Media-icmal 18.03.19

Əfv fərmanına baxış, Novruz bayramı öncəsi satış nöqtələrində qiymət bahalığı və s. məsələlər bugünkü (18 mart, 2019-cu il) medianın aparıcı mövzularındandır.

Bayram sevinci yaşadan əfv fərmanı...

"Modern.az" da isə "Bağışlamaq böyüklükdür!" - Deputatlar prezidentin əfv sərəncamını dəyərləndirirlər" sərlövhəli məqalədə bəzi deputatlar dövlət başçısının 2019-cu il martın 16-da imzaladığı və artıq həyata keçirilmiş əfv fərmanını dəyərləndirirlər.

Milli Məclisin komitə sədri Eldar İbrahimov bu əfv fərmanını çox yüksək qiymətləndirdiyini deyir: "Biz artıq bir neçə ildir ki, cənab prezident tərəfindən əhalinin bu cür sevindirməsinin şahidi oluruq. Gunahı olanın günahı bağışlanır. Bunu mən ölkə başçısının böyüklüyü hesab edirəm".

Deputat Çingiz Qənizadə sərəncamı alqışladığını deyərək, bunu prezidentin saysız-hesabsız hümanist addımlarından biri hesab edir.

Ç.Qənizadəyə görə, budəfəki əfv sərəncamı həm kəmiyyət, həm də keyfiyyətcə əvvəlkilərdən xeyli fərqlənir.

Deputatın deməsinə görə, Azərbaycanla Avropa Şurası arasında müəyyən problemli məhbuslar anlayışı deyilən ziddiyyətli siyahı mövcüd olub, bəzi hüquq müdafiəçiləri də müəyyən təşəbbüslər göstəriblər ki, bu məsələ öz həllini tapsın.

Deputatın iddiasına görə, bəzi hüquq müdafiəçiləri də var ki, şişirdilmiş siyahılar hazırlayırdılar: "Normal fəaliyyət göstərən, bu məsələlərin həll edilməsində maraqlı olan hüquq müdafiəçilərin müraciəti cənab prezident tərəfindən nəzərə alınıb. Bu məsələ müzakirə olunub və sonda xeyli məhkum əfv sərəncamının təsiri altına düşüb".

Ç.Qənizadə əfv fərmanına görə prezident İlham Əliyevə təşəkkür etdiyini bildirib.

"Bağışlamaq böyüklükdür. Bağışlamaq çox yüksək insani keyfiyyətdir ki, onu da Allah hər bir bəndəsinə deyil, sevimli və böyük bəndələrinə bəxş edir. Çünki Allah özü də bağışlayandır". Bunu isə əfv fərmanı barədə deputat Elçin Quliyev bildirib.

E.Quliyev hesab edir ki, dövlət başçısının müqəddəs Novruz bayramı ərəfəsində əfv fərmanı imzalaması xalqa ən yaxşı bayram hədiyyəsidir, bu, yüzlərlə ailəyə sevinc payı bəxş edən bir hədiyyədir.

Məni ona görə həbs etdilər ki...

"Azadıqinfo.az"da isə "Mübarizə əzmim əvvəlkindən də artıqdır" sərlövhəli məqalə diqqəti çəkir.

Sayt dövlət başçısının martın 16-da imzaladığı əfv fərmanı ilə azadlığa çıxan keçmiş müstəntiq Rüfət Səfərlinin düşüncələrinə yer verib.

R.Səfərov həbsinə səbəb kimi bəzi həqiqətləri söyləməsini (2015-ci il dekabrın 20-də prokurorluq sistemindən istefa verməsilə bağlı siyasi bəyanatını nəzərdə tutur -red.) göstərir.

R.Səfərov üçillik həbs həyatı yaşamasını özünün və ailəsinin ömründən 3 il açıq surətdə talanması adlandırır: "Bəli, bu hakimiyyət təkcə xalqın mal-dövlətini, neftini-qazını, təbiətini-meşəsini, suyunu-dənizini, təhsilini-mədəniyyətini, qələmini-sözünü, seçimini-səsini deyil, həm də ömrünü-gününü soyur. Bunlar azərbaycanlıların ömür soyğunçularıdır. Yalan üzərində bina edilmiş rejim dürüst sözdən necə qorxurmuş, dostlar.

Keçmiş müstəntiq deyir ki, vəhşicəsinə işgəncələrə məruz qoyulub və son məqsədləri sındırıb qazanmaq istəyi idi, lakin faydalı xassələr qazandırdılar.

"Əvvəl hansı bünövrə prinsipləri rəhbər tutub yaşayırdımsa, eynisi varlığıma hakimdir. Azadlıqda ikən iradə, əzm və səbatın nə demək olduğunu ədəbi mətnlərdən öyrənirdimsə, məhbəsdə gerçək həyatdan fəhm etmək imkanım oldu".

R.Səfərov bildirib ki, səhhəti normal, psixologiyası qaydasında, ədalətsizliyə qarşı mübarizə əzmi isə əvvəlkindən də artıq, fikirləri qəti, mövcud idarəçilik barədə təsəvvürləri apaydındlr.

Həbsdə keçirdiyi müddətdə rejimin mövcudluğunu dərisində duymaqla avtoritarizmin cövhərini tam anladığını deyən hüquqşünas bu anlayışı gələcək uğurlarının əsas rəhni sayır, hüquq və vətəndaşa söykənən dövlət-cəmiyyətin qurulacağına inandığını bəyan edir: "Təbii, bu inamı təkbaşına qazanmadım. Həbs dövründə sayğıdəyər dostlardan aldığım fasiləsiz dəstək mübarizəyə və onun uğurlu nəticələrinə dair dərin inam hissinə stimul oldu", - müəllif bildirir.

Son olaraq müəllif bu həbs müddəti dövründə onu, ailəsini tək qoymayan insanlara, eləcə də informasiya dəstəyi verən azad media mənsublarına təşəkkürünü bildirir.

Xatırladaq ki, 2019-cu il martın 16-da dövlət başçısı əfv fərmanı imzalayıb. Həmin fərman 431 nəfər məhbusa şamil edilib, onlardan 399 nəfəri azadıığa çıxıb.

Azadlığa çıxanların arasında bir sıra hüquq müdafiəçlərinin və müxalif qüvvələrin siyasi məhbus adlandırdığı 40-dan çox şəxs var. Zərdab Rayon Prokurorluğunun keçmiş müstəntiqi R.Səfərov onlardan biridir. R.Səfərov 2015-ci ilin dekabrında prokurorluq sistemindəkı vəziyyətlə bağlı bəyanat yaydı. Bundan sonra ona qarşı cinayət işi açıldı, 2016-cı ilin sentyabrında Lənkərəan Ağır Ciayətlər Məhkəməsinin qərarı ilə 9 il azadlqıdan məhrum edildi. Hüquq müdafiəçiləri və beynəlxalq hüquq- müdafiə təşkilatları onu siyasi məhbus saydılar. Azərbaycan hakimiyyəti isə ölkədə siyasi məhbus olmadığını bildirir, bu insanların cinayət əməllərinə görə cəzalandırıldıqlarını bildirir.

"Eyni bahalıq, eyni məhsullar və eyni satıcılar"-alıcı şikayəti

"Bizimyol-info"az da isə "Qiymətlər ötən ilə nisbətən daha yüksəkdir": Bayram bazarlığı " sərlövhəli məqalə oxumaq olar.

Müəllif Novruz bayramı ərəfəsi məhsulların qiymətlərinin öyənilməsi üçün paytaxtın ayrı-ayrı satış nöqtələrində alıcı və satıçılarla söhbətləşir.

Yazı müəllifinin deməsinə görə, bəzi alıcılar bayram bazarlığını Bakının Nəsimi rayonunda yerləşən "Təzə bazar"dan ediblər və ötən illə müqayisədə qiymətlər nisbətən baha olsa da digər satış mərkəzlərindın ucuz başa gəlib.

Müəllif deyir ki, "Təzə bazar"da satıcılar bahalığı satış nöqtələrinin icarə haqqının bahalaşması ilə əlaqələndirdilər, bəzi satıcıların sözlərinə görə, mart ayında alış-veriş çox olduğuna görə icarə haqqı digər aylara nisbətən yüksək qoyulub:"Yeni il ərəfəsində və Novruz bayramı ərəfəsində yerin icarə qiyməti qaldırılır bu səbəbdən də bu qiymətlərə təsirsiz ötüşmür. Bu ay da yerhaqqı artıb, ona görə də satdığımız məhsulun üzərinə nisbətən daha çox qoymalı oluruq.

Lakin alıcılarımız da çox olur, məcburiyyətdən alırlar, çünki başqa yerlərdə də qiymətlər bahadır".

Alıcılara gəlincə, müəllif deyir ki, onlar qiymətin bahalığından şikayət edirlər: "Ötən il şabalıdı 6 manata alırdıq, ən pis halda 7 manata alırdıq, bu il isə ən yaxşı halda şabalıdı 8 manata alırıq. Eyni zamanda qoz və fındıq ləpəsinin də qiymətində artım var. Əvvəl 10-12 manata alırdıqsa bu il qiymət 13 manatdan başlayır".

Müəllifin deməsinə görə, bəzi alıcılar Bakı şəhərinin bir neçə yerində təşkil edilən yarmarkalarda da qiymətlərin digər yerlərdən baha olduğunu bildiriblər.

"Bayram yarmarkalarında da qiymətlər bahadı. Ələlxüsus da meyvə- tərəvəzlər. Bu səbəbdən meyvələri, xüsusilə də yerli meyvələri Səməd Vurğun bağının yaxınlığında yerləşən satış nöqtələrindən alırıq".

Müəllif "Nizami" metrostansiyasının qarşısında qurulan yarmarkadakı qiymətlər barədə deyir ki, qoz ləpəsi 13-18, təmizlənməmiş fındıq ləpəsi 13 manat, təmizlənmiş və qovrulmuş 15 manat, ərik qurusu 13 manat, sarı kişmiş 7, qara kişmiş isə 9-10 manat civarında idi.

Müəllifin deməsinə görə, yarmarkaya yaxın ərazidə fərdi satışla məşğul olan qadın isə qoz ləpəsini 11 manata, şabalıdı 8 manata, təmizlənmiş və qovrulmuş fındıq ləpəsini 13 manata, ərik qurusunu isə 10 manata satırdı.

Müəllif deyir ki, Xəzər rayonu Şüvəlan qəsəbəsindəki yarmarkada da alıcılar qiymətlərin çox baha olduğunu deyir, səbəb kimi isə ərazidə fəaliyyət göstərən satıcıların məhsullarını yarmarkada satmasını göstərir. Mahiyyət etibarilə heç nə dəyişməyib, eyni bahalıq, eyni məhsullar və eyni satıcılar".