Media-icmal 12.05.21

Azərbaycan mediası mayın 10-11-də Rusiya xarici işlər naziri Sergey Lavrovun başçılıq etdiyi nümayəndə heyətinin Azərbaycana səfərinə dair yazılara geniş yer verib. 

Belə ki, bu səfər özü, “Zəngəzur dəhlizi”nin mahiyyəti,  Moskvanın “danışıq” tərzi və s. məsələlər medianın aparıcı mövzuları sırasındadır...       

“Bizimyolinfo.az” saytı “Lavrovun Bakı səfəri: Nə verib, nə alacaq?” sərlövhəli məqalədə Rusiya xarici işlər naziri Sergey Lavrovun Azərbaycana səfəri dəyərləndirilir.

Siyasi şərhçi Vüsal Məmmədov diqqəti Lavrovun Bakıda Şəhidlər Xiyabanını ziyarət etməsinə çəkərək, bunu ibrətamiz hadisə sayır. Bunun ardınca şərhçi deyir ki, Azərbaycanın ərazi bütövlüyünə həmişə əngəl törədən, təhdid yaradan güclərdən biri və birincisi Rusiya olub.

Şərhçiyə görə, Moskva  “Zəngəzur dəhlizi” vasitəsilə özünü regionda kommunikasiya məsələsində “açar” dövlətə çevirmək istəyir.

Politoloq əlavə edir ki, Rusiya Qarabağda başlanacaq yenidənqurma işlərinə öz şirkətlərini cəlb etməklə yanaşı, hələ də regionu Dağlıq Qarabağ adlandırmaqla qeyri-səmimilik göstərir.

“Mətbuat.az” saytı “Türk dünyasının diqqəti Zəngəzurda - proses başladı” sərlövhəli məqalədə deputat Vüqar Bayramov bu dəhlizə inteqrasiyanın mahiyyətini dəyərləndirir.

Onun fikrincə, Şərq-Qərb beynəlxalq nəqliyyat dəhlizinə inteqrasiya olunacaq Zəngəzur dəhlizi təkcə bölgənin yox, bütövlükdə Türk dünyasının birləşməsinə imkan verəcək.

Deputata görə, layihənin iqtisadi üstünlüyü ilə yanaşı, strateji əhəmiyyəti də çox  böyükdür. Belə ki, bu dəhlizlə Şərqi Zəngəzurda yerləşən Zəngilan Qərbi Zəngəzurla, Ordubad vasitəsilə Naxçıvanla və Türkiyə ilə birləşəcək və bu, tarixi bir hadisə olacaq.

Deputat əlavə edir ki, bununla Azərbaycanın qərb hissəsi Naxçıvanın quru nəqliyyat yolu ilə birləşəcək, bu, həm də bölgədə yeni düzənin formalaşacağı deməkdir.

“Yenisabah.az” saytı “Rusiya Azərbaycanla əvvəlki dildə danışmır...” sərlövhəli məqalədə politoloq Qabil Hüseynli RF xarici işlər naziri Sergey Lavrovun və başçılıq etdiyi nümayəndə heyətinin səfəri fonunda Rusiyanın Azərbaycana davranış tərzini dəyərləndirir.

Politoloqa görə, Rusiya Azərbaycanla əvvəlki kimi yaxın qonşuluq münasibətləri dilində danışmır, bu, daha çox diqtəedici dilə bənzəyir.

Politoloq qeyd edib ki, Rusiyanın Qarabağla bağlı fikirləri əvvəldən aydın idi.

Onun fikrincə, bölgəyə yerləşən Rusiya Azərbaycanın ərazi bütövlüyünü unutmaq üzrədir və Qarabağın statusu kimi qorxulu məsələ ilə də manevr etmək istəyir. 

Politoloq hesab edir ki, bu xüsusda səsləndirilən ideyaların çoxunu da məhz Rusiya verir, ən azı Qarabağla bağlı köhnə status-kvonu “diriltməyə” çalışırlar.

Politoloqa görə, “suyu bulandıranların sayı çoxalıb, əvvəl Fransa idisə, indi Rusiyanın mövqeyində də qərarsızlıq var və məsələlərin mürəkkəbləşdiyini söyləmək olar.

“Redaktor.az” saytı  “Həmin gün Putin Bakıya niyə zəng etmişdi?” sərlövhəli məqalədə siyasi ekspert Asif Nərimanlı mayın 5-6-da RF Prezidenti Putinin Türkiyə prezidenti Ərdoğana, Azərbaycan Prezidenti İlham Əliyevə zəng etməsinin “pərdəarxasını” şərh edir.

Onun fikrincə, görünür, bir tərəfdən Rusiya tərəfin istəyi olub, digər tərəfdən ABŞ-ın regiona qayıtmaq istəməsi Rusiya tərəfi buna vadar edib, bu isə Moskvanı daim narahat edir.

Nərimanlıya görə, Moskva 2020-ci il 10 noyabr və 2021-ci il 11 yanvar razılaşmalarına sadiqlik istəyirsə, ilk növbədə Bakının erməni qoşunlarının çıxarılması tələbini nəzərə almalıdır.

Ekspertə görə, Moskva bunu etdikdən sonra Qarabağda qalmasına səbəb olan əsas kartlardan birini itirir.

Politoloqa görə, Putinin zəng etməsinin səbəblərindən biri Xankəndidəki separatçıların taleyinin necə olacağını müəyyənləşdirməkdir, çünki bu qüvvələr vasitəsilə Moskva regiondakı maraqlarını təmin edir.

Odur ki, Sergey Lavrovun mayın 10-da Bakıya gəldiyi gün Prezident İlham Əliyevin “Azərbaycan ərazisində Dağlıq Qarabağ adlı ərazi vahidi yoxdur” bəyanatı Bakının mövqeyini dəyişməyəcəyinin ifadəsi idi.