Media-icmal 25.06.20

Gəncədə modul tipli infeksion xəstəliklər korpusunun açılışı, kənd təsərrüfatı məhsullarında bahalaşma ehtimalı, maskaların keyfiyyətsiz hazırlanması və s. məsələlər medianın aparıcı mövzuları olmaqdadır. 

Əgər bunlara əməl olunarsa…           

AzərTAC-da “1 saylı Gəncə Şəhər Xəstəxanasının modul tipli infeksion xəstəliklər korpusunun açılışı olub” sərlövəhli məqalədə  dövlət başçısı İlham Əliyevin Gəncə səfərində xəstəxananın açılışında iştirakı barədə danışılır.

Müəllif deyir ki, prezident İlham Əliyev və xanımı Mehriban Əliyeva  iyunun 24-də 1 saylı Gəncə Şəhər Xəstəxanasının modul tipli infeksion xəstəliklər korpusunun açılışında iştirak ediblər.

Burada açılış münasibətilə çıxış edən dövlət başçısı bir çox məsələlərlə yanaşı ölkədə koronavirus pandemiyası ilə bağlı vəziyyətə də münasibət bidirib.

Dövlət başçısının deməsinə görə, koronavirusla əlaqədar ilkin mərhələdə görülmüş qabaqlayıcı tədbirlər  ölkəni böyük fəlakətdən qorudu.

O bildirib ki, yoluxanların sayı əhalinin ümumi sayı ilə müqayisədə çox aşağıdır, cəmi 13 min insan yoluxub.

Dövlət başçısının deməsinə görə, bu virusun nəticəsində dünyada xəstə sayı kəskin artıb, bir çox ölkələrin səhiyyə sisteminə də böyük zərbə vurub, əslində heç bir ölkənin səhiyyə sistemi sürətlə artan xəstələrin müalicəsinə hazır deyildi.

Onun fikrincə, problem həm də xəstələrə xidmət edən həkimlərin sayı ilə bağlıdır: “Həkimlərin sayı 2-3 ay ərzində arta bilməz. Ona görə bu da bir çox ölkələr üçün böyük problemə çevrilmişdi, o cümlədən bizim üçün”.

Bu ilin may ayında Azərbaycanda karantin rejimindəki yumşalma meylləri barədə danışan dövlət başçısı buna səbəb kimi sağalanların sayının yoluxanların sayından çox olmasını göstərib.

Ancaq son vaxtlar  yoluxma sayının artması barədə danışan prezident buna səbəb kimi  maska taxılmamasını, məsafənin gözlənilməməsini və dezinfeksiyaya əməl olunmamasını göstərib: “Bu üç əsas amil insanları qoruyur. Əgər bu üç amilə əməl olunarsa, onda yoluxmanın sayı kəskin azalacaq...Ancaq biz nəyi görürük? Onu görürük ki, yumşalma tədbirlərindən sonra Azərbaycanda bu qaydalar kütləvi surətdə pozulur və məhz buna görə yenidən məhdudlaşdırıcı tədbirləri tətbiq etdik. Çünki görürdük ki, xəstələnənlərin sayı, dinamikası artır və əgər belə gedərsə, bizim də səhiyyə sistemimiz buna davam gətirə bilməz”.

Anomal havaların yarada biləcəyi bahalıq

Fəsilə uyğun olmayan hava şəraiti, qışda yay, yayda qış fəsli hava şəraitinin müşahidə olunması kimi anomaliyalar kənd təsərrüfatı bitkiləri üçün stress faktoru yaşadır. Bunu kənd təsərrüfatı sahəsi üzrə ekspert Nicat Nəsirli bildirib. (“Hava Kənd təsərrüfatına ciddi ziyan vurdu: bahalaşma gözlənilir.

N.Nəsirli iyun ayının son ongünlüyündə bir sıra qonşu ölkələr kimi Azərbaycanda da  yay fəslinə xas olmayan anomal hava şəraitinin hökm sürdüyünü deyir.

Onun sözlərinə görə, dağlıq rayonlara qar yağması. dolu düşməsi kimi hallar kartof,  arpa sahələrinə, meyvə ağaclarına ziyan vurub.

Mütəxəssisə görə, hazırda kartofçuluqda vegetasiyanın ən aktiv fazasıdır,  dolu nəticəsində tərəvəzin yaşıl kütləsi zədələndiyinə görə ilk növbədə fotosintez prosesi pozulur, şübhəsiz ki, bu, məhsuldarlığa ciddi təsir göstərəcək.

Onun deməsinə görə, Aran bölgələrində daha çox taxıl biçini üçün risklər  var, taxıl biçini isə təzə başlayıb, belə hava şəraiti də taxılçılıq üçün də zərərlidir: “Aran bölgələri üçün dolu, güclü küləklər çox ciddi təhlükədir, əgər bu cür hava müşahidə olunarsa, sahənin ümumilikdə 30-40%-nə ziyan dəyə bilər”.

O hesab edir ki, yayda qar və dolu yağması meyvəçiliyə də ziyan vurur:  N.Nəsirlinin sözlərinə görə, bütün bu faktorlar kənd təsərrüfatında risklərin böyük olduğunu göstərir: “Belə bir məqamda aqrar sığorta kiçik və orta təsərrüfatlar üçün hava və su kimi lazımdır”.

Keyfiyyətsiz maskalar- professordan irad

Ölkəmizdə tibbi maska istehsalına başlasalar da onun keyfiyyət göstəricilərinə məsuliyyətsiz yanaşılır. Bunu isə professor Adil Qeybulla bildirib.

(“Yerli istehsal olan tibbi maskalar niyə keyfiyyətsizdir? – Üzə taxan kimi ipi qırılır”).

Onun fikrincə, bir ədəd normal maska almaq üzə taxan kimi sıradan çıxan belə maskaları almaqdan daha yaxşıdır, belə ki, Azərbaycanda maska istehsalına başlanılsa da keyfiyyət göstəricilərini arxa plana keçiriblər.

Profesor hesab edir ki, prosesdə sui-istifadə hallarına yol verilib ki, istehsal edilən yerli tibb maskalar artıq keyfiyyətsiz şəkildə buraxılır: “Hər bir sahibkar maraqlı olmalıdır ki, istehsal etdiyi mal bazarda keyfiyyətli olsun və ona tələbat yaransın”.

A.Qeybulla deyir ki, buna əməl olunmaması onu göstərir ki, belə maskaları istehsal edən müəssisə sabahı, gələcəyini düşünmür: “Ancaq maskalarla bağlı bu vəziyyət onu deməyə əsas verir ki, postpandemiya dövründə belə keyfiyyətsiz qoruyucu vasitələr istehsal edən müəssisələrin ömrü elə pandemiyanın ömrü qədər olacaq”.