Media-icmal 11.03.21

Vətən müharibəsindən sonra Qarabağdakı durum, sərt karantin rejiminin tətbiq edilib-edilməməsi, intiharların artmasının səbəbləri və s. məsələlər medianın aparıcı mövzuları sırasındadır... 

“Yenisabah.az” saytı “Laçın dəhlizi ilə bağlı mürəkkəb vəziyyət yaranıb - 10 noyabr razılaşması tamamilə pozula bilər” sərlövhəli məqalədə Qarabağdakı vəziyyəti politoloq Məhəmməd Əsədullazadə ilə dəyərləndirir.

Politoloqa görə, Rusiya sülhməramlı qüvvələri Qarabağdakı fəaliyyətini indiki şərtlər daxilində davam etdirəcəksə, Azərbaycan iki ildən sonra sülhməramlı qüvvələrin çıxarılmasını tələb edə bilər: “Konkret olaraq Laçın dəhlizi ilə bağlı mürəkkəb vəziyyət yaranıb. Bu dəhliz vasitəsilə Ermənistan rəsmilərinin Qarabağa girişi və silahlı erməni birləşmələrinin lojistikası, həmçinin canlı qüvvə ilə təmini həyata keçirilir. Bu, 10 noyabr razılaşmasına zidd olaraq sülhməramlı qüvvələr tərəfindən pozulur”, deyə M.Əsədullazadə bildirir.

Politoloq hesab edir ki, Rusiya üçtərəfli bəyanatdakı əsas maddələri təmin etməyib.

M.Əsədullazadə vurğulayır ki, Azərbaycanın Naxçıvanla birbaşa əlaqəsini təmin edən “Mehri dəhlizi”lə bağlı danışıqlardan yayınır, bunun da səbəbi kimi Ermənistandakı daxili vəziyyət göstərilir: “Belə çıxır ki, Ermənistan daxilində gərgin vəziyyətə görə kommunikasiyalar açılmırsa, revanşist Kocaryan-Sarkisyan tandemi hakimiyyətə gələrsə, 10 noyabr razılaşması tamamilə pozula bilər”, deyə politoloq təhlükə mənbəyini göstərir. Buna görə də Azərbaycan artıq növbəti ildən Rusiya sülhməramlı qüvvələrinin çıxarılmasını tələb etməlidir.

Azərbaycan isə Türkiyə və Pakistanla hərbi ittifaq yaratmaqla Moskvanın bütün təzyiqlərini neytrallaşdıracaq.

“Mətbuat.az” saytında isə “Bayram qabağı sərt karantin ilə bağlı açıqlama: İnsanların özünü necə aparmasından asılıdır” sərlövhəli məqalədə COVİD-19 pandemiyası ilə bağlı vəziyyət deputat Azər Badamovla müzakirə olunur.

Müəllif deyir ki, son günlər yoluxma sayında olan artım səviyyəsi Novruz bayramı ərəfəsində yenidən sərt karantin rejiminin tətbiq olunacağı xofu yaradıb.

A.Badamov isə yoluxmanın artmasına görə, vətəndaşları məsul tutaraq deyir ki, Operativ Qərargahın qəbul edəcəyi qərarlar əhalinin özünü necə aparmasından asılıdır.

Deputatın sözlərinə görə, hazırkı yoluxma (6-9 mart tarixindəki göstəricilər nəzərdə tutulur - red.) gündəlik orta hesabla 300 nəfər ətrafındadır və o, bu göstəricini çox kritik saymasa da yüksək olduğunu düşünür.

“Tibbi maskadan məsuliyyətlə istifadə olunanda hardasa bir ay bundan əvvəlki göstəricilərdə olduğu kimi yoluxmalarda sürətlə azalma olmuşdur… Təbii ki, biz özümüzü nə qədər məsuliyyətli aparıb tətbiq olunmuş qaydalara ciddi riayət etsək Operativ Qərargah daha çox yumşalmalara gedəcək və yenidən qapanmaların gündəmə gətirilməsinə ehtiyac qalmayacaqdır”, deyən deputat əsassız olaraq yenə də xalqı məsul tutub.

“Müsavat.com” saytında “Deputat: İntiharların sayının artması cəmiyyətimizi ciddi düşündürməlidir” sərlövhəli məqalədə son günlər ölkədə baş vermiş intiharların səbəbləri barədə danışılır. 

Müəllif martın 9-da Bakının Qaradağ rayonunun Lökbatan qəsəbəsindəki 16-17 yaşlı iki məktəbli qızın hündürmərtəbəli binadan atılaraq intihar etmələrinin cəmiyyətdə böyük narahatlıq doğurduğunu bildirir. Müəllif yada salır ki, bu hadisədən bir neçə gün öncə 20 yaşlı tələbə hündür binadan özünü ataraq, intihar etmişdi.

Müəllif son günlər intihar hallarının artmasına müəyyən təhlükəli internet oyunlarının da səbəb olduğunu vurğulayır.

Deputat Musa Qasımlı deyir ki, intiharlar bütün dünya ölkələrində var, Azərbaycanda da bu hadisəyə rast gəlinir. “İntiharların sayının artması cəmiyyətimizi ciddi düşündürməlidir və ona daha geniş baxmalıyıq”, deyə deputat fikrini bildirir.

Deputat hesab edir ki, ilk növbədə, məktəblərdə psixoloqların sayını artırmaq lazımdır, heç bir məktəb psixoloqsuz olmamalıdır.

Digər tərəfdən deputat deyir ki, təlim-tərbiyə təkcə məktəbin və müəllimin işi olmamalı, cəmiyyət məktəblə sıx əlaqə saxlamalıdır.

Psixoloq Elnur Rüstəmova görə isə, mövcud problemlə bağlı psixoloji maariflənmə və psixoprofilaktika istiqamətində işləri genişləndirmək lazımdı: “İntiharla bağlı statistika təqdim olundu. Ona əsasən məlum oldu ki, Azərbaycan intihar sayına görə bir çox ölkələrdən geri qalır”, deyə psixoloq bildirir.

Psixoloq əlavə edir ki, əvvəlki illərlə müqayisədə həm psixoloji problemlər, həm də buna təsir göstərən məqamlar çoxdur. İnsanlar informasiyalardan yüklənir və bu yüklənmə onlarda bir çox gərginliklərə gətirib çıxarır.