Media-icmal 25.04.2016

Bakıda BMT Sivilizasiyalar Alyansının VII Qlobal Forumunun keçirilməsi, metropolitenin keçmiş başçısı Tağı Əhmədovun 3 milyon manatı, intiharlar, Qarabağ münaqişəsi fonunda Türkiyə-Rusiya münasibətləri bugünki medianın aparıcı mövzusudur.

“Azərbaycan” qəzeti Bakıda BMT Sivilizasiyalar Alyansının VII Qlobal Forumunun işə başlaması fonunda “Azərbaycan daha bir beynəlxalq tədbirə ev sahibliyi edir” sərlövhəli məqalə dərc edib.

Məqalədə Azərbaycanın son illərdə müxtəlif beynəlxalq qurumların xətlərilə keçirilən tədbirlərə ev sahibliyi etdiyi deyilir. Məqalədə bu tədbirlərə ev sahibliyi Azərbaycanın yüksək təşkilatçılığa, zəngin mədəniyyətə, tolerantlığa malik ölkə olmasının təsdiqi kimi dəyərləndirilir.

Məqalədə oxuyuruq: “Bir daha qeyd edək ki, son illər belə mötəbər tədbirlərin Azərbaycanda keçirilməsi, ölkənin həm də Şərqlə Qərb arasaında mühüm mədəniyyət və tolerantlıq körpüsü olmasından irəli gəlir. Azərbaycan təkcə Cənubi Qafqazın deyil, Avropa tolerantlıq, sülh və inkişaf mərkəzlərindən birinə çevrilib”.

“Suçüstü yaxalandın, ona görə…”

“Azadlıq” qəzeti Bakı metropolitenin keçmiş başçısı Tağı Əhmədovun ləğv edilmiş Milli Təhlükəsizlik Nazirliyinin keçmiş generellarından Akif Çovdarova şantaj qarşılığı olaraq 3 milyon manat pul verməsini araşdırır.

Məqalədə hətta istintaq hətəkəti olaraq T.Əhmədovla A.Çovdarovun üzləşdiriləcəyi də deyilir. Müəllifin düşüncəsinə görə, bu addım ləğv edilmiş MTN-in tərkibinin ölkəyə təhlükə olmasının təsdiqidir.

Daha bir məsələ kimi T.Əhmədovun bu miylonları necə qazanması önə çəkilir və deyilir: “T.Əhmədovun 3 milyon manatı A.Çovdarova rahatlıqla verməsi müəmmalı görünür. Deməli, A.Çovdarov T.Əhmədovun daha çox pulu olduğunu və hansı yollarla qazandığını bilirmiş ki, bu qədər pulu rahatlıqla ala bilib”.

Məqalədə T.Əhmədovun mühüm vəzifə tutduğu halda hüquq-mühafizə orqanlarına müraciət etməməsinə toxunulur və səbəb olaraq belə izah edilir: “Deməli, T.Əhmədov suç üstündə yaxalanıb və nala-mıxa vura bilməyib. Digər tərfdən, T.Əhmədov cinayəti bilib xəbər vermədiyi üçün də məsuliyyət daşıyır”.

Amma burada məqalə vaxtilə T.Əhmədovla “Azadlıq” qəzeti arasında baş vermiş məhkəmə prosesi xatırladılmaqla maraqlı şəkildə sona çatır. “Ey Tağı müəllim, azadlıqların olmadığı ölkədə “Azadlıq”ın 30 min manatını mənimsəmək adamı sığortalamır. Biz “növbəti stansiya”ya keçə bildik və hələ də “qatar”ımız hərəkət edir. Sizi isə həm tarix stansiyada saxlayıb, həm də çovdarovlar “bilet”inizi əlinizdən alıb. Tağı müəllim, “kələklə gələn küləklə gedər deyiblər və düz də deyiblər. Etiraf edin, o 3 milyon manatı haradan almışdımız?”.

İntihara əsas səbəb: kredit borcları

“Əgər insan özünə qəsd etməyin böyük günah olduğunu bilirsə, o zaman onu bu addımı atmağa vadar edən nədir?” Az qala hər gün bir neçə intihar faktı barədə xəbərlər fonunda “Novoe Vremya” qəzetində dərc edilən “İnsan həyatının dəyəri nədir?” sərlövhəli məqalədə bu suala cavab axtarılır.

Məqalədə bu addımın səbəblərinin sadə olmadığı , səbəbləri daha çox psixoloji və sosial sahədə axtarmaq lazım gəldiyi iddia edilir. Məqalədə deyilir:

“Son bir neçə ildə Azərbaycanda intihar halları çoxalıb. Keçən ilin sonundan ikinci devalvasiyadan sonar, demək olar ki, hər həftə intihar baş verir. Bu, bizim cəmiyyətin böyük sosial probleminə dönüb. İntiharların baş verməsində banklara kredit borclarının adı daha tez-tez hallanır. Kredit faizlərinin artırılmasından sonra çıxılmazlığa düçar olurlar, daha pisi, evsiz-eşiksiz qalırlar. İntihar “epidemiyası” yüksək səviyyədədir və əgər işsizlik daha yüksək səviyyədədirsə, ona qarşı necə mübarizə aparasan?”.

Məqalədə deyilir ki, Azəərbaycanda “kommersiya özünüyandırmaları” geniş yayılıb, amma təkcə yox. “Seçilən formanın “populyarlığı” və “səmərəliliyi”nə görə özünü asmaq böyük fərqlə liderlik edir. İkinci yerdə özünü hündürlükdən atmaq tutur, sonrakı yer isə özünü suya ataraq boğulanlarındır. İntiharın qalan bütün halları, demək olar ki, bərabər sayda törənir”.

Məqalədə intiharın hansı hallarının və hansı regionlarda daha tez-tez baş verməsi, potensial “intiharçı”ların kimlər olması, “intiharçı”ların orta yaş həddini müəyyən edə bilmək üçün Suidiloji Mərkəz yaradılması zəruri sayılır. Deylir ki, bu məlumatları toplayan mərkəzin olması məqsədəuyğun qərarlar verilə bilməsi üçün zəruridir.

Məqalədə dövlət səviyyəsində “etimad telefonu” yaradılmasına da ehtiyac olduğu vurğulanır. Qeyd olunur ki, bu halda insanlar depressiyadan çıxa bilmək üçün intihardansa başqa yolu da görə bilərlər. “İndi isə hələlik yalnız bir sual qalır: İnsan həyatının dəyəri nədir?”.

Bu, Azərbaycanı təkləmək ssenarisidir

“Yeni Müsavat” qəzeti “Bakıda rus-türk savaşına start, yoxsa…” sərlövhəli məqalədə Rusiya-Türkiyə münasibətlərini Qarabağ münaqişəsi fonunda araşdırır. Belə ki, bu günlərdə S.Lavrov Ermənistanda Türkiyəni Qarabağ məsələsini müharibə müstəvisinə çəkməkdə ititham edib. Məqalədə S.Lavrovun bu mövqeyinə belə münasibət ifadə edilir. “Rusiya artıq 3-cü 10 illikdir ki, işğalçının, Qarabağ seprataçılarının gözünü də üfürmür, onları hərtərəfli himayə edir. İndi kim münaqişəni, müharibəni qızışdırır probemin beynəlxalq hüquqa əsasən həllini tələb edən Türkiyə, yoxsa Ukrayna, Gürcüstan torpaqlarını zəbt edən Rusiya?”.

Məqalədə qeyd olunur ki, bu addım həm də Türkiyəni problemdən daha uzaq salmaqla Azərbaycanı təkləmək məqsədi güdür. “Sözsüz ki, Lavrovun açıqlamalarının arxasında Azərbaycan-Türkiyə hərbi əməkdaşlığının xüsusən də son illərdə yüksək səviyyəyə qalxması və bu əməkdaşlığın 4 günlük aprel döyüşlərinin nəticələrində müsbət tərəfdən özünü göstərməsindən dolayı bir təlaş, qısqanclıq da dayanır”. 

Məqalədə Azərbaycanın Ukrayna, Pakistan, İsrail, Belarus kimi dövlətlər hesabına güclənməsi də məqsədəuyğun sayılır və deyilir: “Məgər bizim öz kürəyimizi söykəyəcəyimiz bir dövlət, alyans olmalı deyil? Necə olur ki, Ermənistana bu rəva görülür. Azərbaycanın öz təbii müttəfiq(lər)i  ilə yaxınlaşması isə anromal sayılır və qıcıqla qarşılanır?”.