Media-icmal 24.02.21

Koronavirus infeksiyası ilə bağlı əyani təhsilə açılmış məktəblərin yenidən onlayn tədrisə keçməsi, Bakıda norma parklanmanın olmamasının fəsadları, metronun bağlı qalmasının səbəbləri, Ermənistandakı  rus hərbi bazasının Azərbaycanın sərhədlərinə yaxın çəkilməsi çağırışlarına cavablar və s. medianın aparıcı mövzuları sırasındadır....

“Yenisabah.az”  saytı “Məktəblər yenidən bağlanacaq? - “Eyni səhvi təkrarladıq” sərlövhəli məqalədə əyani tədrisə keçən bəzi təhsil müəssisələrinin yenidən distant təhsil formatına qayıtmasından bəhs edilir.

Müəllif deyir ki, Respublika İncəsənət Gimnaziyasının fəaliyyəti 14 günlük təxirə salınıb, dərslər onlayn şəkildə tədris olunacaq. Belə qərarın verilməsinə səbəb kimi isə 8 müəllimin və bir neçə şagirdin koronavirus testinin müsbət çıxmadığı göstərilir.

Təhsil eksperti Kamran Əsədov isə belə bir qərarın verilməsini gözlənilməz saymır. Onun deməsinə görə, bir neçə məktəbdə bu hallar var, amma açıqlanmır, hətta bir çox məktəblərdə siniflər də bağlanıb.

Ekspertə görə bu təhsil müəssisəsində belə halın baş verməsi əhalinin sıx cəmləşdiyi məkanda yerləşməsidir. K.Əsədov vurğulayır ki, məktəblər ona görə əyani tədrisə keçdilər ki, evlərində texniki avadanlıqları olmayanlar var.

Digər tərəfdənsə ekspert bütün dərsləri onlayn tədris etməyin mümkün olmadığını diqqətə çatdırır.

K.Əsədov yada salır ki, yoluxma sayı o qədər də ciddi bir rəqəmlə ifadə edilmir, amma eyni addımı atıb fərqli nəticə gözləyənlər var: “Yəni, 2020-ci il sentyabrın 15-dən oktyabrın 15-dək olan müddətdə 49 məktəb, 75 sinifdə yoluxma faktı aşkarlandı və bağlanmaya gedilmişdi. Biz eyni səhvi yenə təkrarladıq, qaydalara yenə əməl etmədik”, - ekspert bildirir.

Ekspertə görə, məktəblər açıldıqda yoluxma halının yenidən artacağı nəzərə alınmalı idi, çünki, insan hərəkətliliyinin artması ilə ictimai nəqliyyatda sıxlıq yaranır, metronun fəaliyyətinə isə icazə verilmir.

K.Əsədov deyir ki, açılmaya gedildi, amma bu açılmanın davamlı olması tənzimlənmədi: “Məntiq yoxdur ki, təhsil müəssisəsi açılıb, ictimai nəqliyyatda ayrıca məktəbli avtobusları xəttə buraxılmır”, - ekspert təəccübünü bildirir.

Bununla belə K.Əsədov ictimaiyyət arasında martın 1-dən məktəblərin yenidən bağlanacağı barədə söz-söhbət gəzdiyini eşitsə də məktəblərin yenidən bağlanacağını düşünmədiyini deyir.

“Mətbuat.az” saytı isə “Parkinq problemi: Sürücülərə 20 manat məbləğində cəza kəsilir” sərlövhəli məqalədə Bakıda avtomobil dayanacaqlarında sürücülərə kəsilən cərimələr ınüzakirəyə çıxarılır.

Müəllif deyir ki, parklanma yeri olmayan obyektin önündə avtomobilini saxlayan vətəndaş qayıtdıqda 20 manat cərimə edilməsinin şahidi olur.   

Müəllifə görə, başqa hallar da var, belə ki, avtoparklanma yerlərinin sayı məhdud, xidmət haqqı isə baha olur və əksər vətəndaşlar üçün əlverişli deyil. 

Əmlak eksperti Elnur Fərzəliyev deyir ki, yol kənarında yerləşən bütün binaların birinci, bəzən isə ikinci mərtəbələri müxtəlif profilli obyektlərə çevrilib.

“Yaxşı olar ki, belə bina tikənlər parklanmanı da nəzərə alsınlar, çünki, ərazidə obyektlər varsa, orada avtomobil saxlamaq üçün park yeri də olmalıdır.

Amma bu gün avtoparkların tikilməsi nə obyekt sahiblərinin, nə də ki avtomobillərə cərimələr yazan aidiyyatı qurumların marağındadır” deyə ekspert bildirir.

Ekspertə görə, belə narahatlıqlar ticarət obyektlərində alış-veriş dövriyyəsinə də mənfi təsir göstərir, odur ki, Bakı Nəqliyyat Agentliyi özü avtoparkların salınmasında maraqlı olmalıdır, eyni zamanda bələdiyyələr də avtoparkların salınması ilə məşğul ola bilər.

E.Fərzəliyev  hesab edir ki dünya təcrübəsindən yararlanıb yüngül konstruksiyalı 4-6 mərtəbəli avtoparklar tikmək mümkündür.

“Sfera.az” saytı isə “Metronun bağlı qaldığı hər gün bu qədər pula qənaət edilir - Açılmama səbəbi budur?” sərlövhəli məqalədə hələ də metronun fəaliyyət göstərməməsinin səbəbləri dəyərləndirilir. 

Müəllif deyir ki, COVİD-19 pandemiyasının yayılmaması məqsədilə metronun fəaliyyəti xeyli vaxtdır ki, dayandırılıb.  

Bundan irəli gələrək müəllif bu fəaliyyətsiliyin metroya hansı maddi itkilər vurduğunu diqqətə çəkir.

Müəllifə görə, metro zərərlə işləyən dövlət müəssisələrindən biridir, dövlətin ayırdığı subsidiya nəzərə alınmasa metronun gəliri xərclərindən 3 dəfə azdır.

"Bakı Metropoliteni” QSC-nin 2020-ci ildəki maliyyə vəziyyətinə dair hesabatı hələlik açıqlanmayıb, son hesabat məlumatı 2019-cu ilə aiddir.

Məqalədə vurğulanır ki, metronun 2020-ci ilə olan hesabatı açıqlanmayıb. amma 2019-cu ilin hesabatına görə, metronun illik gəliri 124 milyon manat olub, bunun 69 miyon manatı sərnişin daşımadan, 5,7 milyon manatı reklam, xidmət və s. 49 milyon manatı isə dövlət büdcəsindən ayırılan subsidiyalardan ibarətdir.  

Müəllif deyir ki, 2019-cu il üçün metronun xərcləri təxminən 179 milyon manat təşkil edir. Ən böyük xərc istiqamətləri amortizasiya (torpaq, tikili və avadanlıqlarla bağlı) 95,8 milyon manatdır. 2020-ci ildə metro 200 gündən çox bağlı qalıb.

“Bizimyolinfo.az” saytı isə “Ermənistan Azərbaycanla sərhədə Rusiya hərbi bazasının köçürülməsini istəyir” sərlövhəli məqalədə verlən suala cavab axtarılır.

Müəllif etməni mənbələrinə istinadən bildirir ki, Rusiya Ermənistandakı hərbi bazasının bir hissəsini Qarabağa köçürmək istəyir.

Müəllif virğulayır ki, iddialara görə, Rusiya Ermənistandakı 102 saylı hərbi bazasının bir hissəsini Qarabağa köçürmək fikrinə düşüb, daha dəqiq İrəvan və Moskva bu istiqamətdə ciddi müzakirəyə başlayıb.

Rusiyanın  Ermənistanın Gümrü şəhərində yerləşən 102-ci hərbi bazasının Azərbaycan sərhədlərinə və ya Qarabağı Azərbaycanın ərazisi kimi tanıyan Rusiyanı hərbi bazasını buraya köçürməsi mümkün görünmür.

Müəllif fikrini onunla əsaslandırır ki, Rusiya Azərbaycanla müsbət olan münasibətlərini belə bir addımın atılması ilə gərginləşdirmək istəməz, - hərbi ekspert Ədalət Verdiyev bildirib.

Digər tərəfdən isə Ədalət Verdiyev qeyd edib ki, hərbi bazanın köçürülməsi üçün 10 milyonlarla vəsait sərf edilməlidir: “Bu vəsaitin də Ermənistanın ödəyə biləcəyi mümkün görünmür. Odur ki paylaşılan bu xəbərlər real deyil. Narahat olmağa dəyməz” deyə ekspert mövqeyini ifadə edir.

“Müsavat.com”  saytı isə “Ermənilərin Xankəndində “artsax-artsax” oyunu- nəticə pis ola bilər” sərlövhəli məqalədə politoloq Elxan Şahinoğlu ilə Qarabağda yerləşdirilən ermənilərin separatçı tədbirlərinin böyük fəsadlara səbəb olacağı müzakirə edilir.

Söhbət ondan gedir ki, fevralın 20-də ermənilər Qarabağda Azərbaycanın maraqlarına zidd qanunsuz  tədbir keçiriblər, Rusiya sülhməramlıları isə bunun qarşısını almayıb.

Politoloq deyir ki, Rusiyanın İnkici Qarabağ Müharibəsi əməliyyatlarına müdaxiləsi Qarabağda erməni separatizminin kökünü kəsməyə qoymayıb.

“...əgər Kremlin israrı olmasaydı, bu gün Xankəndi də Azərbaycan Ordusunun nəzarətində olacaqdı, separatçıların bölgədə izi-tozu qalmayacaqdı, ”separatçılığa başlama tarixini" də qeyd edə bilməyəcəkdilər”.

Amma politoloq bunu da vurğulayır ki, indi reallıq fərqlidir  və vəziyyəti də bundan çıxış edərək dəyişmək lazımdır.

Politoloqs görə, Azərbaycanın ilk hədəfi Laçın dəhlizinin üzərindən Ermənistanla sərhəddin nəzarətə götürülməsidir ki, oradan kimsə ölkəyə keçə bilməsin. İkinci hədəf isə separatçıları ram etməsi olmalıdır: “Bunları etməsək, təəssüf ki, erməni separatçıların təxribatları davam edəcək”,- E.Şahinoğlu bildirir.