Media-icmal 16.03.18

Ölkənin sosial-iqtisadi inkişafı, hakimiyyətin Azərbaycan Xalq Cümhuriyyətinə münasibətinə baxış, kollektorların özbaşınalığı bugünki (16 mart 2018-ci il) medianın aparıcı mövzularındandır...

Şəhərlərə çevrilən qəsəbələr siyasəti

"Azərbaycan" qəzeti "Kəndlərimiz qəsəbəyə, qəsəbələrimiz şəhərə çevrilir" sərlövhəli məqalədə ölkənin sosial-iqtisadi inkişafını dəyərləndirir.

Müəllif deyir ki, Azərbaycanın sürətli sosial-iqtisadi inkişafı hər bir vətəndaşın, o cümlədən qaçqın və məcburi köçkünlərin maddi rifah halının günbəgün yaxşılaşmasına təkan verir.

Yazı müəllifi deyir ki, sosial müdafiəyə ən çox ehtiyacı olanlar qaçqın və məcburi köçkünlər olduğundan dövlət ilk növbədə onların sosial ehtiyaclarını ödəmək üçün bütün imkanlardan istifadə edir.

Müəllif xatırladır ki, bu mqəsədlə 2003-2017-ci illərdə dövlət başçısı tərəfindən 55 fərman və sərəncam imzalanıb: "Məcburi köçkünlərin mənzil problemlərinin həlli ilə bağlı indiyədək 3,2 milyon kvadratmetr yaşayış sahəsi olan 97 qəsəbə və çoxmərtəbəli binalardan ibarət yaşayış kompleksləri tikilib. 50 mindən çox ailə və ya 250 mindən çox qaçqın və məcburi köçkünün mənzil şəraiti yaxşılaşdırılıb. Bütün bunlar üçün 2,3 milyard manat vəsaitdən istifadə olunub, üstəlik, soydaşlarımızın sosial problemlərinin həlli üçün 6,6 milyard manat vəsait xərclənib".

Yazı müəllifi bu sahədə 2017-ci ildə də xeyli işlər görüldüyünü deyərək bildirir ki, ötən il 2300 ailə yeni evlərə, mənzillərə köçürülüb, beləliklə, 12 mindən çox köçkün yeni evlərlə, mənzillərlə təmin edilib.

Müəllif deyir ki, 2018-ci ildə ən azı 20 min köçkün yeni evlərə, mənzillərə köçürülməlidir.

Son 14 ildə məcburi köçkünlərin məşğulluq problemlərinin də diqqət mərkəzində olduğunu deyən müəllif bu məqsədlə Məcburi Köçkünlərin Sosial İnkişaf Fondu tərəfindən 24 min nəfərə 14,8 milyon manat mikrokredit verildiyini bildirir.

Müəllif deyir ki, daha 2 min nəfər köçkün Sahibkarlığa Kömək Milli Fondundan 40 milyon manat güzəştli kredit alıb və onların əksəriyyəti kənd təsərrüfatı sahələrini əhatə edib, 200 min məcburi köçkün büdcə təşkilatlarında işlə təmin olunub, köçkünlər arasında yoxsulluğun həddi son 14 ildə 75 faizdən 12 faizədək azalıb.

Yazı müəllifi vurğulayır ki, həyata keçirilən sosial-iqtisadi siyasət nəticəsində kəndlər qəsəbələrə, qəsəblər isə şəhərlərə dönməkdədir.

Onlar da bu günümüzlə qüurur duyardılarmı?

"Azadlıq.info"da isə "Cümhuriyyət qurucuları ölkənin bugünki inkişafını görsəydilər..." sərlövhəli məqalə diqqət cəlb edir.

Müəllif mövcud iqtidarın bu il 100 illik yubileyi olacaq Azərbaycan Xalq Cümhuriyyətinə (AXC) və onun dəyərlərinə münasibətdə qeryi-səmimiliyini müzakirəyə çıxarır: "Nə yazıq ki, bu tarix YAP hakimiyyətinin vaxtına düşdü. Cümhuriyyət dəyərlərindən uzaq adamlar bu tarixi yubileylə bağlı yazırlar, danışırlar, ancaq cümhuriyyətçi babalarımıza ürəklərindəki nifrəti də zaman-zaman üzə çıxarırlar".

Müəllif xatırladır ki, mövcud hakimiyyət yeri düşdükcə cümhuriyyətçiləri torpaq satmaqda ittiham edir, işlərinə yaradıqda isə hərdən onlarla qürur duymağı da kənara qoymur.

Bu mənada müəllif martın 15-də Bakıda öz işinə başlamış VI Bakı Qlobal Forumunda prezident İlham Əliyevin çıxışından sitat gətirir: "İki aydan sonra - mayda Azərbaycan Demokratik Respublikasının 100 illiyi qeyd olunacaq. Biz bundan qürur hissi keçiririk. Onlar müsəlman aləmində ilk demokratik respublika qurdular, bununla fəxr edirik".
Müəllif deyir ki, hər bir dövlətin tarixində Respublika Günü və Müstəqillik Günü kimi qürur duyulası günlər var, amma Azərbaycanda bunun heç biri mövcud YAP hakimiyyətinə bağlı deyil.

Müəllifə görə, YAP adına bağlı olmayan belə günlər iqtidarın ən ağrılı yeridir: "Dünyanın elə bir ölkəsi yoxdur ki, orada dövlətin Müstəqillik Günü bayram kimi qeyd olunmasın, Azərbaycandan başqa. YAP hakimiyyəti Müstəqillik Gününü rəsmi bayramlar sırasından çıxarıb, əvəzində girdirmə günlərə rəsmi bayram günü statusu verib".

Yazı müəllifi deyir ki, YAP hakimiyyəti Məhəmməd Əmin Rəsulzadə adı gələndə narahat olur, məqam düşən kimi min cür şər-böhtan atır, adının çəkilməsini, xatirəsinin yaşadılmasını istəmir.

Müəllif mövcud iqtidarın Azərbaycanın müstəqilliyini qoruyub saxlaması haqda dediyinin də əsassız olduğunu, müstəqilliyi yox, hakimiyyəti qoruduqlarını söyləyir: "Hakimiyyəti qorumaqdan ötrü bütün var-yatır yad ciblərə axıdılır. Müstəqillik uğrunda mübarizə aparanlar, yarımcan olanlar hansı durumdadır, fərqindəsinizmi?"

Müəllif deyir ki, hakimiyyət vətəndaşı elə duruma salıb ki, hamı ölkədən qaçmaq istəyir və hakimiyyətin qoruyub saxladığı "müstəqillik" bundan ibarətdir.

Yazı müəllifi indiki iqtidarın AXC ideallarına da sadiq olamdığını deyir və

insan haqlarının durumuna, siyasi məhbusların sayına, iqtisadi azadlıqlara, rüşvət, korrupsiyanın səviyyəsinə görə, daimi beynəlxalq tənqidlər bunun nəticəsidir.

Ölkədə keçirilən seçkilərə gəlincə isə, müəllif deyir ki, qurucu babalar indi keçirilən seçkiləri görsələr, hansı hisslər keçirəcəklərini təsəvvür etmək çətin deyil və belə Azərbaycanla heç vaxt qürur duya bilməzdilər.

Davam edən kollektor özbaşınalığı

"Novoye Vremya" qəzetində isə "Pullarımızı qaytarın! - Kollektorlar bütün hədd-hüdudları aşırlar" sərlövhəli məqalə diqqət cəlb edir.

Müəllif banklara olan borclara görə vətəndaşlara qarşı kollektorların qanunsuz davranışlarını gündəmə daşıyır.

Müəllif deyir ki, 2018-ci ildə faktiki kollektorların fəaliyyətinə son qoyulamlı idi, belə ki, bankların müştərilər barədə kollektorlara məlumat vermələri qanunla qadağan edilib, vəkillik haqqında qanundakı dəyişkliklərə görə, artıq kollektorlar nümayəndə olaraq bankları məhkəmələrdə təmsil edə bilməzlər və bu qanunlar bu il yanvarın 1-dən qüvvəyə minib.

Müəllif deyir ki, məsələ heç də qanunda yazılan qədər asan deyilmiş: "Bu bəyanatlar fonunda ölkədə ən iri kollektorlardan biri "Baku Collecting Agency" fəaliyyətini davam etdirmək göstəricisi olan əməkdaş cəlb etməyə başlayıb. Həm də, unutmaq olmaz ki, bu beş-altı kollektorun təzyiqləri nəticəsində bank müştəriləri intiharlara məcbur olurdu".

Yazı müəllifi deyir ki, banklar bu kollektorlardan heç də məhkəmələrdə nümayəndələri kimi yox, banka borcu olan müşətirlərə təzyiq mexanizmi kimi istifadə edirlər.

Müəllif xatırladır ki, kollektor olaraq çalışanların əksəriyyəti vaxtilə hüquq-mühafizə orqanlarında işləmiş şəxslərdir, bu qurumlarla yaxşı əlaqələri var, odur ki, onları elə də asanlıqla susdurmaq mümkün deyil.

Üstəlik, artıq məhkəmə prosesində nümayəndə iştirak edə bilmədiyi üçün faktiki müştərilər müdafiəsiz qalırlar: "Nəticədə kollektorlar borcları ən ağıla gəlməyən üsullarla belə borclulardan almaq istəyirlər. Özlərini dövlət institutu kimi təqdim edir, prezident fərmanı ilə yaradıldıqları üçün məhkəmə və məhkəmə icraçılarından səlahiyyətli sayırlar".

Müəllif deyir ki, ekspert Əkrəm Həsənov belə hallarla bağlı faktlar olduğunu və onların Ədliyyə Nazirliyinə təqdim ediləcəyini bidlirib: "Bankların kollektorlardan istifadə etməsi qanunsuzdur, çünki, məhkəmələrdə nümayəndənin qurumu təmsil etməsi qanunla qadağan edilib. Amma banklar bunu "könə iş" kimi qələmə verərək təzyiq mexanizmi kimi isitfadə edirlər", deyə ekspert bildirib.

Müəllif deyir ki, kollektorların özbaşınalığı vətəndaşların passivliyindən yaranır, belə ki, onlar öz hüquqlarını qorumaqda fəallıq göstərmirlər.

Kollektorların fəaliyyətini qanunsuz adlandıran müəllif bank müştərilərini onların çağırışlarına cavab verməməyə çağırır, bu kollektorların fəaliyyəti qanunsuz olduğu üçün onların hər hansı tələbini də qanunsuzluq və vətəndaşın qanunla qorunan hüquqlarına münasibətdə özbaşınalıq adlandırır.