Media-icmal 11.12.19

Bakı-Tbilisi-Ceyhan neft kəmərinin region üçün iqtisadi əhəmiyyəti, gec ailə qurmanın səbəbləri, istilik təchizatı ətrafında müzakirələr və s. məsələlər medianın aparıcı mövzularındandır.

Regionun gəlir mənbəyi-BTC

“Azərbaycan” qəzeti “BTC bütün regiona xeyir-bərəkət gətirir” sərlövhəli məqalədə Bakı-Tbilisi-Ceyhan (BTC) neft kəmərinin region üçün əhəmiyyətini dəyərləndirir.

Müəllif deyir ki, illər ötsə də Heydər Əliyev adına Bakı-Tbilisi-Ceyhan əsas ixrac neft kəmərinin region ölkələrinə gətirdiyi gəlirlər getdikcə artır və BTC təcrübəsinə əsaslanan yeni qlobal layihələr gerçəkləşir ki, onlar daha böyük dividendlər gətirəcək.

Müəllifin deməsinə görə, bu ilin 9 ayı ərzində kəmərlə 24 milyon tona yaxın, yəni 177 milyon bareldən çox xam neft ixrac edilib.

Yazı müəllifi əlavə edir ki, hazırda "Azəri-Çıraq-Günəşli” yataqlarından çıxarılan neftin böyük hissəsi dünya bazarlarına BTC ilə çatdırılır.

“2006-cı ilin ortalarında tam sistem kimi istifadəyə veriləndən bu il oktyabrın əvvəlinədək BTC ilə ümumilikdə 3,3 milyard barel (440 milyon tona yaxın) xam neft ixrac edilib. Bu neft Ceyhanda 4307 tankerə yüklənərək dünya bazarlarına yola salınıb. Bu günə qədər isə boru xətti ilə Türkiyə və dünya bazarlarına Azərbaycanın və başqa dövlətlərin 450 milyon tondan çox nefti nəql olunub”.

Məqalədə vurğulanır ki, BTC həm də Azərbaycanın enerji ixracı marşrutlarının dünyaya şaxələnən yollarının başlanğıcında dayanan layihədir belə ki, istər 13 il əvvəl fəaliyyətə başlayan Bakı-Tbilisi-Ərzurum qaz kəməri, istərsə də gələn il çəkilişi tam başa çatacaq “Cənub” qaz dəhlizi məhz BTC-də toplanmış təcrübəyə əsaslanır.

Yazı müəllifi deyir ki, bu yaxınlarda TANAP-ın (Transanadolu Qaz Boru Kəməri) Avropa ilə birləşən hissəsinin açılış mərasimində dövlət başçısı İlham Əliyev də BTC-nin əhəmiyyətini bir daha qeyd edib: “2006-cı ildə Bakı-Tbilisi-Ceyhan neft kəməri istismara verilməsəydi, bu gün TANAP haqqında danışmaq mümkün olmazdı. Bakı-Tbilisi-Ceyhan neft boru xəttinin təməlini çağdaş Azərbaycan dövlətinin lideri Heydər Əliyev öz əlləri ilə qoymuşdur və 2006-cı ildə əziz qardaşım, prezident Ərdoğanla birlikdə Ceyhanda Bakı-Tbilisi-Ceyhan neft boru xəttini istismara verdik... Bakı-Tbilisi-Ceyhan nəinki Azərbaycanın, digər ölkələrin nefti üçün də gözəl bir infrastruktur layihəsi oldu və bu gün də uğurla fəaliyyət göstərir”.

Yazının sonunda isə oxuyuruq: “BTC fəaliyyət göstərdiyi 13 ildən çox müddətdə bilavasitə gətirdiyi gəlirlərlə və tikintisinə başlandığı vaxtdan indiyədək dolayısı ilə, yəni keçdiyi ərazilərdə yönəldilən sosial sərmayələrlə bütün regiona xeyir-bərəkət bəxş edir”.

Nə insanlar, nə də məmurlar...

“Moderator.az”da isə “İllərdir deyirəm ki, insanlar düzəlsin, amma nə onlar, nə də bəzi məmurlarımız düzəlir...” sərlövhəli məqalə oxumaq olar

Müəllif ölkədə vətəndaşların gec ailə qurmaları və bunun səbəbləri barədə tanınmış ictimai xadim, Tibb Universitetinin (ATU) dosenti Rəşid Mahmudovla söhbətləşir.

Müəllif deyir ki, ölkədə gec ailə quranların sayı artıb və rəsmi statistikaya görə, hazırda nikaha daxil olan kişi və qadınların orta yaş həddi 29-dur, bu isə son 29 il ərzində qeydə alınan ən yüksək yaş həddidir.

Tanınmış ictimai xadim, Tibb Universitetinin (ATU) dosenti Rəşid Mahmudov “moderator.az”a açıqlamasında məsələyə görə narahat olduğunu bildirib.

“Azərbaycanda gec ailə quran insanların sayına görə narahatam. Bu istiqamətdə dövlət müvafiq tədbirlər görməlidir. Əslində qızlar 21-23, oğlanlar isə 23-25 yaşında evlənməlidir. Amma indi 33, 35, hətta 40 yaşında evlənənlər var. Gənclərimiz şərait qura bilmir, maddi cəhətdən çətinlik çəkirlər. Fikirləşirlər ki, ailə saxlaya biləcəyikmi? İkinci bir tərəfdən də oğlanlar qızlara, qızlar da oğlanlara inanmır. Bir çox problemlər var və hamısı çözülməlidir”.

R.Mahmudov deyir ki, bununla yanaşı, qidalanmaya da diqqət yetirmək lazımdır, çünki bu gün Azərbaycana mənşəyi bilinməyən, kişiləri bədbəxt edən qidalar gətirilir.

R.Mahmudoun deməsinə görə, onlardan biri də “Palma” yağlarıdır ki, bu yağdan Azərbaycana 50 min ton gətirirlər, dünyada isə bu yağdan istifadə qadağandır”. 

Bununla yanaşı ictimai xadim sosial evlər layihəsindəki qalmaqalı da tənqid edib:

“Sosial evlər layihəsi başlatdılar və orada da saxtakarlıq etdilər. Bunlar hər yerdə saxtakarlıq edirlər, insanlar saflıqdan, paklıqdan çox uzaq düşüblər. Rüşvət artıq həyat kredosuna dönüb” deyə R.Mahmudov bildirir.

R.Mahmudov vurğulayır ki, ölkə düzəlməlidir: “On iki ildir deyirəm ki, insanlar düzəlsin, amma nə insanlarımız, nə də bəzi məmurlarımız düzəlir”.

İstilik təminatındakı problemlərin mənbəyi

“Sfera.az”da isə “Kimə şikayət edirsiniz, edin” deyən xırda məmur böyük problem yaradır” sərlövhəli məqalə diqqəti çəkir.

Müəllif paytaxtda mənzillərin istilik təminatında ciddi nöqsanların olmasının səbəblərini araşdırır.

Müəllifin deməsinə görə, paytaxtda mənzillərin istiliklə təminatında ciddi nöqsanlar var.

Üstəlik, müəllif əlavə edir ki, qışa hazırlıqla bağlı yaydan verilən nikbin açıqlamaların əksinə olaraq qış aylarında müşahidə edilən çatışmazlıqlar havaların soyuduğu bu günlərdə özünü daha qabarıq şəkildə göstərir.

Müəllif Yasamal rayonu, Əsəd Əhmədov küçəsi, 36 ünvanında yaşayan bir qrup sakinin redaksiyaya müraciətinə istinadən bildirir ki, Yasamal sakinləri durumun həddən artıq acınacaqlı olduğunu iddia edirlər.

Müəllif deyir ki, sakinlərin sözlərinə görə, durumları olduqca acınacaqlıdır və evlərinin içində soyuqdan donurlar.

“Havaların kəskin soyumasına baxmayaraq, mənzillərin istiliklə təzhicatında irəliləyiş yoxdur. Sanki elə bu cür də olmalıdır. Mənzillərimizi istiliklə təmin etməyə borclu olan “Azəristiliktəchizat” ASC-nin Bakının Yasamal rayonundakı 8 saylı İstilik Sistemlərinin İstismar Sahəsinin 206 saylı istilik qazanxanasına etdiyimiz şikayətlərin isə heç bir faydası yoxdur”.

Müəllif sakinlərə istinadən bildirir ki, adıçəkilən qazanxana rəhbərliyi  nəinki problemləri həll etmək, heç sakinləri dinləmək istəmir, elə bircə söz əzbərləyib ki, “məndən asılı deyil, hara şikayət edirsinizsə edin”.

Məqalə müəllifi vurğulayır ki, bu, “Azəristiliktəchizat” ASC-nin Bakının Yasamal rayonundakı 8 saylı İstilik Sistemlərinin İstismar Sahəsindən olan yeganə şikayət faktı deyil.

Müəllifə görə, demək olar ki, hər ilin qış aylarında bu qurumun adı mətbuatda mənfi mənada müntəzəm olaraq hallandırılır.

“Maraqlıdır, görəsən, qışın “oğlan çağında” sakinləri soyuqdan dondurmaqda maraqlı olan qurum bununla nə etmək istəyir? Yəni, bu qurum rəhbərləri o qədərmi xəbərsizdir ki, ölkə boyunca aparılan kadr islahatlarından, yerində olmayan məmurların sərt şəkildə cəzalandırılmasını da bilmir?” , -müəllif bildirir.

Son olaraq isə müəllif ümidini itirməyərək inanmaq istəyir ki, Yasamal rayonu, Əsəd Əhmədov küçəsi, 36 ünvanının istilik problemi yaxın zamanlarda müsbət həllini tapacaq.