Media-icmal 23.07.20

Ölkədə COVİD-19 pandemiyası ilə bağlı durum, karantin rejiminə münasibət, ölkənin ət istehlakı bazarında vəziyyət və s. məsələlər medianın aparıcı mövzuları sırasındadır.

Yumşalmaya getmək olar, amma

Rəsmi “Azərbaycan” qəzeti “Addım-addım karantindən yumşaldılmaya doğru” sərlövhəli məqalədə ölkədə COVİD-19  virusu ilə bağlı durumu qiymətləndirir.

Bu sahədə Azərbaycandakı durumla bağlı məqalədə deyilir ki, son vaxtlar virusa yoluxanların sayında xeyli azalma, sağalanların sayında isə artım müşahidə olunur, sərt karantin rejiminin tətbiqi onun daha geniş yayılmasının qarşısını almağa imkan verdi.

Müəllifə görə, uğurların əsasında vətəndaşların qoyulan qaydalara əməl etməsi, bəzi bölgələrə gedişlərə məhdudiyyətin qoyulması dayanır, avqustun 5-dən sonra sərt karantin rejimində növbəti yumşalmaların ola bilməsi  gözlənilir.

Məqalədə karantin davranışlarına əməl olunması ilə normal həyat məcrasına qayıtmağın mümkünlüyü xüsusi vurğulanır: Burada ən böyük rol vətəndaşların üzərinə düşəcək. Sadə qaydalara riayət etməklə açılmaları tezləşdirə bilərik”.

Müəllifə görə, insan təmasını azaltmağı nəzərdə tutan sərt karantin tədbirlərinin məqsədi bu yol  ilə virusa yoluxma zəncirini qırmaqdır.

“Təbii ki, heç kəs karantin rejiminin tətbiqindən, doğmaları ilə birgə şadlıq etməməkdən, əzizlərinin yas mərasimində iştirak etməməkdən, istirahət etməməkdən və s. məmnun deyil. Amma dünyanın hər yerində koronavirusun yaratdığı təhlükəli vəziyyət bunu tələb edir”,- müəllif vurğulayır.

Tələbat azalsa da qiymət artır

“Müsavat.com” saytı ölkənin ət bazarındakı qiymət bahalığını dəyərləndirir. Saytın məlumatına görə, ətə olan tələbat azalsa da qiymət enməsi baş vermir.

Saytın məlumatına görə, son aylarda koronavirus pandemiyasının yaratdığı böhran nəticəsində ətin ən çox istehlak olunduğu restoran, kafe, şadlıq sarayları  bağlıdır. Bununla belə, tələbatın azalması ölkədə ətin qiymətində azalmaya deyil, əksinə, bahalaşmağa səbəb olub.

Mart ayından bəri mal və qoyun ətinin qiymətinin hər kiloqramında 1 manata yaxın bahalaşma qeydə alınıb, rəsmi statistikaya əsasən ölkəyə ət idxalında  artım da qeydə alınıb. “Belə ki, Dövlət Gömrük Komitəsinin statistikasına əsasən, bu ilin altı ayında ölkəyə 29 milyon 377.31 min dollarlıq diri heyvan, 45 milyon 951.91 min dollarlıq ət və qida üçün yararlı ət əlavələri idxal olunub. Ötən ilin 6 ayında bu məhsulların idxalı müavfiq olaraq 21 milyon 599.06 min dollar və 35 milyon 394.84 dollar təşkil edib”.

Rəsmi məlumatlara görə, Azərbaycanda bütün növ mal-qara və quş əti ilə təminatda idxaldan asılılıq 2016-cı ildəki 12,1 faizdən 2018-ci ildə 17,5 faizə çatıb, mal əti idxalından asılılıq iki ildə iki dəfədən çox artaraq 6,6 faizdən 15 faizə yüksəlib.

Gürcüstan statistika orqanının məlumatına əsasən 6 ayda oradan 6,48 milyon dollar dəyərində 1 540 ton dondurulmuş mal əti idxal edilib. İllik müqayisədə Azərbaycanın Gürcüstandan tədarük etdiyi dondurulmuş mal ətinin çəkisi 1 530,2 ton və ya 157 dəfə artıb.

Kənd Təsərrüfatı Nazirliyi Aqrar Tədqiqatlar Mərkəzinin baş direktoru Firdovsi Fikrətzadə deyir ki,  altı  ayda ət idxalında 1200 ton artım var. Altı ayda kolbasa məmulatlarının istehsalı 34,9 faiz artıb. Bu prosesdə yerli təzə ətdən deyil, dondurulmuş idxal ətindən istifadə olunur”.

Sərt karantin qalsın, ya qalmasın? 

“Cəbhə.info” saytı isə Azərbaycanda COVİD-19 pandemiyasına qarşı mübarizəni dəyərləndirir.

Qurumun Elmi Komitəsinin sədri Akif Qurbanov Azərbaycanda epidemiyanın pik həddən çıxdığını bildirib: “Azərbaycanın bir neçə həftə əvvəl keçdiyi dövrü epidemiyanın pik vəziyyəti idi. Azərbaycanda pik vəziyyət artıq qurtarıb, yoluxmaların sayı azalıb, epidemik proses sönməyə doğru gedir.

Ölkədə epidemik gərginliyin azaldığını deyən komitə sədri karantin rejiminin, insanların aylarla davam edən psixoloji basqı altında saxlanmasını doğru saymır.

Terapevt Rasif Bağırov Operativ Qərargah və TƏBİB tərəfindən verilən məlumatların həqiqəti əks etdirmədiyini deyir, əlavə edir ki, hökumətə müraciət edənlərdən qat-qat artıq insanlar başqa həkimlərə müraciət edirlər və müalicə olunurlar. “Bunu özləri gözəl bilir və karantini saxlamaq istəyirlər. Ölkədə karantinlə deyil, koronavirusla mübarizə aparmaq lazımdır”.

R. Bağırovun deməsinə görə, koronaviruslu xəstələr üçün ayrılan xəstəxanalarda yer çatmasa da digər müəssisələrdə müalicə alınmasına TƏBİB imkan vermir:: “Proseslər haradasa onların dedikləri ilə üst-üstə düşmür. Karantin məsələsinin bu formada həyata keçirilməsi xəstəliklə uyğun gəlmir.Əgər polinklinikalar və digər həkimlər bununla mübarizə aparmayacaqlarsa, o zaman bu xəstəliyin qarşısını  almaq necə mümkün olacaq?”

Həkimin iddiasına görə, Azərbaycanda testlərin 60%-i səhv nəticəli olur, qoyulan diaqnozla testin nətiəcələri üst-üstə düşmür,test yoxlamaları səhv çıxdığı üçün statistik göstəricilərlə uyğun gəlmir”.

Həkim əlavə edir ki, karantin həddindən artıq yumşaldılmalı, xəstəliklə mübarizə aparılmalıdır, insanları həddindən artıq psixoloji basqıda saxlamaq doğru deyil.