Media-icmal 14.01.21

"Azərbaycan" qəzeti  "Cənub qaz dəhlizi" yeni əməkdaşlıq formatının təməlini qoyur" sərlövhəli məqalədə haqqında bəhs ediən qaz dəhlizi boru kəmərilə Azərbaycan qazının Avropa məkanına çatdırılmasını dəyərləndirir.

Müəllif deyir ki, keçən ilin sonunda Azərbaycan qazı Avropaya çatdı, bu, "Cənub qaz dəhlizi"nin sonuncu hissəsi olan  TAP-ın (Trans-Adriatik Qaz Boru Kəməri) işə düşməsi sayəsində mümkünləşdi. TAP-ın istismara daxil olması ilə "Cənub qaz dəhlizi" tam fəaliyyətə başladı. Tarixdə ilk dəfə olaraq Azərbaycan qazı Avropaya birbaşa nəql edildi.

Müəllifə görə, bu baxımdan bu hadisənin təkcə neft-qaz sənayesinin deyil, bütünlükdə Azərbaycan xalqının tarixində xüsusi yeri və əhəmiyyəti var. Çünki "Cənub qaz dəhlizi" layihəsinin təşəbbüskarı və aparıcı qüvvəsi məhz Azərbaycandır. Prezident İlham Əliyev 2020-ci ilin yekunlarına həsr olunmuş videoformat şəklində keçirilən müşavirədə layihənin önəmini xüsusi vurğulayaraq demişdir: "Bu, bizim tarixi nailiyyətimizdir. Çünki "Cənub qaz dəhlizi"nin təşəbbüskarı da bizik. Əsas maliyyə yükünü də biz öz üzərimizə götürmüşük. Bir çox ölkələri birləşdirən bu layihə gələcəkdə o ölkələr və digər Avrasiya ölkələri arasında yeni əməkdaşlıq formatının təməlini qoyur. Bu əməkdaşlıq formatı bu gün artıq özünü nəqliyyat sektorunda, ticarət sektorunda göstərir, ondan sonra digər sektorlarda göstərəcək".

Müəllif yada salır ki, "Cənub qaz dəhlizi"ndə Azərbaycanla bərabər yeddi ölkə iştirak edir edir, təməli 2014-cü ilin sentyabrında qoyulub, layihə 6 ilə reallaşdırılıb.

Onun sözlərinə görə, ehtiyatları 1,2 trilyon kubmetr qaz və 240 milyon ton kondensatdan ibarət olan "Şahdəniz" dünyanın ən nəhəng karbohidrogen yataqlarındandır. Məhz bu yatağın uğurla işlənməsi və istismarı sayəsində Azərbaycan dünyada qaz ixrac edən ölkə kimi tanınıb.

Müəllif əlavə edir ki, Azərbaycan qazı yeni mənbədir və "Cənub qaz dəhlizi" yeni enerji damarıdır, bu layihənin həyata keçirilməsində maraqlar balansı gözlənilib, yəni iştirak edən bütün tərəflərin maraqları təmin edilib ki, bu da çox önəmli amildir.

"Yenisabah.az" saytı isə "Kremllə Ərdoğanın açıqlaması üst-üstə düşmədi - Ankaradan Moskvaya Qarabağ mesajı" sərlövhəli məqalədə Türkiyə və Rusiya prezidentləri arasında yanvarın 13-də baş tutmuş telefon danışığını şərh edir.

Müəllif deyir ki, "Rusiya və Türkiyə prezidentlərinin bugünki telefon danışığının fərqli açıqlamaları var.

Kremlin açıqlamasında bildirilir ki, Rusiya prezidenti Vladimir Putin türkiyəli həmkarını Azərbaycan və Ermənistan liderlərinin yanvarın 11-də Moskvada keçirilmiş üçtərəfli göüşü barədə məlumatlandırıb. Öz növbəsində, Ərdoğan Qarabağ nizamlanması ilə bağlı səylərində Putinə dəstəyini ifadə edib, Rusiya və Türkiyənin bu məsələyə dair fəaliyyətində koordinasiyanın davam etməsinin tərəfdarı olduğunu bildirib.

Politoloq Elxan Şahinoğlu isə deyir ki, Ərdoğan isə özünün "Telegram" kanalında Rusiya prezidenti ilə danışıqların başqa təfərrüatlardan söz açıb.

Ərdoğan bildirib ki, Putinlə Qarabağda atəşkəsə nəzarət və hərbi əməliyyatlara dair Rusiya-Türkiyə Monitorinq Mərkəzinin formalaşdırılmasını müzakirə edib. Ərdoğan Putinə deyib ki, Dağlıq Qarabağda sülhməramlı və müşahidə fəaliyyətinə ehtiyac olmadan birlikdə mövcudluğu təmin edəcək şərait yaradılmalıdır.

E.Şahinoğluna görə, bu Ərdoğanın Rusiyaya mesajdır, bu açıqlamalarıyla Ərdoğan, Rusiyanın birtərəfli qaydada Dağlıq Qarabağda hərbi iştirakından rahatsız olduqlarını bildirir.

Politoloqa görə, digər tərəfdən, Ankara bu açıqlama ilə Moskvaya belə bir mesaj da göndərir ki, Rusiya hərbiçilərinin Dağlıq Qarabağda varlığı müvəqqəti olmalıdır, 10 noyabr bəyənatına görə 5 ildən sonra onlar bölgəni tərk etməlidirlər.

"Müsavat.com" saytı isə "Yoluxma sayı azalır, karantin qaydaları yumşalacaqmı?" sərlövhəli məqalədə yanvarın 18-dən sonra sərt karantin rejiminin yumşala bilməsi mümkünlüyünü ekspertlərlə müzakirə edir.

Müəllif deyir ki, koronavirus pandemiyası dünyada öz arealını genişləndirir,  onun yeni formaları ortaya çıxır, bu yeni formalar dünyanın artıq 50 ölkəsində aşkar edilib.

Müəllif yada salır ki, 2020-ci ilin dekabr ayında Azərbaycanda da vəziyyət kritik olub, amma son vaxtlar yoluxmalar kəskin azalıb.

Professor Adil Qeybulla deyir ki, karantin rejiminin uzadılması, yumşaldılması və s. yanvarın 18-də bilinəcək: "Situasiyaya uyğun olaraq qərar veriləcək. Məsələ bundan ibarətdir ki, əlbəttə, müəyyən güzəştlər ola bilər. Amma birdən-birə karantin rejimini tamamilə ləğv etmək indiki durumda məqsədəuyğun deyil".

Müəllifin sözlərinə görə, infeksionist Gülnarə Əhmədova da məsələdə tələsməməyin tərəfdarıdır: "Yoluxma sayı 500-ə düşüb, karantin rejimində yumşalmalara gedilə bilər. Amma karantin rejiminin tamamilə götürülməsi təhlükəli ola bilər", deyə G.Əhmədova bildirir.

Onun fikrincə, birdən-birə hər yer açılsa, infeksiyaya yoluxanların sayı daha da arta bilər və hələ peyvənd vurulmamış bu, təhlükəlidir, hətta peyvənd vurulandan sonra da karantin davam etməlidir.