Media-icmal 24.11.18

Prezidentin Türkmənistan səfərinin nəticələri, Badamdar sürüşmə zonasındakı vəziyyətə rəsmi baxış, tikinti materillarındakı bahalaşma və s. məsələlər bugünki (24 noyabr 2018-ci il) medianın aparıcı mövzularındandır...

Prezidentin səfərinin praktiki nəticələri - şərh

"Yap.org.az" saytında "Hikmət Hacıyev: imzalanmış sənədlər Azətbaycan Prezidentinin Türkmənistana səfərinin praktiki əhəmiyyətini aydın göstərir" sərlövhəli məqalədə Prezident İlham Əliyevin Türkmənistan səfərinin nəticələri şərh edilir.

Çoxcəhətli səfərə şərh verən Prezident Administrasiyasının (PA) xarici siyasət məsələləri şöbəsinin müdir müavini Hikmət Hacıyev deyir ki, istər dövlət baçısının xaricə səfərləri, istər xarici ölkələrin yüksək səviyyəli nümayəndə heyətlərini qəbul etməsi Azərbaycanın beynəlxalq əlaqələrinin genişləndirilməsi, digər dövlətlərlə qarşılıqlı faydalı əməkdaşlığının inkişaf etdirilməsində xüsusi əhəmiyyətə malikdir.

Noyabrın 21-22-də həyata keçirilən səfər çərçivəsində 20 sazişin və dövlət başçılarının Birgə Bəyanatının imzalanması səfərin praktiki əhəmiyyətini və nəticələrini açıq şəkildə nümayiş etdirir", PA rəsmisi səfərin nəticələrinə belə şərh verir.

H.Hacıyev vurğulayır ki, səfər çərçivəsində imzalanan sənədlər siyasi, nəqliyyat-logistika, tranzit daşımalar və onların idarə edilməsi, uzunmüddətli iqtisadi-sənaye əməkdaşlığı, elm-təhsil və humanitar sahələri əhatə edir.

PA rəsmisi deyir ki, imzalanan Birgə Bəyanatda dövlət başçıları bir-birinin suverenliyi, ərazi bütövlüyü və beynəlxalq səviyyədə tanınmış sərhədlərinin toxunulmazlığını qətiyyətlə dəstəklədiklərini bir daha təsdiqləyiblər.

Müdir müavini deyir ki, dövlət başçıları bu sənəddə münqişələrlin ərazi bütövlüyü çərçivəsində və sülh yolu ilə həllini də vurğulayıblar.

H.Hacıyev vurğulayıb ki, Azərbaycanda və Türkmənistanda paralel surətdə multimodal nəqliyyat sistemləri, dəniz limanları, yol-nəqliyyat infrastrukturu yaradılıb.

PA rəsmisi bildirir ki, dövlət başçısının Türkmənistana səfəri və səfər əsnasında imzalanmış sənədlər iki ölkənin nəqliyyat sistemlərinin inteqrasiyasına, nəqliyyat və digər sahələrdə əməkdaşlığın müqavilə-hüquq bazasının və hökumət səviyyəsində operativ əlaqələndirmə mexanizmlərinin yaradılmasına əsaslı təkan verib.

Son olaraq H.Hacıyev deyir ki, Azərbaycan və Türkmənistan yalnız regional səviyyədə deyil, Avrasiya qitəsi boyunca Şərq-Qərb dəhlizinin inkişafına öz mühüm töhfələrini verirlər.

H.Abutlalıbov: Biz o evləri sökək, siz də...

"Modern.az"da "Hacıbala Abutalıbov: "Biz o evləri sökəcəyik, siz də buna şahid olacaqsınız-özəl" sərlövhəli məqalə oxumaq olar.

Müəllif xatırladır ki, oktyabrın 12-dən Badamdar şossesində sürüşmələr baş verir, proses indi də davam etməkdədir.

Yazı müəllifi vurğulayır ki, bu ərazidə vəziyyətin normallaşdırılması barədə Baş nazirin müavini Hacıbala Abutalıbov sayta açıqlama verib.

H.Abutalıbovun sözlərinə görə, bu sahədə hökumətin Azərbaycana dəvət etdiyi yapon mütəxəssislərin araşdırmaları davam edir və araşdırmalar növbəti ilədək davam edəcək.

"Yapon mütəxəssisləri araşdırma apardıqdan sonra belə qənaətə gəlib ki, sürüşmə sahəsi genişlənməlidir. Artıq yaponlar Fövqəladə Hallar Nazirliyilə (FHN) müqavilə bağlayıblar. Belə nəticəyə gəliblər ki, alınan avadanlıqlar 5 istiqamətdə qurulmalı və 4 ay ərzində işləməlidir. 4 aydan sonra araşdırmaların nəticəsi olaraq hazırlanan layihə FHN-ə veriləcək. FHN layihəni ekspertiza edib təsdiqlədikdən sonra ərazidə işlərə başlanacaq, işlər 2019-cu il iylun 1-də tam yekunlaşacaq".

Baş nazirin müavini ərazidəki evlərin mütləq şəkildə söküləcəyini deyir, yapon mütəxəssislər təkcə evləri yox, hətta evlərin kənarlarını da yoxlayacaqlar.

"Çünki sürüşmə sahəsi 2 dəfə böyüyür. Mütəxəssislərin gəldiyi nəticədə biz gördüyümüz sahədən iki dəfə böyük sahə yaranacaq. Onlar bu gün də o qənaətdədirlər ki, evlər sökülməlidir".

Nazirlər Kabinetinin rəsmisi deyir ki, yapon mütəxəssislər hələ ki, 2019-cu il aprelin son, mayın əvvələrinə kimi gözləməyi qərara alıblar, bu da həmin müddətdə bütün araşdırmaları apararaq layihənin hökumətə təqdim olunması ilə bağlıdır: "Fövqəladə Hallar Nazirliyi ekspertiza etdikdən sonra gec-tez o evlər söküləcək. Biz qərar verəcəyik, siz də bunların şahidi olacaqsınız".

H.Abutalıbov yapon mütəxəssislərə istinadən belə bir xəbərdarlıq da edib ki, ərazidə böyük sürüşmələr gözlənilir: "Dünən də (noyabrın 23-də- red.) bunun əyani şahidi olduq. Belə ki, evlərdən birinin yanında dayanan böyük daş kütləsi sürüşdü.

Xoşbəxtlikdən ortada dayanıb, amma sürüşəcək, o biri daşlar da sürüşəcək".

Baş nazirin müavini bu ərazidəki evlərdə yaşamağın təhlükəli oldğunu, bunun qarşısını almaq üçün yaxın 2-3 gün ərzində burada polis məntəqələrinin yaradılacağını, bununla bağlı Səbail rayon Polis İdarəsinə məktubla müraciət etdiyini deyir, həm də villa sahiblərinə tənəli eyham vurur: "Ərazidəki villa sahibləri çağırışlara məhəl qoymayaraq, yaşamağa davam edir. Kim ki, verdiyimiz qərarı pozur, özü cavabdeh olacaq və məsuliyyət daşıyacaq. Əgər insan öz malını həyatından çox sevirsə, o, insanlıqdan kənardır".

Qeyd edək ki, 2018-ci il oktyabr ayının 12-də gecə saatlarında Bakı şəhəri Səbail rayonu ərazisində - Badamdar şossesində (Badamdarla 20-ci sahəni birləşdirən yol) torpaq qatı asfaltın üstünə qədər gəlib. Sürüşən torpaq qatının eni 250, uzunluğu 200, hündürlüyü isə 15 metrdən artıqdır. Hadisə nəticəsində həmin yolda nəqliyyatın hərəkəti məhdudlaşdırılıb və yamacda yerləşən 8 fərdi yaşayış evinin (villa) sahiblərinə evləri müvəqqəti boşaltmaq tapşırılıb. Tapşırıqlara məhəl qoymayanlar villalarında yaşamaqda davam edirlər.

Bahalaşmaqda olan mişar daşları

"Yeni Müsavat" qəzetində isə "Kubik bahalaşdı - səbəb həbslərdir, yoxsa... sərlövhəli məqalə diqqət cəlb edir.

Müəllif tikinti bazarında mişar daşlarının bahalaşmasının səbəbini iqtisadçı-ekspet Natiq Cəfərli ilə müzakirəyə çıxarıb.

Müəllif iddia edir ki, son günlər ölkənin tikinti bazarında bəzi tikinti materiallarının qiymətində artım müşahidə edilir və xüsusilə də mişar daşlarının (kubik) qiyməti az da olsa bahalaşıb.

Yazı müəllifi daxil olan məlumata əsasən deyir ki, hazırda Qaradağ daşının qiyməti 45-47 qəpikdir.

Müəllifin sözlərinə görə, daş bazarında çalışanların fikrincə, bahalaşmaya son zamanlar karxanalara qarşı atılan addımlar da təsir göstərib, belə ki, bəzi işbazlar prosesdən istifadə edib, qiymətləri qaldırırlar.

Məqalə müəllifi deyir ki, ekspertlər bu qiymət artmını 2015-ci illə müqayisədə tikinti sektorunda aktivliklə əlaqələndirirlər, amma məsələ budur ki, hazırda Bakıda tikilən binalarda kubikdən çox az hallarda istifadə edilir.

Müəllif deyir ki, mişar daşına tələbat elə də artmayıb, odur ki, qiymətlərin bahalaşması düşündürücüdür.

Müəllif yada salır ki, Korrupsiyaya qarşı Mübarizə Baş İdarəsi daş karxanaları ilə bağlı 7 cinayət işi başlayıb, Ekologiya və Təbii Sərvətlər Nazirliyi Bakı ətrafında 208 daş karxanasında monitorinq aparıblar, monitorinqlər bitəndən sonra aşkarlanan pozuntularla bağlı 105 akt tərtib edib prokurorluğa göndərilib.

Yazı müəllifi xatırladır ki, bu ilin yay aylarında Bakının havasında qatı toz dumanı müşahidə olunurdu, rəsmi məlumatlarda əvvəlcə bu dumanın digər ölkə ərazisindən gəldiyi bildirilsə də, sonradan səbəb kimi karxanaların da adı hallandı.

Müəllifin sözlərinə görə, daş karxanalarının ətrafında yaşayan sakinlər də mövcud faktı təsdiq edərək bildirdilər ki, bəzi karxanalar müvafiq qurğuları quraşdırmayıb, ətraf mühiti çirkləndirməklə məşğuldurlar.

Ekspert N.Cəfərli bu bahalaşmanı iqtisadiyyatın əsas tələbinə uyğun təklifin azalması, qiymətin artması ilə izah edir. "Son zamanlar karxanaların kütləvi şəkildə bağlanması bazara çıxarılan daşın həcmində azalmaya səbəb olub. Bu, artıq faktdır, ona görə də qiymətlərdə müəyyən artım müşahidə edilir. Bu işlə məşğul olanlar bəzi karxanaların bağlanmasını fürsətə çevirib, qiymətləri süni şəkildə qaldırmaqda da maraqlıdırlar. Karxanaların bağlanması da buna rəvac verir".

N.Cəfərli deyir ki, mişar (kubik) daşlarından ən çox fərdi yaşayış evlərinin və müxtəlif dövlət layihələrinin tikintisində istifadə olunur.

Ekspertə görə, son zamanlar dövlətin maliyyələşdirdiyi layihələrin həcmi artır, gələn il bu, daha da artacaq, nəticədə tələbatın artması da qiymətlərə təsir edəcək.