Media-icmal 13.05.19

Ölkədə yürüdülən sosial siyasət, selektiv abortların ölkənin pespektivinə mənfi təsiri, 25 ildir davam edən "atəşkəs reimi"ndən çıxarılan nəticələr və s. bugünkü (13 may, 2019-cu il) medianın aparıcı mövzularındandır.

Sosialyönlü siyasətin nəticələri

"Azərbaycan" qəzeti "Yüksək sosial rifah naminə" sərlövhəli məqalədə ölkədə yürüdülən sosial siyasəti dəyərləndirir.

Müəllif hesab edir ki, son 4 ayda əhalinin sosial müdafiəsinin gücləndirilməsi istiqamətində həyata keçirilən sosial islahatlar artıq öz müsbət nəticələrini göstərir, belə ki, bir çox kateqoriyalara aid insanlar aprel ayından yeni hesablamalar, təqaüd və müavinətlərini artımlarla almağa başlayıblar.

"Əlbəttə ki, bütün bu proseslər prezident İlham Əliyevin böyük sosial islahatlar paketi çərçivəsində imzaladığı fərman və sərəncamlar əsasında reallaşır. Dövlət başçısının ilin əvvəlində təqdim etdiyi böyükhəcmli sosial paket çərçivəsində elə bir kateqoriya olmadı ki, maaşlar, təqaüdlər, müavinətlər artırılmasın", müəllif bildirir.

Müəllif vurğulayır ki, 2019-cu ilin əvvəlindən başlayaraq dövlət başçısı sosial paketi çərçivəsində fərman və sərəncamlar imzaladı, bu sənədlərə əsasən minimum əməkhaqqı və pensiyalar təxminən 40 faiz, sosial müavinətlər orta hesabla 2 dəfə, məcburi köçkünlərə verilən müavinət 50 faiz artdı.

Bununla yanaşı tələbələrin təqaüdü, şəhid ailələrinə, Qarabağ müharibəsi əlillərinə verilən müavinətlər artırıldı, 14 kateqoriya üzrə sosial müavinətlər, 7 kateqoriya üzrə prezident təqaüdləri orta hesabla 100 faiz çoxaldı.

Müəllif deyir ki, İkinci Dünya Müharibəsi iştirakçısı olmuş şəxslərin ailələrinə də maddi vəsaitlər ayrılıb.

"Bütün bunlar bir daha təsdiqləyir ki, şəhid ailələri, veteranlar, qaçqın və məcburi köçkünlər, aztəminatlı ailələrə hərtərəfli qayğı və diqqət Azərbaycanda dövlət siyasətinin başlıca prioritetlərindən biridir", - müəllif sosial siyasətin əsas istiqamətini diqqətə çatdırır.

Müəllifin fikrincə, həyata keçirilən siyasətin sosialyönlülüyünü imzalanan fərman və sərəncamlar, həyata keçirilən sosial layihələr bir daha təsdiqləyir. "Çalışırıq bütün əlavə gəlirlərimizi sosial sahəyə yönəldək ki, vətəndaşların rifah halı daha da yaxşılaşsın, işsizliklə bağlı problemlər daha da yüksək səviyyədə həll olunsun və ölkəmizin dinamik inkişafı təmin edilsin.

Əlbəttə, buna nail olmaq üçün ilk növbədə iqtisadi inkişaf olmalıdır və biz bu məsələ ilə bağlı ciddi məşğuluq. Qeyri-neft sektorunun, sahibkarlığın inkişafı bir-biri ilə bağlı olan məsələlərdir. Hesab edirəm ki, Azərbaycanda bu istiqamətdə işlər uğurla gedir", - prezident vurğulayıb.

Sonda isə oxuyuruq: "Bir tərəfdən düşünülmüş və ardıcıl olaraq həyata keçirilən islahatların nəticəsi, digər tərəfdən isə İlham Əliyevin cəsarətli, inamlı addımları ölkə vətəndaşlarının gələcəyinə hesablanmış qətiyyətli siyasətinin təzahürüdür desək, yanılmarıq".

Əgər selektiv abortlar olmasaydı...

"Yeni Sabah.az" isə "Azərbaycanda qadınların sayı ciddi şəkildə azalır -rəsmi" sərlövhəli məqalə oxumaq olar.

Sayt ölkədə qadınlarn sayının azalması və bunun əhali artımının perspektivinə ziyanı barədə Ailə, Qadın və Uşaq Problemləri üzrə Dövlət Komitəsinin İnformasiya və analitik araşdırmalar şöbəsinin müdiri Elgün Səfərovun fikirlərinə yer verib.

"Azərbaycanda bir neçə il öncə qadınların sayı ölkə vətəndaşlarının 51.7 faizini təşkil edirdisə, hazırda bu rəqəm 50.1 faizə qədər enib", E.Səfərov bu sahədə ümumi azalma tendensiyasının nəticələrini vurğulayır.

E.Səfərovun deməsinə görə, son illər Azərbaycanda qadınların sayı 10 minlərlə azalıb, cins nisbətinin pozulması hallarının qarşısının alınması üçün Milli Fəaliyyət Planı hazırlanıb.

"Əgər qız uşaqları abort vasitəsilə öldürülməsəydi, Azərbaycanda hər 100 qıza 105 oğlan düşəcəkdi. Ölkədə qız uşaqlarının abort yolu ilə öldürülməsi halları hələ də mövcuddur. Ona görə də hər 100 qıza 115 oğlan düşür", -şöbə müdiri bu sahədəki fəlakəti ön plana çıxarır.

E.Səfərova görə, bu o deməkdir ki, ölkədə qadınların sayında əvvəlki illərə nisbətdə ciddi şəkildə azalma müşahidə olunur, bu sahədə balans və tarazlıq pozulub, ona görə də cins nisbətinin pozulması gələcəkdə böyük problemlərə gətirib çıxaracaq.

Şöbə müdiri hesab edir ki, bu problemə qarşı intensiv şəkildə mübarizə aparılması zəruridir: "Selektiv aborta birdəfəlik qadağa qoyulsaydı cins nisbəti pozulmayacaqdı və ölkədə artım təbii şəkildə öz axarı ilə inkişaf edəcəkdi".

E.Səfərov vurğulayır ki, artımın ləngiməsi isə ana bətnində körpələrin qətlə yetirilməsindən irəli gəlir.

Bu da gələcəkdə baş verəcək ciddi problemlərin həyəcan siqnalıdır, ona görə də bu problemlə intensiv şəkildə mübarizə aparılmalıdır.

25 il itirilən vaxt-atəşkəs

"Moderator.az"da isə "Biz özümüzü söyməliyik ki..." - Məğlubiyyətimizin bünövrəsini qoyan atəşkəs..." sərlövhəli məqalə diqqəti cəlb edir.

Sayt 1994-cü il mayın 12-də imzalanmış atəşkəs rejiminin 25 illik mövcudluğu barədə keçmiş təhlükəszilik zabiti İlham İsmayılın dəyərləndirməsini təqqim edir.

"Bu gün müasir Azərbaycan tarixinin ən utancverici bir günüdür. 25 il əvvəl Ermənistanın və havadarı Rusiyanın Qarabağı işğal etməsi ilə müvəqqəti barışan Azərbaycan üçün məğlubiyyətin etirafının sənədləşdirildiyi yubiley günüdür. Məğlubiyyətin etirafının da yubileyi olurmuş", - İ.İsmayıl bütünlükdə 25 il öncə atəşkəs haqda imzalanan protokola belə yanaşma sərgiləyir.

Müəllifə görə, hər bir protokolun gündəlik məsələsi olur, amma qeyri-müəyyən vaxta hesablanmış və Azərbaycanı hər gün daha da diz üstə çökdürən bu "məğlubiyyət protokolu"ndakı gündəlik məsələ 25 ildir ki, dəyişmir.

Keçmiş təhlükəsizlik zabiti deyir ki, bu məğlubiyyət sənədi Qarabağın azad edilməsinə hesablanmayıb, amma xalqın görünən və görünməyən, amma hər zaman hiss olunan müqavimət amili "məğlubiyyət protokolunu" kapitulyasiyaya sənədinə çevirməyə də imkan verməyib.

Müəllifə görə, 1994-cü il atəşkəs imzalanandan sonrakı aylarda xalq Qarabağın işğaldan azad olunması, Azərbaycanın ərazi bütövlüyünün təmin olunmasını gözləyirdi.

Onun fikrincə, atəşkəsə imza atılanda millət sadəlövhcəsinə bu prosesi gözləyir və şərtlərin ağır olacağını düşünürdü: "Çünki faktiki əraziləri işğala məruz qalan, yəni, uduzan tərəf biz idik və atəşkəsə imza atanlar bilməli idi ki, udan tərəfin şərtləri ağır olacaq, necə ki oldu. Və atəşkəsdən bəri aparılan danışıqların bizim üçün səmərəsizliyinin yubiley günü, bu gedişlə sonuncu yubiley olmaya bilər" deyə müəllif təhlükə səddinin hələ də aşılmadığını iddia edir.

İ.İsmayıl iddia edir ki, atəşkəs birmənalı olaraq dövlət kimi Ermənistanın işinə yaradı, Azərbaycanda da atəşkəsdən yararlananlar olubsa da bu, şəxsi xarakter daşıyıb, dövlət və millət əhəmiyyətli olmayıb.

Müəllif imzalandığı dövr üçün atəşkəsin zərurətini inkar etməsə də 25 il davam etməsini əsassız sayır: "25 illik də atəşkəs olar? Bu atəşkəs erməninin Qarabağda məskunlaşması deməkdir və oldu da. Bu atəşkəs erməni lobbiçilərinə imkan verdi ki, beynəlxalq rəyi əleyhimizə çevirsinlər. Tarixi şəraitin pusqusunda dayanan erməni bu gün də şəraiti öz lehinə həll etmək siyasəti yürüdür. Bu, düşməndir və düşmənçiliyini edəcək. Düşməni söymək ən asan işdir, Azərbaycanda ən asan iş ermənini söyməkdir, çünki heç bir nəticəsi yoxdur. Biz özümüzü söyməliyik, özümüzü tənqid etməliyik. Niyə 25 ildir ki, Qarabağ torpaqları azad olunmur? Niyə azad edə bilmirik? Atəşkəslə məğlubiyyətimizin bünövrəsi qoyulub. Bu təməli dağıtmaq üçün millət daha 25 il gözləməməlidir...""