Media-icmal

Gənclərin məşğulluğunun təmin olunması, İçəri Şəhərdəki "yenidənqurmalar"a baxış, bu günlərdə açılışı olan parkın "zülmət"ə qərq olması və s. məsələlər bugünki (25 aprel, 2019-cu il) medianın aparıcı mövzularındandır...

Gənclərin məşğulluq siyasəti

"Azərbaycan" qəzeti "Azərbaycan gənclərin məşğulluğunun dəstəklənməsində çox ölkələrə nümunədir" sərlövhəli məqalədə

(http://www.azerbaijan-news.az/view-166615/Az%C9%99rbaycan-g%C9%99ncl%C9%99rin-m%C9%99%C5%9F%C4%9Fullu%C4%9Funun-d%C9%99st%C9%99kl%C9%99nm%C9%99sind%C9%99-%C3%A7ox-%C3%B6lk%C9%99l%C9%99r%C9%99-n%C3%BCmun%C9%99dir) ölkədə gənclərin məşğulluq siyasətini dəyərləndirir.

Müəllif deyir ki, Prezident İlham Əliyevin ölkənin inkişafını təmin edən islahatlar proqramı gənclərin iştirakının təmin edilməsi sahəsində dövlət siyasətinin həyata keçirilməsinə şərait yaradıb: "Bunun nəticəsidir ki, ölkədə gənclər arasında işsizlik səviyyəsi kəskin şəkildə azalmaqdadır. Azərbaycan gəncliyi ictimai həyatın və iqtisadiyyatın bütün sahələrində aktiv fəaliyyəti ilə seçilir. Dövlətin gənclərin fəaliyyəti üçün yaratdığı geniş imkanlar nəticəsində bu təbəqə cəmiyyətin avanqard qüvvəsinə çevrilir", müəllif bu sahədə həyata keçirilən siyasətə qiymət verir.

Müəllifin sözlərinə görə, bu baxımdan, Beynəlxalq Əmək Təşkilatı (BƏT) Azərbaycana gənclərin məşğulluq problemlərinin həllinə görə dünyada 10 lider ölkə sırasında yer verib.

Yazı müəllifi deyir ki, hər il ölkədə orta hesabla 100 min nəfərə qədər gəncin əmək bazarına daxil olması makroiqtisadi, demoqrafik, məşğulluq və təhsil siyasətlərinin qarşılıqlı əlaqələndirilməsinin gücləndirilməsini zəruri edir.

Müəllifə görə, 2018-ci ildə ölkə üzrə iqtisadi fəal əhalinin tərkibində 15-29 yaşda gənclərin payı 39 faiz təşkil edir.

Məqalədə deyilir ki, Azərbaycan gənclərin məşğulluq problemini həll etmək üçün BƏT-in müvafiq konvensiyalarına, qətnamələrinə qoşulub, ölkədə "İşsizlikdən sığorta haqqında", "Məşğulluq haqqında" qanunlar qəbul edilib.

"2018-ci ilin yekunlarına əsasən, Dövlət Məşğulluq Xidməti orqanları tərəfindən 14698 nəfər gənc münasib işlə təmin olunub, 1275 nəfər gənc işəgötürənlərin real tələbləri əsasında peşə hazırlığına, 319 nəfər gənc isə haqqı ödənilən ictimai işlərə cəlb edilib", deyə müəllif bu sitiqamətdə atılan addımlar barədə bildirir.

Müəllifə görə, ölkədəki özünüməşğulluq proqramı da gənclərin fəal iştirakına şərait yaradıb, belə ki, 2018-ci ildə bu proqrama cəlb edilən 7267 nəfərdən 1174 nəfəri gənclər olub, bu il isə 1000-dən çox şəxs bu proqrama cəlb olunub. İl ərzində işsiz və işaxataran şəxslərin proqrama cəlb edilməsi işləri davam etdiriləcək.

Müəllif vurğulayır ki, bu istiqamətdə 10 minlərlə gənc müxtəlif proqramlara cəlb ediliblər ki, bu da gələcəkdə onların işlə təmin olunmalarına imkan verəcək.

Sonda isə müəllif yazır: "Yeni təşəbbüslərlə ölkədə gənclərin məşğulluğu sahəsində dövlət siyasəti daim təkmilləşdirilir, sosial tərəfdaşlıq prinsipi əsasında bazar iqtisadiyyatının tələblərinə uyğun bilik və bacarıqlara malik olan gənc işçi qüvvəsinin formalaşdırılması ümumən ölkənin gələcək iqtisadi inkişafında fəal rol oynayacaq".

Qaydanın qanunu üstələdiyi məkan - İçəri Şəhər

"Modern.az" isə "Biçarə şəhər... İçəri şəhər... Bir azdan da Köçəri şəhər" (https://modern.az/az/news/198786 ) sərlövhəli məqalə diqqət çəkir.

Sayt "İçəri Şəhər"in tarixiliyini təhlükə altında qoyan "yenidənqruma" işlərinə dair Milli Məclisin üzvü Fazil Mustafanın düşüncələrinə yer verib.

Deputat deyir ki, İçəri Şəhərdə qala divarlarının bir hissəsini söküb kafe tikirlər və bununla bağlı lap yaxın keçmişdə baş vermiş hadisələrlə paralel aparır: "Keçmiş Sovetskidə tarixi abidələrin bəzilərini uçurdurlar, tanınmış şəxsiyyətlərin yaşadığı evləri ortadan qaldırırlar..."

Deputat hesab edir ki, hər gün bu cür neqativ informasiyanın içində "üzməyə" baxmayaraq, bugünki insana olan biganəlik tarixin daşlarına qarşı da davam etdirilir.

F.Mustafaya görə, burada ən acınacaqlısı da bu işi görənlərin heç birinin ictimai qınağı nəzərə almaq barədə düşünmək istəməməsidir.

Deputat vurğulayır ki, 50 il öncə İşəri Şəhərdəki "sökhasökə" görə mərhum şair Vaqif Səmədoğlu İçərişəhəri "Biçarə şəhər" adlandırmışdı.

F.Mustafa deyir ki, indi isə biçarə qalan yalnız İçəri Şəhər deyil, hamıdır: "Yəni, hər hansı bir zərərli tendensiyanı dayandırmaq imkanımız yoxdur. Çinki

Qanundan öncə Qaydalar işləyir və Qanun Qaydanı özünə tabe etdirə bilmir".

Deputat xatırladır ki, keçən il Yasamal rayonunda 20 yanvar metrosuna yaxın ərazidə ağacların dibinə kimyəvi turşu tökmüşdülər, hamısı bir neçə günün içində məhv edildi: "Başqa yerlərdə də baş verən ağac qətliyamına son qoymaq imkanımız yoxdur".

F.Mustafa vurğulayır ki, İçəri Şəhər də təqribən həmin ağaclara bənzər formada əridilir: "Halbuki, bu tarixin nadir incisinə toxunmaq olmaz, bir daşını da cızmaq, sındırmaq olmaz".

Bu gedişlə isə deputat İçəri Şəhərin mümkün perspektivini belə gördüyünə işarə edir: "Biçarə şəhər...İçəri şəhər... Bir azdan da Köçəri şəhər".

Yeni açılmış park "zülmət içində?"

"Azpolitika.info"da isə "Qaraçuxurdakı "Neftçilər parkı" zülmətə qərq olub - 6 gün əvvəl Prezident açılışında iştirak etmişdi (FOTO)" sərlövhəli məqalə (http://azpolitika.info/?p=509566) diqqət cəlb edir.

Müəllif bu il aprelin 18-də dövlət başçısının və xanımı Mehriban Əliyevanın açılışını etdiyi Suraxanı rayonu Qaraçuxur qəsəbəsindəki "Neftçilər parkı"nın işıqlandırılmaması barədə sakinlərlə söhbətləşir.

Sakinlərin şikayəti əsasında parkda olan müəllif deyir ki, axşam saatlarında cəmi 6 gün əvvəl açılmış parka üz tutan insanlar kor-peşman geri qayıdırlar.

Müəllifin sakinlərə istinadən dediyinə görə, ölkə başçısının gəlişi gözlənildiyindən, parkın açılışından bir neçə gün əvvəl yollarda və yol kənarlarında tez-tələsik abadlıq işləri aparılıb. Prezidentin gələcəyi yol boyu təmir, rəngləmə və digər işlər görülüb. Parkın özündə isə 3-4 ədəd kiçik "karusel" quraşdırılıb: "Ancaq sakinlər bildirirlər ki, hətta o qədər də müasir olmayan bu "karusellər" belə, park açılandan bu günə qədər hələ düz-əməlli işləməyiblər. Səbəb olaraq isə sakinlərə elektrik təminatında problemlərin olması göstərilib. Bəzi yerli sakinlər isə guya parkın elektrik borcu olduğundan işığının kəsildiyini iddia edirlər".

Müəllifin sakinlərə istinadən dediyinə görə, açılışdan sonrakı ilk günlərdə ərazi elektrik enerjisi ilə təmin olunsa da, son 2-3 gündə "Neftçilər parkı"nda işıq yoxdur və bu da sakinlərin haqlı narazılığına səbəb olub.

Müəllif xatırladır ki, parkın açılışında prezidentə hesabat verən Suraxanı Rayon İcra Hakimiyyətinin başçısı İlqar Abbasov nəinki parkın, ümumiyyətlə Suraxanı rayonunun heç bir kommunal probleminin qalmadığını demişdi: "Cənab Prezident, işlər çox yaxşı gedir. Bu gün artıq rayonun hər yerində, həmçinin Qaraçuxurda qaz, su, işıq problemləri yoxdur, hamısı gözəldir", deyə icra başçısndan sitat gətirir.

Müəllif isə icra başçısının rayonla bağlı "hamısı gözəldir" deməsinə inamsız yanaşaraq, bu rayonun kommunal problemlər və infrastruktur sarıdan paytaxtın heç də öndə gedən rayonu sayıla bilməməsini iddia edir: "Məsələn, elə həmin Qaraçuxur qəsəbəsinin Şərq Massivi adlanan ərazisində hər il hələ yay gəlməmişdən içməli su problemi başlayır və bütün yay boyu bu problem heç cür həll olunmur ki, olunmur. Və ümumiyyətlə, rayonda hər şeyin "gözəl olduğunu" elə ölkə başçısının cəmi 6 gün əvvəl açılışını etdiyi parkın 2 gündən sonra işıqsız qalması, qaranlığa qərq olması və heç kimin də bununla maraqlanmaması da sübut edir..."

Müəllif bir məsələni də vurğulayır ki, qəsəbə sakinləri arasında bu park daha çox 1992-ci ildə Qarabağ döyüşlərində həlak olmuş Azərbaycanın ən gənc Milli Qəhrəmanı Cavanşir Rəhimova qoyulmuş abidə ilə bağlı "Cavanşir parkı" kimi tanınır, amma nədənsə bu parka ən gənc şəhid qəhrəmanın adı yox, "Neftçilər parkı" adı verildi...

Rəy yaz

Cəmiyyət

İran Prezidentinin həlak olduğu hadisə Azərbaycan- İran münasibətlərinə təsir edə bilərmi? – Nəsimi Məmmədli Çətin sualda



Bizi sosial şəbəkələrdə izləyin

Xəbər lenti