Tbilisidə etirazlar, polislə toqquşmalar

Tbilisidə iğtişaş polisi cümə gecəsi Rüstəveli prospekti və Çiçinadze küçəsində Gürcüstan Parlament binasının qarşısına toplaşmış minlərlə etirazçını dağıtmaq üçün su şırnaqları tətbiq edib. Rustaveli prospekti, xüsusilə parlamentin qarşısındakı meydan və xiyabanlar etirazçılardan tamamilə təmizləndi. Etirazlar Baş nazir İrakli Kobaxidzenin Gürcüstanın Avropa İttifaqına üzvlüklə bağlı danışıqlarını 2028-ci ilə qədər təxirə salmaq planlarını elan etməsindən sonra noyabrın 28-də axşam başladı.Onun hökuməti həmçinin 2028-ci ilə qədər Aİ büdcə qrantlarından imtina etmək niyyətində olduğunu bildirdi və Gürcüstanın həmin dövrə qədər iqtisadi baxımdan üzvlük danışıqlarına başlamağa hazır olacağını iddia etdi.

Gürcüstan Daxili İşlər Nazirliyi dəfələrlə etirazçılardan təhlükəsizlik məsələlərini əsas gətirərək dağılışmalarını tələb etdi. Lakin gecə gərginlik artdı və etirazçılarla polis arasında toqquşmalar baş verdi. Təxminən 7°C temperaturda su şırnaqları ilə isladılmış çoxlu sayda etirazçı geri çəkilmək çağırışlarını nəzərə almayaraq yerində qaldı.

İğtişaşlar nəticəsində üç polis əməkdaşı və onlarla etirazçı yaralandı, bəzilərinə isə polis tərəfindən bibər qazı tətbiq edildikdən sonra tibbi yardım göstərildi. Gərginliyin artdığı vaxt təcili yardım maşınları yaxınlıqda yerləşdirildi.

Gürcüstan Prezidenti Salome Zurabişvili cümə axşamı gec saatlarda nümayişçilərə qoşularaq hökumətin qərarını qınadı və yeni parlament seçkilərinə çağırış etdi. “Bu günki konstitusiya çevrilişi Gürcüstanın Avropaya gedən yolunu bitirdi və bizi Rusiyaya doğru itələdi,” – deyə o, jurnalistlərə bildirib. Zurabişvili, hakim “Gürcü Arzusu” partiyasını Avropa inteqrasiyası ilə bağlı konstitusiya öhdəliklərini pozmaqda ittiham edərək onun qatı tənqidçisi kimi çıxış edir.

Etiraz hərəkatı oktyabr ayında keçirilmiş parlament seçkilərinin saxtalaşdırıldığını iddia edən müxalifət partiyalarını fəallaşdırıb. Seçkilərdən sonra Parlament boykot edən müxalifət liderləri növbədənkənar seçkilərin keçirilməsini tələb edirlər. Zurabişvili hökumətə təzyiq göstərmək və qərarını dəyişməyə məcbur etmək üçün Aİ səfirləri və müxalifət nümayəndələri ilə görüşüb.

Baş nazir Kobaxidze öz mövqeyini müdafiə edərək Aİ-nin danışıqlar perspektivindən “şantaj aləti” kimi istifadə etdiyini iddia etdi. Hökumətinin "Yalnız Sülh, Ləyaqət və Rifahla Avropaya" adlı proqramını təqdim edən Kobaxidze, Gürcüstanın Aİ-yə inteqrasiyasının yalnız ölkənin öz şərtləri əsasında baş verəcəyini vurğuladı.

“Aİ üzvlüyü ideyası bir mərhəmət aktı kimi qəbul edilə bilməz,” – deyə Kobaxidze bildirib və Gürcüstanın 2030-cu ilə qədər Aİ standartlarına çatacağını bəyan edib.

Gürcüstanın Aİ ilə danışıqları təxirə salmaq qərarı ölkənin siyasi həyatında dönüş nöqtəsi olaraq qəbul edilir. Bu, hökumət, müxalifət və ictimai rəy arasında bölünmələrin dərinləşməsinə gətirib çıxarır. Bu qərarın Gürcüstanın xarici əlaqələri və daxili sabitliyinə növbəti illərdə əhəmiyyətli təsiri ola bilər.