Deputat: "Azərbaycanın Qərbə və ya Rusiyaya daha meylli olduğu fikirlərin əsası yoxdur"

Son zamanlar Azərbaycan-Qərb münasibətləri tez-tez müzakirə olunur. Münasibətlərdə gərginlik hiss olunur, rəsmi şəxslər tərəfindən müxtəlif ittihamlar səslənir. Bəzi ekspertlər hesab edir ki, Azərbaycanın yeni vektorunda Qərbə yer yoxdur, əksinə ölkə siyasi müstəvidə Rusiyaya daha da yaxınlaşır. Hətta Ermənistanla-Azərbaycan arasında sülh müqaviləsinin da Rusiyaya görə imzalanmaması, rəsmi Bakının mövqeyi məhz Moskva ilə uzlaşdırması fikirləri səslənir.

Hakim Yeni Azərbaycan Partiyasının Milli Məclisdəki deputatı Hikmət Babaoğlu mövzu ilə bağlı Turana bildirib ki, Azərbaycanın əsas ticarət tərəfdaşı Qərb, Avropa ölkələridir: “Eyni zamanda əgər Azərbaycanın əsas iqtisadi, siyasi, strateji vektorlarına diqqət etsək, görəcəyik ki, bu vektorların istiqaməti nə Qərbədir, nə Şərqədir, nə Şimala, nə də Cənubadır. Azərbaycan xarici siyasətini təyin edən onun milli maraqlarıdır və bu ən doğru vektordur”. Deputat qeyd edib ki, hazırkı mərhələdə Azərbaycanın Qərbə və ya Rusiyaya daha meylli olduğu fikirlərin əsası yoxdur: “Azərbaycanın həyata keçirdiyi bütün iqtisadi layihələr, kommunikasiya layihələri, enerji layihələri və perspektivdə nəzərə tutulduğu yaşıl enerji layihələri və eyni zamanda Azərbaycanda müasir neft-kimya və digər sənayenin qurulması ilə bağlı əsas istiqamət yenə Qərbdir. Belə olan halda hansısa epizodik lokal təhlilə görə Azərbaycanın xarici vektorunun dəyişikliyi haqqında fikrini söyləmək doğru deyil”.

Sülh məsələsinə gəldikdə isə H.Babaoğlunun sözlərinə görə, siyasət rasionallığı sevir: “Biz coğrafiyamıza məhkumuq və yaşadığımız coğrafiyada Rusiya çox təsirli bir aktordur. Regional proseslərdə onun və digər qonşularımızın da öz maraqları var. Ona görə də etibarlı, uzunmüddətli sülh üçün digər qonşu faktoru, digər yardımçı faktorlar kimi, Rusiya faktoru da nəzərə alına bilər”.

O, hesab edir ki, buna ümumiyyətlə Azərbaycan-Rusiya münasibətlər kontekstində yox, daha çox Ermənistan-Rusiya kontekstində izah edilsəydi, daha düzgün nəticəyə gəlinə bilərdi: “Nəticə etibarilə Azərbaycanın ərazisində Rusiyanın hərbi iştirakçılığı yoxdur, amma Ermənistanın ərazisində var, Rusiyanın Azərbaycana iqtisadi baxımından təsir imkanları yoxdur, amma Ermənistana var. Ona görə də bu barədə daha çox Ermənistan düşünməlidir. Azərbaycan-Rusiya münasibətləri bərabər tərəfli münasibətlərdir. Ona görə də səsləndirilən fikirlər dəqiq analiz nəticələri olmadığına görə, tənqidə də dözmür”.