Media-icmal 20.05.21

“Müsavat.com” saytı “Manata inam nə zaman artacaq” sərlövhəli məqalədə əmanət və kreditlərdə dollarlaşma səviyyəsini iqtisadçı-ekspert Rəşad Həsənovla müzakirə edir.

İqtisadçı-ekspert Rəşad Həsənovun fikrincə, rəsmi təşfiqə baxmayaraq, xarici valyutadakı əmanətlərin payının yüksək olması aktual problemlərdən biridir: “Burada məsələnin kökündə, təbii ki, milli valyutaya - manata güvənsizlik məqamı dayanır”, deyə ekspert  bildirir.

Ekspertə görə, 2015-ci ildən sonra əmanətlərin dollarlaşma səviyyəsini azaltmaq üçün bir sıra mühüm tədbirlər həyata keçirildi, amma ötən müddət göstərdi ki, bu siyasət ciddi müsbət effekt vermir. Onun fikrincə, bunun da səbəbi hökumətin yanaşmasının birmənalı olmaması, subyektiv maraqların hansısa formada önə keçməsi və s. ilə bağlıdır.

Ekspertə görə, manatın əsas problemi məzənnəsinin neftin qiymətinə bağlı olmasıdır, dünya neft bazarı isə volatildir, burada qiymətlər sürətlə dəyişir.

“2020-ci ildə koronavirus pandemiyasının təsiri ilə neftin qiymətində müşahidə olunan kəskin azalma əhalinin manata yanaşmasında daha ehtiyatlı olmasını şərtləndirdi. Buna görə də son göstəricilər əmanətlərin dollarlaşmasında artıma doğru dəyişiklik olduğunu nümayiş etdirir”, deyə ekspert bildirir.

Ekspert hesab edir ki, manata inamı möhkəmləndirməyin əsas yolu onun məzənnəsinin neft qiymətindən asılılığını azaltmaqdadır. 

“Modern.az” saytında “Açıq havada maska taxmaq o zaman ləğv oluna bilər ki... - komitə sədrindən açıqlama” sərlövhəli məqalədə açıq havada maska taxmaq məcburiyyətinin aradan qaldırılması müzakirə edilir.

Milli Məclisin Sosial siyasət komitəsinin sədri Musa Quliyevə görə, açıq havada maska taxılmasının ləğv olunmasının yeganə yolu vaksinasiya prosesinin sürətlənməsindən keçir.

Onun sözlərinə görə, ictimaiyyət açıq havada maska taxılmasını istəmirsə, daha çox vətəndaşı vaksinasiyaya cəlb etməlidir.

Komitə sədri sosial şəbəkələrdə açıq havada maskadan istifadə qaydasının ləğv olunması çağırışlarına təəssüf ifadə edir: “Amma insanlar anlamalıdır ki, karantin rejiminin yumuşaldılması epidemioloji vəziyyətdən asılıdır. Hər şeyin qaydaya düşməsi üçün ən əsas səbəb vaskinasiya prosesinin sürətlənməsidir”, deyə əsas səbəb göstərilir. 

M.Quliyevə görə, ölkə əhalisinin 50%-i vaksinasiya olunsa və ya koronavirusa yoluxub sağalmış olsa, daha yumuşaq karantin rejiminə keçməkdən söhbət gedə bilər.

“Moderator.az” saytı “İkinci Qarabağ müharibəsindən əvvəl də ABŞ belə xəbərdarlıq etmişdi..” sərlövhəli məqalədə ABŞ Dövlət Departamentinin mayın 19-da yaydığı xəbərdarlığı dəyərləndirir.

Dövlət Departamenti ABŞ vətəndaşlarını Ermənistana və Qarabağa səyahətdən çəkinməyə, Azərbaycanın sərhəd yollarında ehtiyatlı olmağa çağırır.  

Qarağöl ətrafında yaranmış böhranın dərinləşdiyi, demarkasiya prosesindən başlanan hadisələrin hərbi qarşıdurma həddinə yaxınlaşdığı iddia edilir.   

Sənəddə Azərbaycanın terror aksiyalarına hədəf olacağı xəbərdarlığı və bu halın, xüsusilə Azərbaycan-İran sərhədinə yaxın hissələrinə aid olduğu yer alır, terrorçuların xəbərdarlıq etmədən istirahət yerlərinə hücum edə biləcəyi deyilir. 

Sənədi şərh edən müəllif isə deyir ki, İranın dünən (mayın 18-i nəzərdə tutulur) Azərbaycan sərhədləri yaxınlığında pilotsuz uçuş aparatlarının təlimlərini keçirməsi təsadüf deyil, Zəngəzur sərhədləri ilə bağlı İran səlahiyyətlilərinin bəyanatı isə daha çox Azərbaycana ünvanlanmışdı.

Müəllifə görə, Türkiyənin Cənubi Qafqazda baş verənlərə reaksiya bildirməsi vacibdir. 

Düşmən kimi Ermənistan zəif sayılsa da, havadarlarından dəstək almaq ehtimalının böyük olduğu vurğulanır və hərbi əməliyyatlar başlanarsa Türkiyənin Azərbaycana siyasi-hərbi dəstəyinin vacibliyi önə çəkilir.