Media-icmal 24.10.20

"Azərbaycan" qəzeti "3 şəhər, 3 qəsəbə, 149 kənd…" sərlövhəli məqalədə sentyabrın 27-dən başlanmış hərbi əməliyyatlarda Azərbaycanın uğurlarını dəyərləndirir.

Müəllif deyir ki, 30 ilə yaxın erməni işğalı altındakı ərazilər bir-birinin ardınca azad edilir, bu ərazilərdə Azərbaycan bayrağı dalğalanır. Müəllif əlavə edir ki, artıq Azərbaycan əsgərinin ayaq səsləri Şuşa, Xankəndi yaxınlığında eşidilir.

Daha sonra müəllif diqqətə çatdırır ki, oktyabrın 23-də Qubadlı, Cəbrayıl, Xocavənd rayonarnın üst-üstə daha 13 kəndi işğaldan azad edilib. 

Müəllif vurğulayır ki, uğurlar bununla bitməyib, işğalla bağlı Azərbaycanın nəzarətindən kənarda qalan Azərbaycan-İran sərhədinin 132 kilometrlik hissəsinə də 27 ildən sonra nəzarət bərpa edilib.

Yazıda vurğulanır ki, sentyabrın 27-dən bu yana Azərbaycan Ordusu 155 yaşayış məntəqəsini azad edib: "Onların arasında Füzuli, Cəbrayıl, Zəngilan şəhərləri, Hadrut, Mincivan və Ağbənd qəsəbələri var. 149 kənd isə Füzuli, Cəbrayıl, Zəngilan, Xocavənd, Tərtər və Qubadlı rayonlarını əhatə edir", deyə müəllif bildirir.

Müəllif əlavə edir ki, Azərbaycan Ordusu bütün torpaqlarımızı tam azad edəcək və bizim üçün milli qürur məsələsi olan Şuşada, Xankəndidə Azərbaycan bayrağı dalğalanmağa başlayacaq, hər bir azərbaycanlı səbrsizliklə həmin tarixi anları gözləyir.

"Azpolitikainfo" "Danışıqlarda Rusiya ilə birgə Türkiyə də olmalıdır! - Ərdoğandan yeni açıqlamalar" sərlövhəli məqalədə müəllif Qarabağ probleminin həllilə bağlı danışıqlarda Türkiyənin aktivləşməsi məsələsini gündəmin müzakirəsinə daşıyır.

"Azərbaycan deyir ki, Ermənistan bu problemin həllində Rusiyanı təklif edirsə, biz də Türkiyəni təklif edirik. Rusiya Qarabağ problemilə bağlı nə qədər sülh və sabitlik istəyirsə Türkiyə də ən az o qədər istəyir. Rusiyanın regionda nə qədər söz haqqı varsa, Türkiyənin də bir o qədər haqqı olduğuna inanıram". Bunu Türkiyə prezidenti Ərdoğan oktyabrın 23-də bildirib.  

O deyir ki, ATƏT-in Minsk qrupu 30 il ərzində ortaya nəticə qoya bilməyib, odur ki, Azərbaycan danışıqlar formatında dəyişiklik istəyir və bunda haqlıdır.

Türkiyə prezidenti əlavə edir ki, ölkəsi ATƏT-in Minsk qrupunun üzvü olduğu üçün məsələnin diplomatik yolla həllində yer alması mümkündür və hələ ki, Rusiya bunun əleyhinə hər hansı fikir ifadə etməyib.

O əlavə edib ki, bu sərhəd təhlükəsizliyi, sülh danışıqlarında Rusiya ilə birgə Türkiyə də olmalıdır, bu məsələdə hər halda Rusiyanın mənfi rəyi yoxdur, bunun əksini deyənlər isə öz şəxsi qənaətlərini ifadə edirlər.

Türkiyə prezidenti yada salır ki, Suriya və Liviya məsələsində Rusiya ilə ortaq fəaliyyətləri var və Azərbaycan-Ermənistan məsələsində də müvafiq addımlar ataraq sülhü bərqərar edə bilərlər. 

"Müsavat.com" "Rus politoloq: Azərbaycanda kapitalın qorunması siyasəti nəticə verir" sərlövhəli məqalədə müəllif işğaldan azad edilmiş ərazilərdə iqtisadi inkişaf barədə politoloq Aleksandr Karavayevlə söhbətləşir.  

Onun fikrincə, Azərbaycan ərazilərinin erməni işğalından azad edilməsi fonunda ölkəyə investisiya qoyuluşlarının artacağını gözləmək olar.

Ekspert hesab edir ki, ərazilərin bərpası əsas məsələdir, azad edilmiş yaşayış məntəqələrinin və kənd təsərrüfatına yararlı torpaqların bərpası ilə bağlı hələ açıqlanmayan proqram var: "Proqram bir neçə mərhələdən ibarət olacaq. İlk illərdə infrastruktur bərpa ediləcək: su kəmərləri, elektrik şəbəkələri, qaz təchizatı sistemləri yoluna qoyulacaq. Yol infrastrukturunun bərpası üçün əhəmiyyətli işlər görülməsi nəzərdə tutulub", deyə ekspert bildirir.

 Onun fikrincə, mənzil və inzibati-ticari tikinti kimi iş həcmi həddindən artıq böyükdür, təxminən, 50 yaşayış məntəqəsi var, təhlükəsizlik səbəbi ilə işğaldan azad olunmuş ərazilərin yalnız bir hissəsinin bərpa olunacağı gözlənilsə belə, görüləcək iş çoxdur.

Ekspertə görə, belə yaşayış məntəqələrinin sayının hər gün artdığını nəzərə alsaq, bütün bunların 2021 və 2022-ci illərdə ÜDM artımına ən azı 1,5%, bəlkə də daha çox təsir edəcəyini proqnozlaşdırmaq olar.

Ekspertin sözlərinə görə, 2020-ci ilin ilk yarısında Azərbaycana birbaşa xarici investisiyalar 23,5% artaraq 2 milyard ABŞ dollarını keçib. Onun sözlərinə görə, buna səbəb çoxsaylı azərbaycanlı investorların vətənə qayıtmağa başlamalarıdır: Mərkəzi Bank xaricə Azərbaycan investisiyalarında iki dəfə azalma qeydə alındığını açıqlayıb. Bu, ölkədə kapitalın qorunması siyasətinin nəticə verdiyini göstərir.