Media-icmal 24.04.18

Yeni hökumət komandasının tərkibinə fərqli baxış, işsizliyə görə sığorta ödənişlərinə münasibət bugünki (24 aprel 2018-ci il) medianın aparıcı mövzularındandır...

İslahat komandası

"Azərbaycan" qəzeti "İlham Əliyev dövlət idarəetmə sisteminin növbəti və əsaslı islahatlarına başladı" sərlövhəli məqalədə dövlət başçısı tərəfindən "hökumət komandası"nın təşkilini dəyərləndirir.

Müəllif komanda tərkibində həm yaşlıların, həm də gənclərin olmasını dövlət başçısının inkişaf strategiyasının icrasını "təcrübəli, həm də gənclərdən ibarət peşəkar komandaya həvalə etməsi" adlandırır.

Müəllif deyir ki, ölkədə sistemli, geniş islahatlar gedir, hər sahə üzrə konkret layihə var, vəzifə-məsuliyyət bölgüsü düzgün müəyən edilib, hüquqi-qanunvericilik islahatların uğurlu gedişini təmin etməyə hesablanıb: "İlham Əliyevin "daha güclü, daha inkişaf edən Azərbaycan, daha rifahlı vətəndaş" konsepsiyasının müasir dövrdə icrasını həyata keçirəcək hökumət də məhz bu yeni situasiyada fəaliyyət göstərəcək. Təşəbbüskarlıq, çeviklik, səmərəlilik, şəffaflıq, məsuliyyət kimi dəyərlər Prezidentin məmurlardan hər zaman əsas tələbi olub".

Daha sonra müəllif Baş nazir vəzifəsinə məhz Novruz Məmmədovun təyin olunması səbəbləri üzərində dayanır.

Müəllif deyir ki, N.Məmmədovun xarici siyasət sahəsində peşəkar məmur, bacarıqlı nəzəriyyəçi alim olması, xaricdə və ölkədə baş verən proseslərə prinsipial münasibət ifadə etməsi, Azərbaycan əleyhinə qərəzli kampaniyalara reaksiya verməsi, Heydər Əliyev siyasi xəttinə və İlham Əliyev missiyasına sədaqəti, yüksək təşkilatçılıq qabiliyyəti Baş nazir təyin olunmasının əsas səbəbləri sırasındadır.

Müəllifə görə, digər sahələrdə də baş verən kadr dəyişiklikləri prezidentin bu istiqamətlər üzrə də yeni siyasət yürüdəcəyinin göstəricisidir.

Məqalə müəllifi deyir ki, aqrar sahə prioritet sahədir, amma icra mərhələsində çeviklik və səmərəlilik hər zaman təmin edilmirdi, bu da kadr sahəsində dəyişikliklərə səbəb oldu: "Görünən odur ki, Prezident iqtisadiyyatımızın ən prioritet sahəsinə çevrilən aqrar sektorun idarəçilik sistemini beynəlxalq miqyasda böyük təqdirlə qarşılanan "ASAN" modelinə uyğunlaşdırmaq niyyətindədir".

Müəllifə görə, Nazirlər Kabinetinin yeni tərkibində Sahil Babayev, Mikayıl Cabbarov, İnam Kərimov, Ramin Quluzadə, Vüsal Hüseynov, Fuad Muradov, Samir Nuriyev və s. nisbətən gənc yaşlı məmurların təmsil olunması idarəçilikdə irs-varis ənənəsinin növbəti uğurlu təzahürüdür.

"Yeni" adı ilə gələn köhnələr

"Azadlıq.info" da isə "Başımıza gələn nazir" sərlövhəli məqalə oxumaq olar.

Müəllif aprelin 11-də keçirilmiş prezident seçkilərindən sonra yeni hökumət komandasının formalaşdırılması ilə bağlı təyinatları dəyərləndirir.

Yazı müəllifi deyir ki, "analoqsuz" 11 aprel seçkilərindən sonra elə "analoqsuz" kadr dəyişikliklərinin baş verəcəyi məlum idi, amma bəziləri çox uzağa gedərək, tamamilə yeni komanda ümidində idilər: "Bəzi ekspertlər ümid bolluğuna düşərək yeni komandanın meydana çıxacağını proqnozlaşdırırdılar. Amma "sən saydığını say, gör əlahəzrət nə sayır" deyimi aktuallığını saxladı".

Müəllif Baş nazir postunda 82 yaşlı Artur Rəsizadəni 71 yaşlı Novruz Məmmədovun əvəz etməsini "qoca baş nazirin əvəzinə yarımqoca gətirilməsi" kimi dəyərləndirir: "Əslində təəccüblü heç nə yoxdur, ağıllı adamlar başa düşürdü ki, başımıza gələn yeni nazir dişsiz, müstəqil qərar qəbul etmək səlahiyyəti olmayan, iradə qıtlığı yaşayan şəxs olmalıydı. Bu mənada Novruz Məmmədov ən ideal namizəd idi".

Məqalə müəllifi yeni Baş nazirin anti-Qərb məzmunlu "tvit"ləri ilə məşhur olduğunu deyərək, seçmələr də təqdim edir: "Məsələn, "Avropa liderləri atdıqları addımların nəticəsini düşünmür", "Azərbaycan xarici siyasətində Rusiyanın maraqlarını nəzərə alır", "Mövcud münaqişələr xüsusən Qərb dövlətlərinin siyasətinin nəticəsidir", "Varşava Müqaviləsinin fəaliyyətinin dayandırılmasından sonra dünya ədalət prinsiplərini saxlaya bilməyib" və s.

Müəllif vurğulayır ki, N.Məmmədov bütün fəaliyyəti boyu "Ermənistanın atası" olan Rusiyaya sevgisini, demokratik dünyaya isə nifrətini gizlətməyib.

Yazi müəllifi iddia edir ki, hökumətdəki "radikal islahatlar" 11 aprel seçkilərinin nəticələrinə tam adekvatdır: "Bu kadr-madr oyunu bir daha göstərdi ki, hakimiyyət nəinki şəffaf seçki keçirməyə, neqativ ənənələrə son qoymağa, hətta kadr dəyişikliyi etməyə də qadir deyil. Yeni komanda yenə də köhnələrdən ibarət oldu".

Müəllifin iddiasına görə, bu, həm də 700 min üzvü olduğunu iddia edən "Yeni Azərbaycan" Partiyasının 7 nəfər yeni sima təqdim edə bilməməsinin göstəricisidir.

Məqələ müəllifi deyir ki, yeni heç bir komanda yoxdur və yeni adı ilə gələnlər köhnələrin "yeni" adı ilə ortaya çıxmasıdır və hamı gördü ki, yeni baş nazir başımıza köhnədən gələnlərdəndir.

Kimsə işləmək istəməycəksə...

"Exo" qəzetində isə diqqəti "Azərbaycanda iş adamlarına qarşı yeni cərimələr təklif ediblər" sərlövhəli məqalə diqqət cəlb edir.

Müəllif işsizliyə görə sığorta ödənişlərini ekspertlərlə müzakirəyə çıxarır.

Müəllif deyir ki, rəsmi statistika ölkədə işsizlərin sayının çox olmadığını deyir, amma nəzərə alsaq ki, heç də bütün işsizlər məşğulluq idarələrinə müraciət etməyiblər, o zaman rəsmi rəqəmlərlə real rəqəmlər güclü şəkildə fərqlənə bilər.

Müəllif xatırladır ki, 2018-ci ilin fevral ayında 19111 nəfər işsiz qeydə alınıb.

Yazı müəllifi həm də xatırladır ki, bu il yanvar ayının 1-dən işsizliyə görə müavinətlər ləğv olunub, onları işsizliyə görə sığorta ödənişi əvəz edib, bu sığorta ödənişlərini Sığorta Fondu ödəyir.

Müəllif deyir ki, işsizliyə görə məcburi sığorta ödənişlərini icra etməməyə görə sanksiya tətbiq edilməsi təklif olunur.

Məqalədə deyilir ki, bununla bağlı Cinayət Məcəlləsinə vergidən, işsizliyə görə sığorta ödənişlərindən (20 min manatdan 100 min manata qədər) yayınmaya görə dəyən ziyanın iki qat mislindən dörd qat mislinə kimi cərimə, iki il islah işləri və ya üç il həbs cəzası nəzərdə tutulur.

Ekspert Nəriman Ağayev Fondun yaradılmasını müsbət hesab etdiyini deyir.

N.Ağayevin ididasına görə, qeyri-formal əmək bazarına gəlincə, burada 400 min nəfərə yaxın şəxs çalışır, odur ki, bu əməyin leqallaşdırılması üçün sərt tədbirlər olmalıdır.

Müəllif isə deyir ki, heç də bütün ekspetlər işsizliyə görə sığorta ödənişini dəstəkləmir, bunu iş adamları üçün əlavə yük kimi dəyərləndirirlər.

Ekspert Cəmaləddin İsmayılov deyir ki, cərimələr əsaslı nəyəsə səbəb ola bilməyəcək. O, burada müəyyən sosial narazılığa səbəb ola biləcək ədalətsizlik də görür: "Kimsə hansısa xoşagəlməz səbəb üzündən işini itirəcək və ya elələri var ki, işləmək istəmir,başqasının hesabına yaşamaq istəyir, buna görə səhər tezdən durub işə gedən, 8 saat işləyən şəxs qazandığının bir hissəsini ona verməlidir?".