Media-icmal 21.05.21

Son günlərdə səslənən terror təhlükəsi xəbərdarlıqlarının səbəbləri, Ermənistanın razılaşmaları yerinə yetirmək məcburiyyəti, İran generallarının İrəvan səfəri, Bakıda bağ evlərinin satış və kirayə qiymətlərinin bahalaşması və s. medianın aparıcı mövzuları sırasındadır.

“Modern.az”  saytı “Azərbaycanda terror riski ilə bağlı xəbərdarlığın pərdəarxası məqamları” sərlövhəli məqalədə Azərbaycanda  bu riskin səviyyəsi dəyərləndirilir.

Məqalədə deyilir ki, bu günlərdə ABŞ Dövlət Departamenti öz vətəndaşlarına  Azərbaycana və Ermənistana səfər etməmək çağırışı edib, bu, koronavirusa yoluxmaqla  yanaşı həm də terror təhlükəsilə bağlıdır.

Amma məqalədə Azərbaycan Dövlət Təhlükəsizliyi Xidmətinin ölkədə terror riskinin aşağı olması barədə məlumatı da yer alır.

Bu məsələ ilə bağlı şərh verən ekspertlərə görə, bu çağırış daha çox erməni silahlılarının Azərbaycan ərazilərini tərk etməməsi, Azərbaycan və Ermənistan sərhəddində baş verən erməni təxribatları ilə əlaqəlidir.

“Yenisabah.az” saytı isə “Ermənistan razılaşmalara əməl etmək məcburiyyətində qalıb: “Bir qarış da ərazi güzəştə gedilməyəcək” sərlövhəli məqalədə rəsmi İrəvanın Azərbaycanla razılaşma sənədinin Ermənistanın maraqlarına tam cavab verməli olması ilə bağlı açıqlamalarını ziddiyətli adlandırılır.

Məqalədə deyilir ki, Azərbaycan konkret olaraq elə bir sənədə imza atacaq ki, bir qarış da ərazi güzəştə gedilməyəcək. Deyilir ki, fəaliyyət göstərən üçtərəfli komissiya sərhədlərin müəyyənləşdirilməsini, 11 yanvar razılaşmalarını həyata keçirəcək.

Açıqlama verən politoloqlar isə artıq Ermənistanın razılaşmalara əməl etmək məcburiyyətində qaldığını, bunun əksinin isə Azərbaycanın yeni təzyiqləri ilə üzləşmək olduğunu vurğulayırlar.

“Sfera.az”  saytı isə “Tehran sərhəd olayından niyə narahatdır? – İranlı generalların Yerevan səfərinin detalları” sərlövhəli məqalədə bu səfərin mahiyyətindən bəhs edilir.

Məqaləyə görə, İran generallarının Ermənistan səfəri Azərbaycan-Ermənistan sərhəddindəki gərginliklə bağlı olub. İran parlamentinin komitə sədri Müctəba Zolnuri isə İranın bölgədə hər hansı dəyişikliyi qəbul etmədiyini bildirib.

Onun fikrincə, Ermənistan ərazisinin bir hissəsini almaq istəsələr bu, sərhəd dəyişikliyinə səbəb olaraq İran üçün də problem yaradacaq, buna görə də indiki sərhədlər qorunmalıdır. 

Şərh verən politoloqlar isə deyirlər ki, Qarabağ münaqişəsinin davam etdiyi 30 ildə İranın Azərbaycana münasibəti birmənalı olmayıb.

Bəzi politoloqlar isə deyirlər ki, İran münaqişənin həll olunmasını istəmirdi.  Ermənistanla sərhədlərin müəyyən olunması, “Zəngəzur dəhlizi” məsələsi İranı  narahat edir.

Səbəb də budur ki, Zəngəzur dəhlizinin açılması Azərbaycanın müstəqil siyasətini də, Türkiyənin regiona təsirini də gücləndirəcək, bu isə İranı razı salmır.

“Müsavat.com”  saytı  “Bakıda bağ evlərinə tələbat artır, qiymət bahalaşır” sərlövhəli məqalədə bu sosial məsələdən danışılır.

Məqalədə daşınmaz əmlak sahəsi mütəxəssislərinə istinadən deyilir ki, yay fəslinin yaxınlaşması Bakıda fərdi yaşayış və bağ evlərinin qiymətində artıma səbəb olub.

"MBA Group" konsaltinq şirkəti bəyan edir ki, aprel ayında fərdi yaşayış və bağ evlərinin qiyməti 2,27 faiz bahalaşıb, fərdi yaşayış və bağ evlərinin orta qiyməti 993 manat/kvadrat metr təşkil edib.

Ekspertlər bildirirlər ki, yay mövsümü yaxınlaşdıqca hər il olduğu kimi, bu il də Bakıda bağ evlərinin qiymətində artım gözlənilən idi.

Şirkətin məlumatına görə, həmçinin bağ evlərinin kirayə qiymətlərində də artım müşahidə olunur.

Şirkətdən deyilənə görə, fərdi yaşayış və bağ evlərinin kirayə qiymətləri 14,2% artıb.