Media-icmal

44 gün davam etmiş İkinci Qarabağ Müharibəsinin nəticələrinə təsir göstərmiş amillər, Türkiyə sülhməramlılarının da Qarabağa yerləşdirilməsi zərurəti, koronavirus testlərinin ucuzlaşdırılması təklifi, son vaxtlar infeksiyaya yoluxmanın artmasının səbəbləri və s. məsələlər medianın aparıcı mövzuları sırasındadır.

“Azərbaycan” qəzeti “Müharibənin nəticəsinə təsir edən faktorlar” (İkinci Qarabağ Müharibəsinin nümunəsində) sərlövhəli məqalədə müharibənin nəticələrinə təsir göstərmiş amillər araşdırılır.  

(http://www.azerbaijan-news.az/view-206363/muharibenin-neticesine-tesir-eden-faktorlar-ikinci-qarabag-muharibesinin-numunesinde)

Azərbaycan dövləti İkinci Qarabağ Müharibəsində (2020-ci il 27 sentyabr-10 noyabr) Ermənistan rəhbərliyini kapitulyasiya müqaviləsinə imza atmağa vadar etməklə qarşıya qoyulan bütün məqsədlərə çatıb.

Hərbi ekspertlər bunu vurğulayırlar ki, tərəflər üçün müharibənin aşağıdakı dörd nəticəsi ola bilər: məğlubiyyət, kompromis, mənfəət əldəetmə, qələbə və . Azərbaycan bu nəticələrdən ən yüksəyinə – qələbəyə nail oldu.

Bu nəticəyə əsas səbəb kimi dövlət başçısının qətiyyəti, ordunun imkan və qabiliyyətləri, xalqın birliyi amilləri göstərilir.

Məqalədə vurğulanır ki,  təxminən 2,5 milyon nəfər əhalisi olan Ermənistan noyabrın əvvəllərində ümumi əhalisinin 0,05 faizindən çoxunu itirmişdi ki, bu da məğlubiyyətə aparan ən əsas səbəblərdən biri idi.

Müəllifə görə, 10 noyabr bəyanatı tamamilə Azərbaycanın xeyrinə və vaxtında imzalanmış bir sənəddir.

“Mətbuat.az” sayti isə “Türkiyə sülhməramlı qüvvələri də Xankəndində təmsil olunmalıdır" (https://metbuat.az/news/1395504/turkiye-sulhmeramli-quvveleri-de-xankendinde-temsil-olunmali.html) sərlövhəli məqalədə Qarabağda Türkiyə sülhməramlı qüvvələrinin yerləşdirilməsinin vacibliyi şərh edilir.

Hesab edilir ki, Rusiya “sülhməramlı qüvvələri”nin təktərəfli gəlişi və təkbaşına qərar verməsi Moskanın burada mövqeyini gücləndirilməsinə xidmət edir, özü də noyabrın 10-da razılaşdırılmış bəyanata ziddir.

Məqalədə belə bir fikir yürüdülür ki, Azərbaycan və Türkiyə tandeminin güclənməsi, gələn ildən Rusiyaya qarşı beynəlxalq birliyin təzyiqləri, xüsusilə ABŞ-ın sanksiyaları Rusiyanın regionda mövqeyini zəiflədəcək.

Əlavə edilir ki, Rusiya Qarabağın kiçik bir hissəsinə sülhün təminatçısı kimi gəlməyib,  öz maraqlarını qorumaq və erməniləri müdafiə edərək, gələcək perspektivdə onlardan istifadə etmək planına malikdir.

Eyni zamanda vurğulanır ki, Moskva Qarabağda mövcudluğunu "sülhməramlı" kimi deyil, hərbi potensialını gücləndirərək perspektivdə təzyiq formalaşdırmağa hesablayıb, Azərbaycan buna icazə verə bilməz.

Yada salınır ki hazırda Qarabağda ermənilərin sosial, humanitar problemlərini Rusiya qarşılayır və infrastrukturun bərpasını reallaşdırır, Moskva  müxtəlif  bəhanələr gətirərək azərbaycanlıların köçürülməsinə qarşı da çıxa bilər.

Rusiyanın bu məsələdə problem yarada bilməməsi üçün Azərbaycan Türkiyə ittifaqı güclənməli, Azərbaycan bayrağı Xankəndi, Xocavənd və Ağdərədə də mütləq dalğalanmalıdır.

“Modern.az” saytı isə “Deputat hökuməti koronavirus testlərini ucuzlaşdırmağa çağırdı” (https://modern.az/az/news/268308/deputat-hokumeti-koronavirus-testlerini-ucuzlasdirmaga-cagirdi-) sərlövhəli məqalədə bəhs olunan məsələ şərh edilir.

Məqalədə vurğulanır ki, koronavirusa yoluxma sayı təkcə Azərbaycanda deyil, bütün dünyada kəskin artıb, hökumət kifayət qədər tədbirlər görsə də vəziyyət çıxılmaz hal almağa başlayıb. Məsələ belədir ki, koronavirus infeksiyasına yoluxmada artım təkcə Bakı və Sumqayıtda deyil, rayonların çoxunda da müşahidə edilir.

Qeyd edilir ki, insanların demək olar ki, hamısı maskadan istifadə edir, amma yoluxma azalmır. Yoluxmada azalmaya nail olmaq üçün xəstələrin müayinə və müalicəsini, testdən keçirilməsini mərkəzləşdirilmiş qaydada aparmaq təklif edilir.

Bu da onunla əsaslandırılır ki, insanların 100 manat ödəyib testdən keçməsi, daha sonra müalicə almaları üçün vəsaitləri yoxdur, hələ elə insanlar var ki, təkrar testdən keçmək lazım gəlir, belə insanlara güzəşt edilməlidir.

Koronavirus testindən keçmək üçün 100 manat ödənilməsi baha hesab edilir və bunun üçün vahid qiymətin 20-30 manat müəyyən olunması təklif edilir.

“Moderator.az” saytı isə "Görəsən, Operativ Qərargah bu vəziyyətə nə vaxt operativ münasibət bildirəcək..?” (https://www.moderator.az/news/355039.html)

sərlövhəli məqalədə son vaxtlar koronavirus infeksiyasına yoluxmanın artmasının səbəbləri müzakirə olunur.

Məqalədə deyilir ki, son vaxtlar virusa yoluxma halları artmaqda davam edir. Yada salınır ki, 2020-ci il dekabrın 7-də ölkə ərazisində koronavirusa yoluxanların sayı 3086 nəfər təşkil edib. Bu, o deməkdir ki, bir gün öncə ilə müqaisədə virusa yoluxanların sayı 7,6% artıb.

Məqalədə vurğulanır ki, dekabr ayının 6-da götürülmüş 19197 testin 4356-da və ya 22,7%-də yoluxma halı qeydə alınıb. Bir gün sonra götürülmüş 10190 testdə yoluxma sayı 3086 olub ki, bu da həmən testlərin 30,3%- deməkdir.

Bu faktdan irəli gələrək deyilir ki, bir gün ərzində virusa yoluxanların sayında baş vermiş belə artım ciddi narahatlıq doğurur. Məqalədə qeyd edilir ki, ən sərt karantin rejimi tətbiq edilən dönəmlərdə ölkədə gündəlik virusa yoluxanların sayı indikindən 15-20 dəfə az idi.