Media-icmal 10.07.20

Bazarlarda kənd təsərrüfatı məhsullarının bahalığı, sərt karantin rejiminin mövcudluğuna baxış, koronavirus pandemiyası ilə bağlı vəziyyət və s. məsələlər medianın aparıcı mövzuları sırasındadır… 

Qiymətlər niyə belə baha?

"Müsavat.com" "Meyvə- tərəvəzin qiyməti niyə əl yandırır?" sərlövhəli məqalədə müəllif ekspert Nicat Nəsirli ilə verilən suala cavab axtarır.

Müəllif deyir ki, bu il meyvə-tərəvəzin qiyməti diqqət çəkir, necə deyərlər, "əl yandırır". İlk baxışda belə təsəvvür yaranır ki, məhsul istehsalı az olub, amma elə deyil, səbəb pandemiya ilə bağlı regionlardan paytaxta az meyvə-tərəvəz çatdırılması ilə bağlıdır.   

Kənd təsərrüfatı sahəsi üzrə ekspert Nicat Nəsirliyə görə, karantin müddətinin uzadılması məhsulların daşınması, ixracı və s. kimi proseslərə təsir göstərdi. O vurğulayır ki, kiçik sahibkarlar bazarlara çıxa bilmədilər, yalnız böyük həcmli yüklərin şəhərlərə daşınmasına icazə verildi.

Ekspert deyir ki, hazırda bəzi aqrar məhsullar mövsümə uyğun olmayan qiymətlərlə satılır və bu, birbaşa karantin rejiminin tətbiqi ilə əlaqəlidir. "Bəzi bazarlarda isə karantin rejimini bəhanə edərək daha çox gəlir əldə etmək istəyənlər var və bazarlarda bəzi məhsulların qiymətini mövsümə uyğun təklif etmirlər".

Mütəxəssisə görə, ölkədə həmişə aprel ayından aqrar məhsullarda ucuzlaşma başlayırdı və bu, oktyabra qədər davam edirdi, bu il bu proses müşahidə olunmur.  

N.Nəsirli deyir ki, bu il ölkə fermerləri su qıtlığından da əziyyət çəkirlər və bu problem artıq 10 ildir ki, var. Bu da Kür çayında suyun səviyyəsinin nəzərə çarpacaq dərəcədə aşağı düşməsi ilə bağlıdır. Adətən hər ilin iyul ayında suyun səviyyəsi azalır. Ekspert hesab edir ki, su ilə bağlı problem təkcə su qıtlığı ilə yox, həm də düzgün idarə etməmə ilə əlaqəlidir və burada kifayət qədər itkilər var.

Sərt karantin ləğv olunmalıdır, amma…

"Yenisabah.az" "Karantin rejimi ləğv olunmalıdır, amma…" sərlövhəli məqalədə müəllif mövcud sərt karantin rejimini professor Adil Qeybulla ilə dəyərləndirir.

A.Qeybulla hesab edir ki, mövcud sərt karantin rejimi ləğv olunmalı, insanlar arasında daha çox maarifləndirmə işi apararaq sosial məsafə gözləmək, maska taxmaq kimi davranışlara inandırmaq lazımdır: "Hesab edirəm ki, karantin rejimi ləğv olunmalıdır. İnsanlara daha çox başa salmaq lazımdır ki, küçədə sosial məsafə gözləyərək, maska taxaraq bir-birini qorusunlar. Bir tərəfdə karantin, digər tərəfdə hər yerdə sıxlıq. Bu vəziyyətdə insanlarda panika yaranır. Artıq rayonlara gediş-gəliş bərpa olunmalıdır, onsuz da insanlar müxtəlif yollar tapıb gedir".

Müəllif yada salır ki, karantin əvvəl də olmuşdu, sonra ləğv edildi, virusa yoluxma artdı.

Professora görə, o da əslində karantin deyilmiş, orada da çox ciddi pozuntular olub. Karantini yumşaltmaq maska taxmaq, sosial məsafə gözləmək, gigiyenaya əməl etmək kimi  karantin davranışlarını arxa plana keçirmək demək deyil: "İnsanlar situasiyanı boykot etdilər, parklarda kütləvi gəzintilər, üstəlik evlərdə gizli qonaqlıqlar təşkil edildi, bu, hələ indi də davam edir".

Onun fikrincə, karantinin ləğvi öncəsi insanların yeni situasiyada necə davranacaqları barədə təlimatlar, davranış və şərtlər hazırlanmalı və maarifləndirmə işləri aparılmalı idi: "Bunların heç biri olmadı. İndi də karantin davranışlarına nəzarət gücləndirilməli, cərimələr saxlanmaq şərti ilə karantin yumşaldılmalıdır. Fikrimcə, insanları buraxmaq lazımdır ki, iqtisadi fəallıq bərpa olunsun".

Bu virus artıq yaş "tanımır"

"Oxu.az" saytında "Həkim-infeksionist: Elə həddə gəlib çatmışıq ki, hər evdən bir nəfər COVID-19-dan həyatını itirə bilər" sərlövhəli məqalədə müəllif ölkədə koronavirus pandemiyası ilə bağlı vəziyyət barədə Mərkəzi Neftçilər Xəstəxanasının həkim-infeksionisti Natiq Əliyevlə söhbətləşir.

Müəllif həyata keçirilən tədbirlərə baxmayaraq, Azərbaycanda korornavirusa yoluxma sayının hər gün 500 nəfərdən çox olduğunu, ümumi yoluxmanın 22 min nəfər həddinə yaxınlaşdığını bildirir.

N.Əliyev isə əvvəllər xəstələr arasında virusu yüngül və asimptomatik keçirənlər olduğunu desə də, hazırda xəstəxananın orta və ağır dərəcəli  xəstələrlə dolu olduğunu söyləyir: "Bu gün xəstəxanada boş çarpayı yoxdur. Xəstəxanadan evə buraxılan şəxsin yerinə dərhal yeni xəstə gəlir. Hazırda xəstəxanada COVID-19 virusuna yoluxmuş 160-dan çox şəxs müalicə alır, onlardan 16-sı reanimasiya şöbəsindədir. Reanimasiyaya yerləşdirilən xəstələr süni tənəffüs və ya SİPAP aparatlarına qoşulub", - deyə N.Əliyev qeyd edib.

Onun sözlərinə görə, son zamanlar xəstəliyin yaşı xeyli "cavanlaşıb", bütün yaş qruplarını əhatə edir, hamı üçün təhlükəlidir.

İnfeksionist əlavə edir ki, ümumiyyətlə, Azərbaycanda dar ixtisaslı həkimlər də daxil olmaqla, yoluxucu xəstəliklər üzrə təhsilli mütəxəssislər çatışmır".

Həkim-infeksionistə görə, koronavirus Azərbaycanda daha aqressiv hala gəlib: "Ölkədə pandemiyanın nə zaman səngiyəcəyini söyləmək mümkün deyil. Biz o həddə gəlmişik ki, hər evdən bir nəfər koronavirusdan vəfat edə bilər".