Media-icmal 13.07.20

İyulun 12-də  Ermənistan-Azərbaycan dövlət sərhəddinin Tovuz rayonu istiqamətində baş vermiş döyüş ölkənin media, İnternet resursları və sosial şəbəkənin  əsas mövzusudur.  Müdafiə Nazirliyinin açıqlamasında  Ermənistan tərəfin bu hərəkəti təxribat kimi dəyərləndirilir.

Azərbaycan müdafiə nazirinin maddi-texniki təminat üzrə müavini  Nizam Osmanov döyüşün nəticəsi barədə deyib: “Düşmənə ağır və sarsıdıcı zərbə endirilib”.

İnformasiya portalları rəsmi qurumlara istinadən döyüş nəticəsində canlı itkilərin olması, 3 əsgərin şəhid, 4 nəfərinsə yaralanması barədə məlumatlar yayıblar.

İyulun 13-ü gecə saatlarında Müdafiə Nazirliyi Tovuz rayonu istiqamətində vəziyyətin yenidən gərginləşməsi barədə təkrar məlumat yayıb.  

Bununla yanaşı İnternet resursları ölkənin daxili həyatı barədə mövzulara da yer veriblər.

“Yenisabah. az” saytında yer alan “Dərman bazarında nə baş verir? “Bu, özbaşınalığı daha da artırır” sərlövhəli məqalədə suala cavab axtarılır.

“Dərman bazarında durum bütün əndazələri aşır, dərmanlar bahalaşır. Srağagün aptekdən bir neçə dərman aldım: bunlar mənə 1 ay bundan əvvəl aldığımdan 11 manat baha başa gəldi. Srağagün bir hissəsini aldığım (lazımi qədər aptekdə olmadığından) dərmanın qalan hissəsini dünən (iyulun 11-i) alanda məlum oldu ki, həmin dərmanın yeni qiyməti 1 manat artıb. Aptekçi and-aman elədi ki, yeni daxil olan dərmanların hamısının satış qiymətini qaldırıblar”. Bunu iqtisadçı Azər Mehtiyev deyib.

O bildirib ki, dərmanların qiymətlərinin tənzimlənməsi ortaya çıxanda dəfələrlə deyildi ki, bu, dərman bazarında vəziyyəti nəinki yaxşılaşdırmayacaq, əksinə, daha da ağırlaşdıracaq. 

A.Mehtiyev hesab edir ki, hazırda apteklərdə olan dərmanların həm tərkibi, həm çeşidi, həm də qiymətləri ilə bağlı ciddi problemlər yaşanır, belə ki, zəruri dərmanların qıtlığı var, bəzi dərmanlar ölkəyə gətirilmir, qiymətlərin çox bahalaşması və s. baş alıb gedir. 

İqtisadçıya görə, ölkədə dərman satışı sahəsində inhisarı aradan qaldırmaq əvəzinə bütün dərman bazarı 1-2 oliqarxın nəzarətinə verilib.

İqtisadçı  deyir ki, dərmanların qiymətinin tənzimlənməsi ləğv edilməli, dərman bazarı liberallaşdırılmalıdır.

“Redaktor.az” saytı isə “İctimai nəqliyyatda sıxlıq: BNA nə iş görür?” sərlövhəli məqalədə ictimai nəqliyyatda sosial məsafəyə əməl olunub-olunmaması müzakirə edilir.

Məsələnin mahiyyəti budur ki, ölkədə koronavirus infeksiyasına yoluxmanın sürətini azaltmaq üçün iyulun 4-dən Bakı metrosunun fəaliyyətinə ikihəftəlik qadağa tətbiq olundu.

Müəllif deyir ki, bu səbəblə ictimai nəqliyyatda sıxlıq müşahidə olunur.

Məsələ ilə bağlı açıqlama verən Bakı Nəqliyyat Agentliyinin (BNA) mətbuat katibi Mais Ağayev sıxlığın qarşısının alınması məqsədilə BNA-nın mütəmadi monitorinqlər keçirdiyini bildirib:  

“Artıq iki gündür səhər və axşam saatlarında sıxlıqla bağlı nəzarət tədbirləri həyata keçirilir. Bu nəzarət həm əməkdaşlar, həm də kameralar tərəfindən aparılır. Müşahidələr sayəsində insanların daha çox hansı dayanacaqlarda olduğu müəyyən olunur və o istiqamətdə avtobusların sayı artırılır”.

M.Ağayevə görə, son iki-üç gündə aparılan təhlillər M2 xətti ilə tələbatın çox olduğunu göstərib və bu xəttə əlavə avtobuslar cəlb olunub.

Onun sözlərinə görə, bu təhlilər ümumi olaraq aparılır və təlabat olduğu təqdirdə ekspress xətlərə avtobuslar cəlb olunur.