Media-icmal 10.10.20

"Azərbaycan" qəzeti  "Yalanın əlindən tutub yeridənlər" sərlövhəli məqalədə Azərbaycanın işğalda olan torpaqlarını hərb gücünə aradan qaldırmasını dəyərləndirir.

Müəllif öncə diqqəti uzan zaman "Dağlıq Qarabağ münaqişəsinin hərbi yolla həlli yoxdur" deyiminin üzərinə çəkir və bunun əsassız olduğunu bildirir. "Sentyabrın 27-də Azərbaycan Ordusunun əks-hücuma keçərək düşmənə ağır zərbələr endirib onu geri çəkilməyə məcbur etməsi dünya siyasətində bomba effekti yaratdı. İllərdir bizə "Dağlıq Qarabağ münaqişəsinin hərbi yolla həlli yoxdur" deyib moizə oxuyanlar gördülər ki, başqa yol da varmış. Daha doğrusu, məlum oldu ki, Ermənistanın destruktiv mövqeyi üzündən bu münaqişənin sülh yolu ilə həlli dalana dirənib", deyə müəllif bildirir.

O əlavə edir ki, indi Azərbaycan erməni işğalçılarına sarsıdıcı zərbələr endirməklə həmin dalandan çıxmaq istəyir, yenə də Azərbaycana atəşkəs təklifləri gəlir və 30 ildir işğalda qalan torpaqları azad etməyə mane olmaq istəyirlər.

Müəllifin sözlərinə görə, indi də hərblə torpaqlarını işğaldan azad etməkdə olan Azərbaycanı az qala işğalda ittiham etmək istəyirlər.

Müəllif deyir ki, Ermənistan döyüş bölgəsində terrorçuların vuruşduğunu danmır, Yaxın Şərqdən bura döyüşməyə gələnləri terrorçu yox, könüllülüər adlandırır.

Ermənistan və havadarları Azərbaycan Ordusu tərəfindən aparılan uğurlu əməliyyatların qarşısını almaq üçün bütün məkrli vasitələrə əl atırlar.

Müəllif vurğulayır ki, erməni tərəf terrorçulardan istifadə etdiyi halda Azərbaycanı belə addımda suçlaması onların son yalanı deyil, amma haqq-ədalət Azərbaycan tərəfindədir.

"Biz bütün təzyiqlərə, şantajlara, təhdidlərə boyun əyməyərək dövlətimizin və Ordumuzun arxasında olmalıyıq. Qələbə bizimlədir!", deyə müəllif bildirir.

"Oxu.az" saytı "ATƏT-in Minsk Qrupu həmsədrlərinin bəyanatları Ermənistanın işğalçı siyasətinə dəstək olub" sərlövhəli məqalədə müəllif adı çəkilən qrupun fəlaiyyəti barədə "Dağlıq Qarabağ bölgəsinin azərbaycanlı icması" İctimai Birliyinin sədr müavini, professor Gülməmməd Məmmədovla söhbətləşir.

"Dağlıq Qarabağ bizim torpağımızdır. Bu torpaqlar hüquqi baxımdan beynəlxalq səviyyədə tanınmış bir faktdır və torpaqlarımızın Ermənistanın təcavüzkar qüvvəsi tərəfindən işğal edilməsi beynəlxalq səviyyədə dəfələrlə təsdiqlənib", deyə G.Məmmədov bildirir.

Sədr müavini hesab edir ki, münaqişənin həlli ilə məşğul olan ATƏT-in Minsk qrupunun6 həmsədrləri işğal edənlə, işğal olunanı eyni səviyyədə tutublar.

Onun fikrincə, həmsədrlər ancaq atəşkəsə nail olmaq istəyiblər, verdikləri bəyanatlar isə Ermənistanın işğalçı siyasətinə dolayısı ilə dəstək olub: "Bu müddət ərzində də Ermənistan bizim torpaqları da özlərinə birləşdirmək siyasəti yürüdüb. ATƏT-in Minsk qrupunun həmsədrləri kəskin reaksiya verməyib", deyə sədr müavini bidirib.

G.Məmmədova görə, beynəlxalq birlikdə Azərbaycanın sonunda işğal edilmiş torpaqlarından vaz keçəcəyi düşüncəsi formalaşıb, amma onların gözləntisinin əksinə olaraq Azərbaycan ordusu öz sözünü deyir və gücünü dünyaya nümayiş etdirir: "Biz öz ərazimizdən işğalçı qüvvələri qovmaqla məşğuluq. Bu, ölkəmizin haqqıdır. Biz haqq-ədaləti qoruyuruq, hüquqlarımızı bərpa edirik", deyə G.Məmmədov bildirib.

"Müsavat.com" saytı isə "Cənubi Qafqaz müharibədən sonra: iqtisadi açılım mümkündürmü?" sərlövhəli məqalədə Qarabağın işğaldan azad edilməsindən sonra bölgənin ehtimal edilən iqtisadi inkişafını dəyərləndirir.

Müəllif deyir ki, Azərbaycanın işğal altında olan torpaqlarının azad edilməsi bu düşüncəni gündəmə gətirir və bu fonda iqtisadçıların düşüncələrini təqdim edir. 

Azərbaycan öz ərazi bütövlüyünü bərpa etdikdən sonra Cənubi Qafqazda sülh və normal birgə yaşayışın təmin olunmasına tam hazırdır. İqtisadçılara görə, müharibə Azərbaycanın xeyrinə sülhlə başa çatarsa, təbii ki, Cənubi Qafqazda iqtisadi imkanlarına və perspektivlərinə görə Azərbaycan daha çox investisiya cəlb etmək imkanına malik olacaq.

Onların sözlərinə görə, Cənubi Qafqazda, yəqin ki, ən böyük iqtisadi açılım turizm sektorunda ola bilər və bu mənada Dağlıq Qarabağ turizm əhəmiyyətli bölgədir.

Amma bəzi iqtisadçılara görə, hətta Ermənistanla sülh əldə olunsa belə, Azərbaycanın Ermənistanla iqtisadi əlaqələrinin tezliklə bərpası yenə də böyük sual altındadır: "Burada Cənubi Qafqazda sülh və inkişafı arzulamayan, bunda maraqlı olmayan şimal və cənub qonşularımızın rolunu da nəzərə almaq lazımdır. "Bu baxımdan, hətta ermənilər istəsələr belə, bölgədə birgə layihələrin həyata keçirilməsi yaxın müddətdə real görünmür", deyə iqtisadçılar bildiriblər.

"Redaktor.az" saytı  "Moskva danışıqları: Atəşkəs, yoxsa müharibəyə davam? ekspert rəyi" sərlövhəli məqalədə oktyabrın 9-da keçirilmiş Rusiya, Azərbaycan, Ermənistan Xarici İşlər nazirlərinin görüşünü dəyərləndirir.

Müəllif deyir ki, Ermənistanın təxribatından sonra Azərbaycan Ordusunun keçirdiyi əks-hücum əməliyyatı bu ölkənin siyasi-hərbi sisteminə çox böyük zərbə vurmaqdadır.

Müəllif deyir ki, Azərbaycan ordusu Qarabağda əsas güc olaraq işğal olunan ərazilərin təmizlənməsi istiqamətində əməliyyatları davam etdirir.

Politoloq Məhəmməd Əsədullazadə isə deyir ki, Ermənistan Azərbaycanın şərtlərini qəbul etməsə, atəşkəs mümkün olmayacaq.

Politoloqa görə, Moskvadakı danışıqlarda münaqişənin həlli variantları müzakirə ediləcək: "Lakin hər şeydən əvvəl Ermənistan şərtləri qəbul etməli və bu istiqamətdə bir yol xəritəsi hazırlamalıdır. Əks halda hazırkı vəziyyətdə Azərbaycan atəşkəsə razı olmayacaq", deyə M.Əsədullazadə bildirir. Əslində Rusiya da hazırkı vəziyyətdə Azərbaycanın atəşkəsə getməyəcəyindən əmindir: "Amma hər bir halda Azərbaycan yalnız hücumları uğurla davam etdirib, Ermənistanı kapitulyasiyaya məcbur etməlidir".

"Bizimyol.info"da "Neft dövrünün sonu" sərlövhəli məqalədə müəllif dünyada neft erasının başa çatmaqda olduğu  iddiasını gündəmin müzakirəsinə daşıyır. 

Müəllifin sözlərinə görə, inkişaf etmiş ölkələr üçün neft dövrü bitir. "Yaxın beş il ərzində o ölkələrdə neft istehlakı gündə 1,1 milyon barel azalacaq", deyə müəllif bildirir.

Müəllif vurğulayır ki, bu barədə Neft İxrac edən Ölkələr Təşkilatının (OPEC) hesabatında bildirilir.

Müəllifin sözlərinə görə, hesabatda neftə tələbatın azalmasının səbəbləri arasında iqlim dəyişikliyi, nəqliyyat böhranı və az da olsa, əhali artımı qeyd edilir.

Hesabatda vurğulanır ki, OPEC-in proqnozlarına görə, xammala olan tələbat inkişaf etməkdə olan ölkələrin hesabına bərpa oluna bilər. Amma belə görünür ki, o ölkələrdə, əksinə, tələbat azalacaq. Ancaq Çin, Hindistan kimi ölkələrdə tələbatın artması gözlənilir", deyə müəllif bildirir.

Hesabatda deyilir ki, bir müddət əvvəl məlum oldu ki, dünyada neft və qaz çıxarma qurğularının sayı rekord həddə azalıb, bu isə xammal istehsalını təhlükə altında qoyur.