azərbaycanda qaz hasilatı sənayesinin inkişafı, Milli Şuranın 11 sentyabr mitinqi ərəfəsində durum, korrupsiyaya qarşı mübarizə, ali məktəblərdə fənlərin çoxluğu, maşın bazarındakı durğunluq bugünki medianın aparıcı mövzusudur.

Azərbaycan - dünya miqyaslı qaz ixracatçısı

“Azərbaycan” qəzetində “Azərbaycan böyük qaz ixracatçısına çevrilir” sərlövhəli (http://www.azerbaijan-news.az/index.php?mod=3&id=1047450) məqalə ölkənin qaz hasilatı sahəsində fəalyyətinə həsr edilib.

Müəllifin fikrincə, Prezident İlham Əliyevin ölkə iqtisadiyyatının neftdən asılılığını aradan qaldırmağa yönəlmiş islahatları öz müsbət nəticəsini verir. 

Azərbaycanı Cənubi Qafqazın lider dövləti adlandıran müəllif Prezident İlham Əliyevin iştirakı ilə Bakı Dərin Özüllər Zavodunda “Şahdəniz-2” layihəsinin hasilat və dikborular platformasının dayaq blokunun dənizə yola salınmasını tarixi hadisə hesb edir. Layihə çərçivəsində istehsal ediləcək qazın ildə 6 milyard kubmetrinin Türkiyəyə, 10 milyard kubmetrinin isə Avropaya nəql ediləcəyi bildirilir.

Müəllif dövlət başçısı İlham Əliyevdən sitat gətirməklə bütün bu uğurların kökündə keçmiş prezident Heydər Əliyevin müəyyən etdiyi siyasi kursun durduğunu vurğulayır: “Əgər 1994-cü ildə Heydər Əliyevin təşəbbüsü ilə “Əsrin kontraktı” imzalanmasaydı, bu gün təsəvvür etmək mümkün deyil ki, Azərbaycan hansı vəziyyətdə ola bilərdi. Ölkəmizdə görülən quruculuq-abadlıq işlərinin, dayanıqlı iqtisadiyyatımızın, böyük valyuta ehtiyatlarımızın əsas mənbəyi “Əsrin kontraktı”dır”.

 Müəllif Yaxın Şərqdə baş verən hadisələrə baxmayaraq, Azərbaycanın öz dayanıqlı  inkişafını təmin etdiyini, həm də digər ölkələrin enerji təhlükəsizliyinin təmin olunmasında əhəmiyyətli rol oynadığını vurğulayır. Azərbaycanın adı qaz ixrac edən böyük dövlətlərin sırasında çəkilir və müəllif fikrinin dövlət başçısı İlham Əliyevdən sitat gətirməklə möhkəmləndirir: “Bu gün artıq Azərbaycan böyük qaz dövlətlərinin sıralarına daxil olur. Hasilat, nəqliyyat artacaq, Azərbaycan gələcəkdə tranzit funksiyalarını da oynaya bilər”.

Müəllif deyir ki, 2018-20-ci illərdə başa çatacaq TANAP və TAP layihələri Avoropa ölkələrini də Azərbaycan qazı ilə təmin edəcək. Müəllifin düşüncəsinə görə, həm “Cənub qaz dəhlizi”nin, həm də “Şimal-Cənub” beynəlxalq nəqliyyat dəhlizinin icrası ölkəmizin önəmini böyük dərəcədə artıracaq.

Müəllifə görə, bu layihələr Azərbaycan və tərəfdaş ölkələr üçün çox böyük strateji əhəmiyyət daşıyır. Bütün bunların reallaşması ilə Azərbaycan nəinki regional, dünya miqyaslı nəqliyyat mərkəzlərindən birinə çevriləcək: Müəllif  bildirir ki, bu sahədə İlham Əliyevin məqsədyönlü siyasəti nəticəsində bu gün ölkəmiz dünyada etibarlı tərəfdaş kimi tanınır.

Bakı icra hakimiyyəti hələ ki, cavab verməyib

“Azadlıq.info” saytı isə Milli Şuranın sentyabrın 11-də keçirilməsini nəzərdə tutduğu mitinqə (http://www.azadliq.info/156108.html) iki gün qalsa da, Bakı meriyasının hələ də quruma cavab verməməsini müzakirə edir. 

Məqalədə deyilir ki, meriya yalnız müraciətin daxil olduğu barədə məlumat verib. Yazıya görə, meriyanın aksiyaya cavabının müsbət və ya mənfi olacağı sentyabrın 9-da yəni, bu gün bəlli olacaq.

Məqalədə AXCP sədri Əli Kərimlinin cavabın bu qədər yubadılmasını çox kobud qanun pozuntusu, mitinq hazırlığına zərbə kimi dəyərləndirildiyi vurğulanır. 

Məqalədə deyilir ki, Ə.Kərimliyə görə, bu, həm də hakimiyyətin artıq rəsmən kütləvi mitinqlərdən rəsmi çəkinməsinin göstəricisidir.

Yazıda deyilir ki, Bakı meriyası aksiyaya münasibətlə bağlı hər hansı qərar qəbul etmədiyini bildirib.

Daha sonra məqalədə rəsmi qurumun bu situasiyada təşkilatçı tərəfə nə zaman cavab verməli olduğu proseduruna toxunulur və qeyd edilir ki, qanuna əsasən, belə cavab aksiyaya ən geci 3 gün qalmış verilməlidir.

Məqalədə deyilir ki, Milli Şuranın Koordinasiya Mərkəzinin üzvü Vahid Məhərrəmli Bakı meriyası ilə əlaqə saxlamağa çalışsa da telefonlara cavab verilmədiyini söyləyib və təşkilatçı kimi  3 nəfərdən heç birinə cavab təqdim edilmədiyini bildirib.

Ali məktəb sistemində islahat yoxdur            

“Exo” qəzetində isə ““Artıq” fənlər" sərlövhəli məqaləni oxumaq olar. (http://www.echo.az/article.php?aid=105298)

Müəllif ekspertlərə istinadən deyir ki, indiyə kimi ali məktəblərdə tələbəyə ancaq əlavə yük olan fənlər tədris edilir.

Müəllif bu sırada çertyojlar çəkilməsini nümunə göstərir və deyir ki, şəxs humanitar sahəyə gedəcəksə, bu fənn onun nəyinə lazımdır? Müəllif bəzi ali məktəblərdə humanitar sahədə təhsil alan tələbələrə ali riyaziyyat kursu keçilməsini də məntiqsiz adlandırır.

Müəllif bu sırada Neft Akademiyasında bir-birini təkrar edən kefdraların birləşdirildiyini nümunə gətirir.

Ekspert Hafiz Məmmədova görə, lazımsız fənn yoxdur, sadəcə həyat  fəaliyyətində kimlərin bundan nə dərəcədə istifadə edə biləcəyi kimi məsələ var:.

“Hansısa fənni birmənalı artıq saymaq olmaz, yoxsa o tədris olunmaz və heç öyrənilməzdi də. Odur ki, artıq fənn yox, kimin hansı bucaqdan baxdığı fənlər var”.

“Xəzər” universitettinin rektoru Hamlet İsxanlı isə qəzetə bildirib ki, universitetdə fənləri tələbələrin özlərinin seçmək imkanları var: “Bizdə tələbənin hansı fənni seçməsi azdlığı var, başqa universitetlərin yerinə danışmaq istəmirəm, ola bilər ki, orada başqa bir sistem mövcuddur. Həm də fənnin seçilməsi tələbənin öz təşəbbüsünə əsaslanır”. H.İsaxanlı deyir ki, bütünlükdə universitet tədris sistemini bu gün tələbəyə maraqlı olan sahələr üzərində qurur, proqram hazırlanır və Təhsil Nazirliyi ilə razılaşdırılır. H.İsaxanlı “Kompüter mühəndislyi” fənninin bu gün öncül sıraya çıxdığını və bu mənada daha böyük maraq kəsb etdiyini deyir.

Tələbələrin universitet daxilində fakültəsini dəyişməsini də asan sayan rektor deyir ki, tələbə bu qərara gələndə ki, fakültə seçimində səhv edib, onu aradan qaldırmaq üçün ərizə ilə rektorluğa müraciəti yetərli olur, fakültə dəyişdirilir.

Azad Müəllimlər Birliyinin sədri Məlahət Mürşüdlü orta məktəb tədris sitemindən bəzi fənlərin çıxarılmasına şübhəli yanaşır. Onun fikrincə, bu çıxarılan fənlər müasir sosiuma yönlənmək baxımından daha faydalı idi: Məsələn, keçən il “İqtisadiyyatın əsasları”, “Konstitusiya”, “İnsan və cəmiyyət” kimi fənlərin çıxarılmasını əsassız sayıram. Fikrimcə, bunlar laızmlı idilər. Ali məktəb sisteminə gəlincə, burada islahat aparılmayıb, odur ki, bu islahatlar olmadan hansısa əsaslı dəyişikliyə nail olmaq mümkün deyil”.  

M.Mürşüdlü deyir ki, bu sahədə əmək bazarı öyərnilmir və təhsil sistemi keçmiş sovet və müasir Qərb təhsil siteminin sintezinə bənzəyir. Ekspertə görə, bundan irəli gələrək, təhsil sistemində islahatların vaxtı çoxdan yetişib.

Ekspert Şahlar Əsgərov da qəzetə deyir ki, bu sahədə əmək bazarının öyrənilməsinin, tələblərin, təkliflərin nədən ibarət olmasının müəyyənləşdirilməsi üçün təhlil aparılmalıdır. Ş.Əsgərov deyir ki, bu bazarı öyrənmədən və təhlil etmədən hansısa nəticələr əldə etmək mümkün olmur, ilk növbədə əmək bazarı öyrənilməlidir.

Müstəqil məhkəmə olmasa...

“Novoe Vremya” qəzeti “Kəmiyyət yox, keyfiyyət” sərlövhəli məqalədə

(http://www.novoye-vremya.com/w66176/.../#.V9IQeSh97IU) ölkədə korrupsiyaya qarşı müabrizə məsələsini araşdırır.

Müəllif korrupsiyadan qaça bilmək üçün bir çox rəsmi qurumların dövlət funksiyalarının “ASAN-xidmət”ə verilməsini təqdir edir. Amma bunu korrupsiyanın dövlət qurumlarında tamamilə ləğv olunması saymağın tez olduğunu deyir.

Müəllif dövlət başçısı İlham Əliyevin bu günlərdə verdiyi dövlət qurumlarında korrupsiyaya qarşı mübarizə qurumu yaradılması təklifini də məqbul sayır. Bununla bağlı “Korrupsiya haqqında” qanuna dəyişkliklərə toxunur.

Amma müəllif bu təkliflər hətta qanun qüvvəsi alsa belə, irəliləməyəcəyini deyir və buna əsas kimi büdcə təşkilatları əməkdaşlarının qururmda korrupsiya olması haqda informasiya verməyəcəklərini vurğulayır. Müəllif bu mübarizəni vacib sayır.

Müəllifə görə, Azərbaycanda korrupsiya sistemlidir, odur ki, sistemi dəyişmək lazımdır, çünki, korrupsiyanı bu sistem özü doğrurur: “Yeri gəlmişkən, ölkədə müstəqil məhkəmə sistemi qurmadan korrupsiyaya son qoymaq səyi nəticəsiz başa gələcək” 

Avtomobil satışı dayanıb

“Bizim yol” qəzeti “Bakıda avtomobil satışı dayanıb” sərlövhəli məqalədə

(http://www.bizimyol.info/news/84262.html) bu sahədəki durumu müzakirə edir. 

   Müəllif ekspertlərin dediklərinə istinadən hamının gözləmə mövqeyində qaldığını, nəsə almağa tələsmədiyini bildirir. Müəllifə görə, insanlar əllərində olan pulu dollara çevirib saxlayır ki, bu, avtomobil bazarına da təsir edir.

Müəllif deyir ki, ekspertlərin fikirlərini avtomobil bazarındakı satıcılar da təsdiqləyirlər, onlar avqust ayının sonundan bazarda tamamilə səssizlik olduğunu, avtomobil alan olmadığını deyirlər. Müəllif deyir ki, satıcılardan biri avqustun sonunda barterlə olsa da, bazarda 4-5 avtomobil satmaq mümkün olduğunu bildirib. Məsələn, 1995-ci il model “Mercedes” avtomobilini üstündə 7 min manat ödəməklə 2004-cü ilin “Mercedes E Class”la barter etmişdilər. Yaxud 2007-ci ilin “Pojero”sunu əlavə 3 min manat ödəməklə 2010-cu il model “Pojero” ilə dəyişmişdilər. Hazırda isə hamı dolların məzənnəsinin sabitləşməsini gözləyir. Ona görə, hələlik avtomobil satışı tam dayanıb.

Amma müəllif indi avtomobil almağı əlverişli vaxt sayır, belə ki, satıcılar qiymətdə daha çox endirimə razı olurlar,  avtomobilləri 5 min dollara kimi endirimlə almağın mümkünlüyü vurğulanır. Müəllifə görə, qiyməti 10 min manata kimi olan avtomobillərə 1200-1500 manata kimi endirim edilir. Məsələn, hazırda 7500 manata satılan 2010-2011-ci il model “Priora” avtomobilini 5800-6000 manata almaq olar.

Amma müəllif satıcılara istinadən bunu da bildirir ki, 2-ci avtomobil bazarında qiymətlər bu şəkildə davam etməyəcək. Satıcılar dolların bahalaşmasının ölkədə qiymətləri də bahalaşdıracağını, odur ki, ikinci əl avtomobillərin də bahalaşcağını bildirir.