Media-icmal 20.04.21

Əlillik dərəcəsi alınmasındakı problemlər, miqrant amili təzyiq dəstəyi kimi, Moskva bu məğlubiyyəti niyə həzm edə bilmir, sülhməramlıların missiyasının mandatlaşması və s. məsələlər medianın aparıcı mövzuları sırasındadır...

“Yeniavaz.com” saytında “9 ildir ikinci qrup əlilliyi olan vətəndaşın müavinəti kəsilib – “gedib, soruşuram, deyirlər araşdırma gedir”” sərlövhəli məqalədə bəzi vətəndaşların əlillik dərəcələrilə bağlı problemlər yaşadıqları müzakirə edilir.  

Müəllif deyir ki, Bakının Biləcəri qəsəbə sakini Elxan Əliyev II qrup əlillik müavinəti alır. 2012-ci ildə infarkt keçirib, daha sonra həmin müddət ərzində şəkər xəstəliyinə tutulub, iki il öncə isə onurğa sümüyündəki qığırdaqların biri qırılıb və əməliyyat olunub.

Onun sözlərinə görə, əvvəllər ildə bir dəfə yoxlanışlardan keçirdilər, 2012-ci ildən bu, 5 ildə bir dəfə edilməyə başladı. Bu il yanvar ayının 6-da vaxt bitib, stasionar müalicə üçün xəstəxanaya getməli olub. “Amma pandemiya ilə bağlı xəstəxanalar məni qəbul etməyib. Forma-88 üçün bütün sənədləri nazirliyə göndərdilər. Mənlə eyni vaxtda sənədləri göndərənlərin hamısına cavab gəldi ki, kompüterdə texniki problem olub, sənədləri yenidən göndərin. İkinci dəfə də fevral ayında müraciət etdik. Ondan sonra hələ də cavab gəlməyib. Hər dəfə poliklinikaya gedib, soruşuram, deyirlər araşdırma gedir”, deyə əlil bildirib.

“Yenisabah.az” saytında “Rusiya miqrant faktorundan Azərbaycana təzyiq kimi istifadə edir” sərlövhəli məqalədə deyilir ki, Rusiya güc sturkturlarının iyunun 15-nə kimi bir çox ölkələrlə yanaşı, Azrbaycandan olan 120 min nəfərin də Rusiyadan deportasiyası gözlənilir.

Deputat Sabir Rüstəmxanlı hesab edir ki, keçmiş sovet respublikaları sosial-iqtisadi problemləri həll edə bilmədikləri üçün Rusiyaya mqirasiya güclü olaraq qalmaqdadır: “Xüsusilə də köhnə sovet istehsal obyektlərinin əksəriyyətinin bugünki Rusiyada olması ölkənin ayrı-ayrı şəhərlərinə axınına rəvac verib. Təbii ki, azərbaycanlılar da bu prosesdə istisna təşkil etmirlər”, deyə deputat bildirir.

Onun fikrincə, Rusiya hər dəfə miqrant faktorundan Azərbaycana təzyiq kimi istifadə edir.

Deputata görə, Azərbaycanın aidiyyatı qurumları xarici ölkələrdə yaşayan azərbaycanlıları lazımi hüquqi sənədlərlə təmin etməlidirlər ki, belə təzyiqlərə yer qalmasın.

“Müsavat.com” saytı isə “Moskvadan şok həmlə: Qarabağ məğlubiyyəti ruslarda “travma” yaradıb - əllərindən gələni edirlər ki…” sərlövhəli məqalədə Ermənistanın məğlubiyyətini Rusiyanın həzm edə bilməməsini dəyərləndirir.

Müəllifin sözlərinə görə, “Rossiya1” telekanalı Kalaşnikov şirkətinin nəzdindəki “ZALA AEROP” tərəfindən istehsal edilən “Lancet” adlı kamikadze dronlarının xüsusiyyətlərini təqdim edib.

Müəllif deyir ki, sujetdəki iddiaya görə, kamikadze dronlar havada siqnallar vasitəsilə “mina sahəsi” əmələ gətirərək, uçuş cihazlarını, o cümlədən, “Bayraktar TB2” pilotsuz aparatlarını məhv edə bilər.

Müəllifin dediyinə görə, sujetdə buna dair animasiya da nümayiş olunub. Türkiyəli ekspert Abdullah Ağar isə bildirib: “Rus kamikadze dronlarının nə qədər effektli olduğu məlum deyil. Türk aparatlarının uğuru ruslarda “travma” yaradıb. Buna görə də, ruslar “Bayraktar TB2”ləri zərərsizləşdirə bilmək üçün yollar axtarır”.

Ağar vurğulayır ki, “Bayraktar TB2”lərin Liviya, Suriya və Qarabağda rus silahlarına qarşı uğurundan sonra Rusiya prezidenti Vladimir Putinin göstərişi ilə Moskva bu sahəyə diqqəti artırıb.

“Sfera.az” saytında isə “Türkiyə, Rusiya və Azərbaycan arasında danışıqlar təcili başlamalıdır – Sülhməramlıların mandatı məsələsi niyə həll olunmur?” sərlövhəli məqalədə qoyulan suala cavab axtarılır.

Məsələ ilə bağlı keçmiş xarici işlər naziri Tofiq Zülfüqarov deyir ki, sülhmərmalı qüvvələrin və müşahidəçi missiyasının fəaliyyəti ilə bağlı bir çox iradlar var, amma bunların səlahiyyət və vəzifələrinin nədən ibarət olması ilə bağlı suala cavab verən yoxdur.

T.Zülfüqarov hesab edir ki, Azərbaycan, Rusiya və Türkiyə arasında danışıqların aparılması artıq zərurətə çevrilmişdir.

Eks-nazir vurğulayır ki, Azərbaycanda hökumət, ictimaiyyət, müxalifət tərəfindən sülhmərmalı qüvvələrin və müşahidə missiyasının fəaliyyətinə iradlar səsələnir: “Lakin 10 noyabrdan sonra olduqca vacib olan məsələni səmərəli istiqamətə yönəltmək məqsədilə məsləhətləşmələr prosesini başlamaq üçün  qanunauyğun və məqsədə müvafiq addımlar atılmır. Belə ki, mandatın işlənməsinə dair Azərbaycan, Rusiya və Türkiyə arasında danışıqlar hələ başlamayıb”.

Zülfüqarova görə, bu məsələnin dumanlı, hüquqi baxımdan qeyri-müəyyən olan tərəfi budur ki, İkinci Qarabağ müharibəsində cəmiyyətin və hakimiyyətin birliyinin qazandığı siyasi təşəbbüsün itirlməsinə şərait yaradır.