Media-icmal 19.07.17

Ölkədə qeyri-neft sektorunun inkişafı, benzinin bahalaşması, məmur özbaşınalığı və bundan çıxış yolları bugünki (19 iyul, 2017-cil) medianın aparıcı mövzularındandır...

Bölgələrin inkişaf düsturu - sənaye parkları və zonaları

"Azərbaycan" qəzetində "Qeyri-neft sektorunun inkişafı üçün qəbul edilən dövlət proqramları uğurla icra olunur" sərlövhəli məqalədə müəllif ölkədə sənaye parkları (http://www.azerbaijan-news.az/index.php?mod=3&id=126460) və zonalarının inkişafı barədə danışır.

Müəllif milli iqtisadiyyatın neft amilindən asılılığını azaltmaq üçün ölkədə qeyri-neft sektorunun və eləcə də regionların inkişafını təmin edən dövlət proqramlarının xüsusi yeri olduğunu vurğulayır.

Məqalədə deyilir ki, regionların sosial-iqtisadi inkişaf siyasətinin başlıca məqsədlərindən biri də ixracyönümlü məhsul istehsalının artırılmasıdır və bu yöndə uğurlu təşviq mexanizmləri kimi sənaye parkları və zonalarının səmərəsinin çox olduğu bildirilir: "Sumqayıt Kimya Sənaye Parkındakı "Azertexnolayn" zavodunda təxminən 750 nəfər işlə təmin edilib, daha 4 müəssisə cari ildə, 3 müəssisə gələn il fəaliyyətə başlayacaq və həmin müəssisələrdə 800-ə yaxın yeni iş yeri açılacaq. Onu da bildirək ki, burada istehsal edilən məhsulun 56 faizi ixrac olunur".

Müəllif deyir ki, Mingəçevir Sənaye Parkında isə yüngül sənaye, o cümlədən tekstil, ayaqqabı, tibbi kosmetika, ipək və digər növ məhsul istehsalı üzrə yerli xammal bazası əsasında 9 fabrik fəaliyyət göstərəcək. Reallaşmasına 150-200 milyon dollar investisiya tələb edilən bu layihə başa çatdıqdan sonra orada 5500-dək yeni iş yerinin açılması gözlənilir.

Yazıda bölgələrin sosial-iqtisadi inkişafında sənaye zonalarının da mühüm rol oynadığı və belə zonalardan birinin Neftçalada yaradıldığı bildirilir. Burada Azərbaycan İnvestisiya Şirkəti tərəfindən infrastrukturun yaradılması başa çatdırılıb və burada çalışmaq istəyən 7 iştirakçı qeydiyyatdan keçib.

Müəllif deyir ki, cari ildə burada avtomobil, kənd təsərrüfatı qurğuları, polietilen boru, modul tipli məktəb binaları, balıq yemi və digər istehsal müəssisələri fəaliyyətə başlayacaq.

Yazı müəllifi regionlarda yaradılan müəssisələrin yerli xammaldan istifadəsinə xüsusi önəm verildiyini, bu cəhətin həm də iqtisadiyyatın bir neçə sahəsinin inkişafına təkan verdiyini deyir.

Müəllif deyir ki, ölkə iqtisadiyyatının hərtərəfli inkişafı üçün "Milli iqtisadiyyat və iqtisadiyyatın əsas sektorları üzrə strateji yol xəritələri"ndə nəzərdə tutulan qeyri-neft sektorunun inkişafı ilə bağlı fəaliyyətlər reallaşdırılmalıdır.

Müəllif hesab edir ki, bu sənəddə nəzərdə tutulan vəzifələr icra edildiyi halda bir tərəfdən ölkə iqtisadiyyatı mənfi təsirlərdən qorunacaq, digər tərəfdən isə əhalinin sosial rifah halı yaxşılaşacaq.

Bu bahalaşma büdcə üçündür

"Exo" qəzeti "Benzinin qiymətinin bahalaşması Azərbaycanın hər bir vətəndaşının həyatında əksini tapacaq" (http://ru.echo.az/?p=60995) sərlövhəli məqalədə Aİ-92 markalı benzinin bahalaşmasını ekspert Nəriman Ağayevlə müzakirə edir.

"Aİ-92 markalı benzinin bahalaşması əsasən avtomobil sahibi olan vətəndaşların xərclərinə təsir edəcək, indi xərc strukturu dəyişir. Benzinə olan xərclər artır, gəlirdən xərclərə ayrılan hissə çoxalır. Elə buna görə də başqa sahələrə, o cümlədən ərzağa ayrılan vəsait həcmi azaldılacaq. Nəticə etibarilə tariflərin bahalaşması hər bir vətəndaşa təsir göstərəcək". N.Ağayev qiymət bahalaşması ilə bağlı vətəndaşın xərc strukturunu qəzetə belə şərh edir.

İyulun 15-də Tarif Şurasının qərarı ilə Aİ-92 markalı benzinin satış qiymətinin 70 qəpikdən 90 qəpiyə qaldırıldığını deyən ekspert hesab edir ki, benzinin qiymətinin bahalaşması ərzağın bahalaşmasına təsir etməyəcək, belə ki, yükdaşıma nəqliyyatı dizel yanacağından istifadə edir, burada hələ ki, qiymət sabitdir və bahalaşma yoxdur.

"İctimai nəqliyyat da dizel yanacağından istifadə edir, amma taksi sistemində gediş haqları arta bilər, çünki, kiçik mağazalarda malları daşımaq üçün ya şəxsi avtomobillərdən istifadə edilir, ya da kənardan avtomobil cəlb olunur. Yəqin ki, belə yerlərdə qiymət bahalaşması olacaq". N.Ağayev durumu qəzetə belə şərh edir.

Ekspert SOCAR rəsmisi Davud Məmmədovun bu bahalaşmanın neft emalı sahəsinin modernləşdirilməsinə müsbət təsir edəcəyi haqda dediklərini də birmənalı qəbul etmir.

N.Ağayevə görə, SOCAR-a əlavə vəsaitlər lazım idisə, daha çox istiqraz buraxa bilərdi və bunun üçün müsbət təcrübə də var.

Ekspert deyir ki, benzinin bahalaşması büdcəni tamamlamaq və nəticə olaraq sosial problemləri həll etmək məqsədi güdür: "Ola bilər ki, gələn ilin əvvəlində əmək haqlarının və pensiyaların cüzi artımı da baş versin".

Məmur özbaşınalığına son - şəffaf idarəçilik

"Yeni Müsavat" qəzetində isə diqqəti "Məmurlar nə vaxt haqq yoluna qayıdacaq?"(http://musavat.com/author-news/memurlar-ne-vaxt-haqq-yoluna-qayidacaq_454659.html) sərlövhəli məqalə cəlb edir.

Müəllif yazısında məmur talançılığı haqda danışır və buna son qoyacaq yolları axtarır.

Məqalədə onlarla dövlət məmurunun işdən azad edildiyi, həbs olunduğu, bununla belə, bu özbaşınalığa son qoyulmadığı vurğulanır.

Müəllif deyir ki, bütün problemlərin bir həll yolu var və elə bu problemin də - məmur özbaşınalıqlarının da həll yolu daha çox şəffaf dövlət və hökumət qurmaqdan keçir.

Müəllifin fikrincə, bu məsələdə hökumətin ən böyük qüsuru nəzarəti cəmiyyətlə bölüşmək istəməməsidir. "Birdəfəlik qəbul etmək lazımdır ki, media, jurnalistlər, cəmiyyət, onun ayrı-ayrı struktur vahidləri heç də düşmən deyil, onlar bu ölkəyə və onun hakimiyyətinə yalnız və yalnız yaxşılıq arzulayır".

Yazıda sağlam mühitə yolun tənqiddən keçdiyi vurğulanır və bu mənada Avropa dövlətlərinin keçdiyi yol böyük nümunə kimi göstərilir. Odur ki, bu yolu təkrar olaraq yenidən keçməyin mənasız olduğu vurğulanır.

Müəllif deyir ki, tövsiyə və tənqidlərə azca diqqət edilsə, ölkədə həyat yüngülləşər, hökumət və dövlət daha şəffaf olar, məmurlar da özlərini yığışdırarlar.

Məqalə müəllifi korrupsiya və məmur özbaşınalığını milli təhlükəsizliyə çox böyük təhdid adlandırır, korrupsioner məmurlar üçün müqəddəs heç nə olmadığını, sadəcə, hər şeyin qiyməti olduğunu, lazım gələrsə, hətta mühüm dövlət sirlərini də sata biləəcklərini söyləyir.

Yazı müəllifi deyir ki, korrupsiya və məmur özbaşınalığı həm də dövlətin və cəmiyyətin özülünü sarsıdır, idarəçiliyin effektini azaldır, strateji hədəflərin yolunda böyük bir maneə olur.

Müəllif indiki müharibə şəraitində yaşayan dövlət üçün korrupsioner məmuru düşmən desantı ilə müqayisə edir.