Media-icmal 24.01.19

Dövlət başçısı İlham Əliyevin Davos səfərinə baxış, TOPAZ məntəqələrindəki durum, gənclər arasında işsizlik və s. məsələlər bugünkü (24yanvar, 2019-cu il) medianın aparıcı mövzularındadır.

Davos səfərinə baxış

"Azərbaycan" qəzeti "Davosda Azərbaycan zəfəri" sərlövhəli məqalədə dövlət başçısı İlham Əliyevin Davos səfərini dəyərləndirir.

Müəllif qısaca anladır ki, yanvarın 22-dən İsveçrəinin Davos şəhərində 49-cu ənənəvi Dünya İqtisadi Forumu öz işinə başlayıb və Forum "Qloballaşma 4.0:4-cü Sənaye İnqilabı dövründə yeni arxitekturanın yaradılması" devizi altında təkil edilib.

Müəllif vurğulayır ki, dördüncü sənaye inqilabı özü ilə birgə gətirdiyi ekologiyanın qorunması tələbləri, çoxqütblü dünya nizamı və getdikcə artan qeyri-bərabərlik problemlərilə yanaşı addımlayır.

Bundan irəli gələrək müəllif yerli, milli və beynəlxalq idarəçilikdə yeni şəraitə uyğun vaxtında addımlar atılması tələb olunur.

Müəllifin deməsinə görə, Foruma qatılan siyasət və biznes dairəsi təmsilçilərinin dünyanın siyasi-iqtisadi sistemində Azərbaycanın rolunu dəyərləndirməsi, bəşəriyyəti narahat edən risklərin aradan qaldırılmasındakı mövqeyilə hesablaşması xüsusi diqqət çəkir: "Azərbaycanın malik olduğu potensial, enerji resursları daim Dünya İqtisadi Forumunun əsas diqqət ayırdığı məsələlər sırasına daxil olur. Ona görə neçə illərdir ki, Dünya İqtisadi Forumunda təmsil olunan Azərbaycana maraq həmişə böyükdür. Bunu prezident İlham Əliyevin keçirdiyi görüşlər də təsdiq edir", - müəllif vurğulayır.

Yazıda deyilir ki, dövlət baçısı İlham Əliyev Forumun dünyada gedən transformasiya prosesinin yeni təmayülləri və çağırışların müzakirəsi baxımından əhəmiyyətli sayıb, Azərbaycanın inkişaf strategiyasını yenilənən beynəlxalq və regional təmayüllər nəzərə alınmaqla qurduğunu və dördüncü sənaye inqilabının hədəflərinin həyata keçirilməsində çox fəal iştirak edəcəyini bildirib.

Müəllifə görə, Davos Forumu çərçivəsində dünya biznes şurkətlərinin təmsilçiləri ilə dövlət başçısı İlham Əliyevin görüşləri Azərbaycana, burada aparılan islahatlara, İ.Əliyev şəxsində "bacarıqlı islahatçı lider "amilinə maraqdan irəli gəlir.

Məqalədə deyilir ki, Dünya Bankının "Doing Business 2019" hesabatında Azərbaycan 25-ci yerə yüksəlib.

Üstəlik, son illər dünyada iqtisadi artım sürətinin azalması fonunda Azərbaycanda həyata keçirilən struktur və iqtisadi islahatların əhəmiyyəti daha da artır.

Bu görüşlərin yekunu olaraq isə belə deyilir: "Göründüyü kimi, öz qabaqcıl fəaliyyətləri ilə dünyada tanınan şirkətlərin rəhbərləri prezident İlham Əliyevin həyata keçirdiyi islahatları yüksək qiymətləndirir və Azərbaycanda yeni layihələr həyata keçirməkdə maraqlı olduqlarını gizlətmirlər".

Artıq tamahın qurbanı -TOPAZ

"Yeni Müsavat" qəzetində isə "Topaz məntəqələri ölüxanaya çevrilib" sərlövhəli məqalə oxumaq olar.

Müəllif Bakıda "Topaz" - bukmeyker məntəqələrinin hazırkı durumunu qiymətləndirir.

Müəllif vurğulayır ki, Bakıda "Topaz" - bukmeyker məntəqələrinə indi az-az rastınıza çıxar, bir zamanlar şəhərdə sürətlə artan totalizator kontorlarının sayı indi getdikcə azalır, üstəgəl, kofiçent yazanlar da gözə az dəyirlər. Futbol mərcinin həvəskarları "Topaz" obyektlərinə əvvəlki qədər baş çəkmirlər.

"Buna iki amil səbəb oldu: ötən yay Dünya Çempionatı ərəfəsində "Topaz"ın mərc qoyuluşlarının minimum 3 manata qaldırılması və əmsalların günbəgün aşağı salınması. "Azərinteltek"in payını satması və totalizator kontorlarında minimum mərc qoyuluşunun 3 manata qaldırılması bu bazarı sıradan çıxardı" deyə müəllif səbəbin ünvanını göstərir.

Müəllif deyir ki, elektron hesabdan mərc oyunlarının qiyməti ucuzlaşsa da bu kontingent toplaya bilmədi.

Yazı müəllifi vurğulayır ki, 2018-ci ilin yayından bukmeyker kontorundan minimum mərc qoyuluşunun 1 manatdan 3 manata qaldırılması bu sahəyə ciddi zərbə olub, sanki "Topaz" öz əli ilə özünü məhv etməyə başlayıb, müşahidələr göstərir ki, indi həmin obyektlərdə tək-tük müştəriyə rast gəlmək olur.

Müəlliflə həmsöhbət olan belə obyekt sahiblərindən biri də hesab edir ki, mərc qoyuluşunun 1 manatdan 3 manata qaldırılmasını "Topaz" məntəqə sahiblərinin fikirləşmədən verdiyi məntiqsiz qərar hesab edir: "Guya çox qazanmaq istəyirdilər, özlərinə zərbə oldu, bizi də pis vəziyyətə saldılar. İndi çoxu topaz-ın saytına girir, qeydiyyatdan keçir, oturub evində, komputer qabağında, 1 manat hesab yazır, oynayır.Kimin bank kartı hesabı yoxdursa, tanışının hesabından istifadə edir. Gedib istənilən "milliön", "e-manat" kimi onlayn xidmət aparatından 2-3 manat yükləyirsən, kefin istəyəndə "şot" yazırsan".

Obyekt sahibi "Topaz" obyektindən minimum mərc yazmağın 3 manata qaldırılmasını "Topaz"ı bilərəkdən məhv etmək kimi dəyərləndirir.

Müəllif xatırladır ki, 2015-ci ilin dekabrından bütün TOPAZ sistemində minimum mərc 2 manat təyin olundu, buna qədər isə 1 manat idi. 2018-ci ilin iyununda minimum mərc qoyuluşu 3 manata qaldırılıb, bu, həvəskarları narazı salıb, kontorların işini zəiflədib,

Müəllif deyir ki, "Azərintellekt" QSC tərəfindən bu qərarın verilməsi heç bir səbəblə şərh olunmur, yəni, etopaz.az-da 1 manata endirilməsi, totalizatorlarda 3 manata qaldırılmasının məntiqi yoxdur.

Müəllifə görə, burada yeganə məntiq bundan ondan ibarətdir ki, "Topaz" rəhbərliyi məntəqələrə gedənlərin çox olduğunu görərək böyük pullar götürməyi hədəflədi, əvəzində isə totalizatorlar ölüxanaya çevrildi.

Gəncliyin işsizlik problemi

"Novaya Vremya" qəzetində isə Gəncliyin işsizliyi-sosial problem" sərlövhəli məqalə məqalə oxumaq olar.

Müəllif gənclər arasında işsizlik problemini müzakirəyə çıxarır.

Yazı müəllifinin deməsinə görə, ölkədə işsizlik son illər azalsa belə əhalinin məşğulluğ əhali və xüsusilə gənclər arasında problem olaraq qalmaqdadır.

Müəllif iddia edir ki, hakimiyyətin bu sahədə cəhdləri istənilən nəticəni vermir.

Müəllif vurğulayır ki, rəsmilər gənclər arasında ölkə üzrə işsizliyin 9,2 faiz olduğunu bildirirlər, amma rəqəm real deyil, gənclər arasında işsizlik faizi daha yüksəkdir.

Məqalə müəlifi deyir ki, əmək və əhalinin sosial müdafiəsi nazirinin müavini Mətin Kərimli bu problemə səbəb kimi təhsil sisteminin bazarın tələblərinə cavab verməməsini göstərib.

"Bu problem var və mübahisə etmək çətindir, ekspertlər də bu barədə dəfələrlə danışıblar. Məsələ burasındadır ki. problemi aradan qaldırmaq üçün reallıqda heç bir iş görülmür və durumun nə vaxt dəyişəcəyi də bəlli deyil", - müəllif bildirir.

Müəllif deyir ki, indiki halda "orta və ali məktəb müəssisələri diplom aldıqdan sonra işsizlər ordusunu tamamlayacaq mütəxəssislər hazırlayır" sualı meydana gəlir.

Yazı müəllifi iddia edir ki, gənclər arasında işsizlik məsələsi həmişə aktual olub və bu sahədə statistikaya "bəzək-düzək" verməklə problemi həll etmək mümkün deyil, əksinə gənclər arasında işsizlik daha da artacaq.

Müəllifə görə, burada çıxış yolu problemin kompleks həllindədir, çünki işsizlik gənclər arasında artıq sosial problemə dönüb.

Məqalə müəllifi deyir ki, bu məsələ gənclər arasında inamsızlığa, ölkədən xaricə getməyə səbəb olur.

Yazı müəllifi xatırladır ki, ölkədə təkcə rəsmi işsizliyin yox, həm də gizli işsizliyin həcmi artır, odur ki, əmək məqsədilə ölkədən gedənləri bu və başqa şəkildə "gizli işsizlik" kateqoriyasına aid etmək olar.

Nə qədər ağrılı- acılı olsa da onların əksəriyyəti vətənə dönmək niyyətində deyil, çünki burada onları ya işsizlik, ya da insan ləyaqətinə hörmətsizlik olan maaşa işləmək gözləyir.