Media-icmal 19.11.20

Erməni işğalında qalmış torpaqların azadlığı uğrunda 44 gün davam etmiş (27 sentyabr-10 noyabr 2020-ci il) müharibə Azərbyacan mediasının aparıcı mövzusu kimi qalmaqda davam edir və müxtəlif baxış bucaqlarından təhil olunur...

"Azərbaycan" qəzeti  "Dövlətçilik tariximizin ən şərəfli zəfəri" sərlövhəli məqalədə müəllif erməni işğalında qalmış torpaqların azadlığı uğrunda 44 gün davam etmiş müharibəni dəyərləndirir.

Müəllif deyir ki, cəmi 44 gün ərzində işğal altında olan ərazilərin böyük qismi azad olundu, 27 il davam etmiş işğala son qoyuldu, 300-ə yaxın kənd, 5 şəhər, 4 qəsəbə, çoxsaylı strateji yüksəkliklər fəth edildi. 

O əlavə edir ki, ermənilərin Dağlıq Qarabağda respublika yaratmaq iddialarına tamamilə son qoyuldu, bütün şərtləri qalib Azərbaycan tərəf diktə edir.

Müəllifin fikrincə, bu müharibə dünyada yaradılmış "məzlum erməni xalqı" obrazını alt-üst etdi, ermənilərlə bağlı yaranmış stereotipləri, demək olar ki, kökündən dəyişdi: "...Fransa istisna olmaqla, dünyanın heç bir dövləti açıq şəkildə Ermənistanı müdafiə etmədi. Beləliklə, Ermənistan siyasi baxımdan beynəlxalq ictimaiyyətdən dəstək almadı və bütün bunların fonunda beynəlxalq ictimaiyyət işğalçının məhz Ermənistan olduğunu gördü", deyə müəllif bildirir.

Müəllif vurğulayır ki, bu müharibənin Ermənistana vurduğu iqtisadi zərbənin təsiri də ölçüyəgəlməzdir, milyardlarla dollar ziyanın yerini doldurmağa bu vəziyyətdə onilliklər də bəs etməyəcək, bu baxımdan sosial sferada Ermənistanda vəziyyət daha da kəskinləşəcək.

Müəllif bildirir ki, Azərbaycan işğal faktı, Azərbaycana dəyən zərərə görə

Ermənistana qarşı beynəlxalq məhkəmələrdə təzminat iddiası qaldıracaq. 

"Bizimyol.info.az" saytı "Ermənistanın Azərbaycana vurduğu zərərin məbləği 1.3 trilyon dollara yaxın ola bilər - ekspert" sərlövhəli məqalədə bu zərərdən bəhs edilir.

İqtisadçı-ekspert Eldəniz Əmirovun sözlərinə görə, bir neçə il əvvəlki hesablamalarda işğal amili ilə bağlı Ermənistanın Azərbaycana vurduğu ümumi zərərin məbləği 820 milyard dollar göstərilirdi.

Amma ekspert əlavə edir ki, yeni tətbiq ediləcək hesablama metodologiyasına əsasən isə bu zərərin 1,2-1.3 trilyon dollara yaxın bir məbləğ olacağını düşünür.

Ekspertin sözlərinə görə, dağıdılmış ərazilər arasında Füzuli rayonunun işğal altında qalmış 51 kəndi və rayon mərkəzi olub.

E.Əmirov bildirib ki, hazırda bu ərazilərə dəymiş zərərin hesablanması üçün ərazidə qiymətləndirmə işləri aparılır, dəyən yekun ziyan dəyəri qiymətləndirmə başa çatdıqdan sonra açıqlanacaq.

İqtisadçının fikrincə, ilkin hesablama metodlarından istifadə edərək, demək olar ki, hər bir rayonun infrastrukturuna təxminən 6-8 milyard dollar məbləğində zərər vurulub. Onun sözlərinə görə, bu işlərin görülməsi üçün təxminən 50 milyarda qədər vəsait, 7 ildən 10 ilə qədər vaxt lazım olacaq.

Ekspert yada salır ki, Azərbaycanın işğal qltında qalmış rayonlarına dəymiş ziyanın hesablanması üçün artıq işçi qrupları yaradılıb, dəymiş zərərin mümkün qədər dəqiq qiymətləndirilməsi üçün xüsusi metodologiya və riyazi modellərin tətbiqi mütləqdir.

"Redaktor.az" saytı isə "Rusiyapərəst qüvvələr niyə narahatdır? Türk ordusu gəlir" sərlövhəli məqalədə Türkiyə Silahlı Qüvvələrinin sülhməramlı missiyada iştirakını politoloq Ramil Məmmədli ilə dəyərləndirir. 

Politoloq vurğulayır ki, hazırki məqamda Türkiyənin bu missiyada iştirakı Azərbyacan üçün olduqca zəruri və vacibdir.

Rusiyapərəst qüvvələrin bundan narahat olduqlarına toxunan politoloq deyir ki, bu qüvvələr də anlamalıdır ki, Azərbaycan və Türkiyə bu məsələdə heç bir güzəştə getməyəcək.

Politoloq əlavə edir ki, bölgədə sülhün bərqərar və Azərbaycanın ərazi bütövlüyünün təmin olunması üçün türk hərbi birləşmələrinin orada olması artıq zərurətə çevrilib.

Politoloq vurğulayır ki, Azərbaycan 44 günlük müharibənin qalib tərəfidir, yalnız Rusiyanın xahişini nəzərə alaraq hərbi əməliyyatları dayandırıb, əks halda hərbi əməliyyatlar davam edərdi və digər torpaqlar da hərbi yolla işğaldan azad edilərdi: "Bundan sonra isə Azərbaycan tamamilə fərqli formada danışıqlar masasında əyləşərdi. Azərbaycan ermənilərə və Rusiyaya şans verdi ki, bu məsələdə ədalətli mövqe nümayiş etdirsinlər", deyə o bildirir.

"Azpolitika.info" saytı isə "Putinin çıxışında təhlükəli məqamlar da az deyil – ekspertin şərhi" sərlövhəli məqalədə Rusiya prezidenti Vladimir Putinin bu günlərdə "Rossiya-24" telekanalına müsahibəsini tanınmış iqtisadçı alim Qubad İbadoğlu ilə dəyərləndirir

Müəllif vurğulayır ki, V.Putin Dağlıq Qarabağın Azərbaycana aid ərazi olduğunu bildirir, eyni zamanda bu bölgənin status məsələsinin günün aktual problemi olmadığını da nəzərə çatdırır və Ermənistana noyabrın 10-da imzalanmış bəyanatın tələblərinə əməl etməyi xatırladır, bunun əksinin Ermənistan üçün intihar ola biləcəyini vurğulayır.  

Azərbaycan Demokratiya və Rifah (ADR) Hərəkatının rəhbəri Qubad İbadoğlu V.Putinin Qarabağ probleminin yaranmasına səbəb kimi SSRİ-nin zəifləməsini göstərməsini bu şəxsin SSRİ-nin bərpasında hələ də maraqlı olması kimi dəyərləndirir.

Onun fikrincə, V.Putin rus qoşunlarının hazırkı fəaliyyətinə görə, istər Azərbaycan, istərsə də Ermənistanda etimadını itirmək istəmir, əksinə rəğbət qazanmaq istəyir.

Q.İbadoğlu deyir ki, PF prezidenti Qarabağı Kremldən idarə etmək istədiyini gizlətmir, odur ki, bu ərazini nə Azərbaycana, nə də Ermənistana veirir, üstəlik Gürcüstan təcrübəsini göstərərək hər iki tərəfi təhdid də edir.