Media-icmal 15.12.18

Azərbaycan-Rusiya münasibətləri, yeni qurumun təsis olunmasına baxış, yaşayış məntəqələrinin vulkan olan ərazilərə təhlükəli həddə yaxınlaşması və s. məsələlər bugünkü (15 dekabr. 2018-ci il) medianın aparıcı mövzularındandır.

Rusiyadan Qarabağ gözləntisi

"Azərbaycan" qəzeti "Bir ildə 6 görüş" sərlövhəli məqalədə Azərbaycan-Rusiya münasibətlərini dəyərləndirir.

Müəllifə görə, daha da möhkəmlənən Azərbaycan-Rusiya əlaqələri dövlətlərarası münasibətlərə, mehriban qonşuluğa əsaslanır və münasibətlər strateji səviyyəyə yüksəlib: "Mübaliğəsiz demək olar ki, Azərbaycan-Rusiya münasibətləri dinamik yüksəliş mərhələsindədir. İki ölkə ictimai-siyasi, ticari-iqtisadi və humanitar sahələrdə sıx əməkdaşlıq edir. Rusiyanın subyektləri ilə Azərbaycanın regionlararası əlaqələri səmərəli və dinamik inkişaf yolundadır".

Yazı müəllifi bu il Azərbaycan və Rusiya prezidentlərinin qarşılıqlı olaraq il ərzində 6 dəfə görüşmələrini əsas gətirərək 2018-ci ili ikitərəfli münasibətlərin inkişafı baxımından uğurlu mərhələ sayır: "Bu səfər və görüşlər çərçivəsində ikitərəfli əlaqələrin perspektivləri müzakirə edilib, beynəlxalq və regional məsələlərə dair fikir mübadiləsi aparılıb. Ən əsası səfərlərin hər biri münasibətlərin strateji və dostluq xarakterini, iki ölkənin dost və tərəfdaş olduğunu təsdiqləyib".

Müəllif deyir ki, prezidentlərin rəsmi və işgüzar səfərlərinin müsbət nəticələri siyasi sfera ilə yanaşı beynəlxalq tərəfdaşlıqdan hərbi sahələrə qədər geniş spektri əhatə edir.

Məqalə müəllifinin deməsinə görə, iki ölkə arasında indiyə kimi 200-ə yaxın sənəd imzalanıb, son 5 ildə 50-yə yaxın biznes forumu və işgüzar görüşlər keçirilib, bütün bunlar nəticə etibarilə iqtisadi əlaqələrin inkişafına təkan verib. "Təsadüfi deyil ki, təkcə 2017-ci ildə iki ölkə arasında ticarət dövriyyəsinin həcmi 2,627 milyard dollar olub. Bu il isə ticarət dövriyyəsinin daha çox olacağı gözlənilir. Azərbaycan bazarında təxminən 700 birgə müəssisə fəaliyyət göstərir.

Rusiya-Azərbaycan İşgüzar Şurası təkcə ötən il ümumi dəyəri 450 milyon dollar olan 42 birgə layihəyə dəstək göstərib".

Müəllif deyir ki, Azərbaycan Rusiya ilə çoxşaxəli əməkdaşlıq etsə də ən böyük gözləntisi Dağlıq Qarabağ probleminin ədalətli həllinə yardım göstərməsidir.

Yazı müəllifi deyir ki, buna görə də Dağlıq Qarabağ mövzusunda aparılan danışıqların məzmunu Azərbaycan ictimaiyyətində maraqla izlənilir.

Müəllif deyir ki, prezident İlham Əliyev Rusiyaya rəsmi səfəri zamanı qeyd etdiyi kimi, müzakirə edilən məsələlər arasında Qarabağ problemi mühüm yer tutur və Rusiya münaqişənin nizamlanması ilə məşğul olan ATƏT-in Minsk Qrupunun həmsədri kimi tənzimləmə işində mühüm rol oynayır.

Məqalə müəllifinə görə, Azərbaycan Rusiyanın Cənubi Qafqazda ən mühüm siyasi-iqtisadi tərəfdaşıdır, prezidentlərin il ərzində 6 dəfə görüşməsi bunun təsdiqidir.

Vulkanla "vulkanlıq" etmək istəyənlər

"Trend.az" saytında isə "Xəbərdarlıq: Bəzi yaşayış evləri vulkanlara yaxınlaşır" sərlövhəli məqalə diqqəti cəlb edir.

Müəllif Bakıda bir çox yaşayış məntəqələrinin vulkanların yaxınlığına qədər uzanması problem barədə Azərbaycan Milli Elmlər Akademiyası Coğrafiya İnstitutunun dosenti Elxan Məmmədbəyovla söhbətləşib.

E.Məmmədbəyov deyir ki, Keyrəki, Quşçu, Hökməli, Bozdağ, Qobu və s. vulkanların yaxınlığında yaşayış məntəqələrinin olması isə xüsusilə təhlükəlidir.

AMEA əməkdaşının deməsinə görə, palçıq vulkanizminin inkişaf etdiyi ərazi geosistemlərinin struktur morfogenetik xüsusiyyətləri və onların ətraf ərazi landşaftlarına təsiri araşdırılıb.

Tədqiqatın əsas məqsədinə gəlincə, E.Məmmədbəyov vurğulayır ki, əsas hədəf Böyük Qafqazın cənub-şərq hissəsində palçıq vulkanlarının yayıldığı müxtəlif təbii ərazi komplekslərində aerokosmik metod və müasir kompüter proqramlarının köməyi ilə onların daha mükəmməl üsullarla aşkar edilməsi və irimiqyaslı (1:25000 və 1:100.000) xəritələrin tərtibi olub.

Alimin deməsinə görə, bu məqsədlə ərazinin müxtəlif landşaft tiplərində intensiv fəaliyyətdə olan "Daşgil", "Şahqaya", "Çapılmış", "Çeyildağ", "Torağay", "Axtarma", "Paşalı", "Dəmirçi" və s. kimi palçıq vulkanlarının morfometrik parametrləri öyrənilib və ətraf ərazilərin landşaftlarına təsiri müəyyən olunub.

E.Məmmədbəyov vurğulayır ki, palçıq vulkanlarının insanların həyat və təsərrüfat fəaliyyətinə, eləcə də infrastruktura təsiri məsələləri də araşdırılıb:. "Keyrəki, Quşçu, "Hökməli", Bozdağ, Qobu və s. vulkanların yaxınlığında yaşayış məntəqələrinin olması xüsusilə təhlükəlidir. Bu barədə müvafiq qurumlara mütəxəssislər tərəfindən xəbərdarlıq edilməsinə baxmayaraq, yaşayış evləri vulkanlara yaxınlaşmaqda davam edir".

Azərbaycan yer kürəsində palçıq vulkanlarının unikal və klassik inkişaf regionu kimi tanınır. Yer kürəsində məlum olan 2000-dən artıq palçıq vulkanlarından 344-ü Azərbaycanın şərqində və onunla həmsərhəd Xəzər akvatoriyasında yerləşir. Palçıq vulkanlarının əksəriyyəti Bakı və Abşeron yarımadasında yayılmış və onlardan bəziləri təbiət abidəsi kimi formalaşıb.

2006-cı ildə 23 palçıq vulkanına təbiət abidəsi statusu verilib, həmin vulkanların mühafizəsini təşkil etmək məqsədilə Ekologiya və Təbii Sərvətlər Nazirliyində AMEA mütəxəssislərinin iştirakı ilə "Palçıq vulkanları üzrə Elmi Koordinasiya Şurası yaradılıb.

Toplananların yeri dəyişsə də...

"Azadlıq.info"da "İlham Əliyevin yaratdığı yeni şirkət də vəziyyəti dəyişməcəyək" sərlövhəli məqalə oxumaq olar.

Məqalədə dövlət başçısı İlham Əliyevin sərərncamı ilə yeni yaradılan "Aqrar tədarük və təchizat" ASC-nin fəaliyyəti və bu sahədə əhəmiyyəti barədə kənd təsərrüfatı mütəxəssisi Vahid Məhərrəmlinin düşüncələrinə yer verib.

V.Məhərrəmli deyir ki, yeni qurum "Ərzaq məhsullarının tədarükü və təchizatı" Açıq Səhmdar Cəmiyyətinin bazasında yaradılıb, onun hüquqi varisidir.

Müəllif vurğulayır ki, "Ərzaq məhsullarının tədarükü və təchizatı" ASC-nin məqsədi kənd təsərrüfatı məhsullarının istehsalını və emalını stimullaşdırmaqdan ibarət idi.

Yazi müəllifi bildirir ki, ərzaq məhsullarının mərkəzləşdirilmiş qaydada dövlət büdcəsi vəsaitləri hesabına əsasən dövlət müəssisə və təşkilatları tərəfindən alınması, aqrar sahə məhsullarının ölkə miqyasında tədarükü, daxili və xarici bazarda satış və istehlakının təşkili bu qurumun fəaliyyət istiqamətlərinə aid idi.

Müəllif "Ərzaq məhsullarının tədarükü və təchizatı" ASC-nin bu il üçün təqdim etdiyi məlumatına əsasən deyir: "2018-ci ilin 9 ayının yekunlarına əsasən ASC yerli fermerlərdən ümumi miqdarı 53 min ton, dəyəri 106 milyon manat olan kənd təsərrüfatı məhsulları tədarük edib. Tədarük olunmuş məhsulların 81 milyon manatlıq hissəsi dövlət satınalan təşkilatlarının (uşaq bağçaları, xəstəxanalar, penitensiar sistem, hərbi hissələr və s.) təlabatına yönəldilib, 25 milyon manatlıq məhsul isə xarici ölkələrə ixrac olunub".

Müəllif isə hesab edir ki, 8 milyon ton kənd təsərrüfatı məhsulu istehsal olunduğu halda 9 ay ərzində 53 min ton məhsul tədarük edilməsi yaxşı göstərici sayla bilməz: "Bu mənada "Ərzaq məhsullarının tədarükü və təchizatı" Açıq Səhmdar Cəmiyyəti öz üzərinə düşən vəzifənin öhtəsindən gələ bilməmişdi. Yeni yaradılan səhmdər cəmiyyətin adında edilmiş dəyişiklik də bu sahədə heç nəyi dəyişməyəcək" deyə müəllif bu sahədə müsbət irəliləyiş olmasına inamsız yanaşma sərgiləyir.

Xatırladaq ki, prezident İlham Əliyev dekabrın 14-də "Aqrar tədarük və təchizat" ASC-yaradılması barədə fərman imzalayıb. Yeni ASC "Ərzaq məhsullarının tədarükü və təchizatı" ASC-nin bazasında yaradılıb.

Fərmanda qeyd olunur ki, Cəmiyyət "Ərzaq məhsullarının tədarükü və təchizatı" Açıq Səhmdar Cəmiyyətinin hüquqi varisidir. Onun bütün hüquq və öhdəlikləri, habelə əmlakı "Aqrar tədarük və təchizat" Açıq Səhmdar Cəmiyyətinə keçir.Cəmiyyətin fəaliyyətinə ümumi rəhbərliyi və nəzarəti üç üzvdən ibarət İdarə Heyəti həyata keçirəcək.