Media-icmal 10.06.19

Regionlarda sahibkarlığın inkişafının stimullaşdırılması, çimərliklərdəki qiymət bahalığı, orta məktəblərdə 14 günlük əlavə dərs tədrisi ətrafında müzakirələr və s. bugünkü (10 iyun, 2019-cu il) medianın aparıcı mövzularındandır.

Regionlarda sahibkarlığın inkişafı

"Azərbaycan" qəzeti "Dövlət proqramlarının icrası regionlarda sahibkarlığın inkişafını stimullaşdırır" adlı məqalədə ölkə regionlarında sahibkarlığın inkşafını dəyərləndirir.

Müəllif deyir ki, ölkənin hərtərəfli və dayanıqlı inkişafı, neft asılılığına son qoymaq üçün müxtəlif dövlət proqramları icra edilir, struktur islahatları aparılır və bu istiqamətdə mühüm irəliləyişlərə nail olunub.

Yazı müəllifi vurğulayır ki, qeyri-neft sektorunda ilbəil məhsul istehsalı artımı bunun təsdiqidir, bu artımda özəl sektorun, sahibkarlığın rolu daha çox olub.

Bu yöndə müəllif 2014-2018-ci illərdə regionların sosial-iqtisadi inkişafı üzrə Dövlət Proqramının icrasının yekunlarına həsr olunmuş konfransda dövlət başçısı İlham Əliyevin çıxışından sitat gətirir: "Sahibkarlıqla bağlı siyasətimiz davam edəcək. Sahibkarlara dövlət tərəfindən böyük dəstək verilir - həm mənəvi dəstək, siyasi dəstək, maddi dəstək. Fermerlərə kreditlər, subsidiyalar verilir. Bu sahədə də təkmilləşmə gedəcək, texnika, gübrələr, yanacaq güzəştli şərtlərlə verilir. Bu sahədə də Azərbaycan nadir ölkələrdəndir ki, öz sahibkarlarına, öz fermerlərinə bu qədər diqqət göstərir. Əlbəttə ki, biz sahibkarlardan daha böyük nəticələr gözləyirik. Gözləyirik ki, onlar bundan sonra da ölkə iqtisadiyyatına öz töhfələrini verəcəklər".

Müəllif özəl sektorun fəaliyyətinin dəstəklənməsi, bu sahəyə dövlət qayğısının artması məqsədilə Sahibkarlığın İnkişafı Fondunun vəsaitləri hesabına bugünədək ölkə üzrə layihələrinin ümumi dəyəri 5 milyard manat olan 35600-dən çox sahibkara 2,3 milyard manat güzəştli kredit verildiyini bildirir: "Bu kreditlər hesabına reallaşan layihələr nəticəsində 165 mindən çox yeni iş yeri açılıb. 68 faizi aqrar sektorun, 32 faizi müxtəlif sənaye və digər sahələrin inkişafına yönəldilən kreditlərdə regionların payı 75 faiz olub"-müəllif belə söyləyir.

Yazı müəllifinin deməsinə görə, 2004-cü oldən kənd təsərrüfatı texnikası lizinqə verilir, pestisidlər, texnoloji avadanlıqlar, tinglər, toxumlar, cins damazlıq heyvanlar güzəştli şərtlərlə istehsalçılara çatdırılır, onlara aqrotexniki xidmətlər göstərilir.

Müəllif vurğulayır ki, regionlarda sahibkarlıq fəaliyyətinə yeni başlayanların dəstəklənməsi üçün isə Xaçmazda və Yevlaxda Regional İnkişaf mərkəzlərində biznes inkubatorlar yaradılıb, biznesin sirləri öyrədilir.

Müəllif ölkə iqtisadiyyatına sərmayə qoyuluşunun stimullaşdırılması üçün sahibkarlara investisiya təşviqi sənədlərinin verilməsinə başlandığını və 2016-2018-ci illərdə 292 sahibkarlıq subyektinə 333 investisiya təşviqi sənədi təqdim edildildiyini, bu hesaba yerli istehsala 2,8 milyard manat investisiya yatırılacağı, 22 minədək yeni iş yerinin açılacağının nəzərdə tutulduğunu bildirir.

Müəllifə görə, bütün bunların sayəsində xüsusilə ölkənin kənd təsərrüfatı məhsulları ilə təminatı ildən-ilə yaxşılaşır, ixrac imkanları genişlənir. Təkcə 2017-ci illə müqayisədə ötən il meyvə-tərəvəz ixracı 11 faiz artaraq ölkəyə 530 milyon dollar həcmində gəlir gətirib ki, bu nailiyyətlər müstəqillik dövründə qazanılan ən yüksək nəticədir.

Dənizin "soyuda" bilmədiyi çimərlik qiymətləri

"Axşam.az"da "Bakı çimərliklərindəki "od tutub yanan" qiymətlər sərlövhəli məqalə oxumaq olar".

Müəllif çimərliklərdə xidmət qiymətləri və onların bahalığını diqqətə çatdırır.

Müəllifin qiymət təqdimatlarından belə anlamaq olur ki, müştərilərə göstərilən xidmətlərin səviyyəsində dəyişiklik olmasa da əksər çimərliklərdə qiymətlər bahalaşıb, hətta "kəllə-çarxa" qalxıb.

Mərdəkanda yerləşən "Dalga Beach-Aqua Park" istirahət mərkəzində qiymətlərlə bağlı danışan müəllif deyir ki, burada giriş qiyməti həftəiçi 35 AZN, şənbə-bazar günləri isə 50 AZN-dir, 7-12 yaşlı uşaqlar üçün 15 AZN ödəniş edilir.

Müllifin deməsinə görə, xarici vətəndaşlar üçün qiymət fərqlidir, belə ki, həftəiçi giriş 50 manat, həftəsonu 70 manatdır.

Müəllif Nardaranda yerləşən "Sea Breeze hotel"də qiymətlərin bütün həftə üçün 20 manat, Hövsanda yerləşən "Halikarnas Balıkçısı"na girişin 10 manat olduğunu deyir. Burada xidmətə dəsmal, çətirli masa daxildir, özünüzlə yemək və içki gətirməyə icazə verilmir, 6 yaşa qədər uşaqlara giriş pulsuz, 7-12 yaş uşaqlara isə 5 manatdır.

Müəllif Bilgəh qəsəbəsindəki "Amburan" çimərlik mərkəzində bu il qiymətlərin bahalaşdığını, həftəiçi girişin 30 manat, həftəsonu isə 35 manat olduğunu, keçən il isə həftəiçi qiymətlərin 20-23, həftəsonu 28 AZN olduğunu xatırladır, üstəlik, xüsusi divanlarda dincəlmək istəyənlər əlavə 25-30 manat ödəməlidirlər.

"My Beach Novkhani"da böyüklər üçün giriş həftəiçi 20 manat, 5 yaşadək uşaqlara pulsuzdur, həftəsonu isə giriş 25 manatdır, bu qiymətə sadəcə "dəniz kənarı" daxildir, uzanmaq üçün verilən ləvazimata görə əlavə, 5 manat, besedka və çətirlərin altıda oturmaq istəyənlər isə əlavə 15-20 manat ödəməlidirlər.

Müəllif deyir ki, "Ramada Bakı" çimərliyinə həftəiçi giriş 20 manat, həftəsonu isə 25 manatdır, ötən illə müqayisədə qiymətlər nisbətən ucuzlaşıb.

Müəllif "Mambo beach club"da isə qiymətlərin bahalaşaraq həftəiçi 25, həftəsonu isə 30 manat olduğunu deyir, halbuki, keçən il bu qiymətlər həftəiçi giriş 15 manat, həftəsonu isə 20 manat təşkil edirdi, xidmətdə isə dəyişiklik yoxdur.

Yazı məllifi deyir ki. bi qiymətə çimərlik, açıq hovuz, soyunub-geyinmə otağı, duş kabinələri, çətir, VİP çadırlar, "lejanka" daxildir, Ayrıca dəsmal və açarlı dolab üçün 15 manat ödənilməlidir.

14 günük əlavə dərsin "mahiyyəti"

"Yeniçağ.az"da isə "14 günlük əlavə dərs şagirdlərə işgəncə verməkdir" - təhsil eksperti" sərlövhəli məqalə oxumaq olar.

Müəllif 31 həftəlik tədris müddətinin 34 həftəyə qaldırılmasının nə dərəcədə səmərəli olmasını təhsil sahəsi üzrə ekspert Kamran Əsədovla müzakirə edir.

"Təhsil Nazirliyinin tədris həftəsini 31 həftədən 34 həftəyə qaldırmasında məqsəd o idi ki, tədris proqramı tam şəkildə həyata keçirilsin. Ancaq bu, düzgün yanaşma deyildi. Dərs vaxtını artırmaqla buna nail ola bilmədilər, bu, zatən mümkün deyildi". Bunu isə "Yenicag.az"-a iyun ayının ortasına qədər davam edən dərslərin keçirilməsinə vaildeyinlərin şikayəti, şagirdlərin anomal istidən səhhətlərində problemlərin yaranması və məktəblərin şəraitsizliyini şərh edən təhsil eksperti K.Əsədov deyib.

K.Əsədov hesab edir ki, təhsil psixoloji amil olduğu üçün, təhsil alanların psixoloji vəziyyəti də nəzərə alınmalıdır: "Biz 15 günü kompensasiya etmək üçün, dərsləri sentiyabrın 1-dən başlayıb, mayın sonunda bitirməklə problemi həll edə bilərik. Hazırda iyun ayının 14-nə qədər tədrisin aparılması dərslərin keyfiyyətinə heç bir faydası yoxdur. Azərbaycanda 4471 məktəbin infrastrukturu buna imkan vermir ki, şagirdlər isti aylarda tədris prosesində aktiv iştirak etsinlər".

K.Əsədov əlavə edir ki, Azərbaycanda iyun ayından etibarən insanlar mütləq şəkildə istirahətə gedir, dəniz, bağ mövsümü başlayır və kütləvi haldır.

Ekspertə görə, üstəlik, müəllimlərin özlərinin fiziki vəziyyəti bu müddətdə dərs prosesində keyfiyətli tədris qurmağa imkan vermir.

Digər tərəfdən K.Əsədov iddia edir ki, iyun ayının 14-nə qədər dərs prosesinin davam etməsi dövlət iqtisadiyyatına da zərər verir: "Hazırda dərs keçilmir. Bu dəqiqə orta məktəblərə getsək, görəcəyik ki, davamiyyət tamamilə aşağı səviyyədədir. Şagirdlər dərs prosesində iştirak etmirlər. Bu, şagirdlərə əlavə işgəncə verməkdən başqa bir şey deyil".

Ekspert ümid edir ki, yeni tədris ilindən etibarən 14 günlük əlavə dərs aradan qaldırılacaq: "Regionlarda məktəblərlə ev arasında məsafə kifayət qədər çoxdur. Şagirdlər evə qayıdan zaman günvurma halları da tez-tez baş verir. Bütün hallarda istidə məktəbə gedib-gəlmək fiziki baxımdan ciddi problem yaradır".

Müəllif xatırladır ki, bu gnlərdə bir sıra valideyinlər sosial şəbəkələrdə övladlarının məktəbdə istidən hallarının dəyişməsi, ürəkbulanması, baş ağrısı və ürəkgetmə hallarının olmasını yazaraq, iyun ayının ortasına qədər dərslərin keçirilməsinə etirazlarını bildiriblər.