Media-icmal 27.10.20

“Azərbaycan”  qəzeti  “Həkimlər pandemiya ilə mübarizədə də ön sıradadırlar” sərlövhəli məqalədə tibb işçilərinin ölkə insanlarının həyatı və sağlamlığı ilə bağlı fəaliyyətini dəyərləndirir. 

Müəllif deyir ki, hazırda həm Azərbaycan torpaqlarını 30 ildən çox işğal altında saxlayan erməni təcavüzkarlarına, həm də COVID-19 pandemiyasına qarşı müharibə aparılır və hər iki cəbhədə tibb işçiləri fədakarlıq göstərirlər.

“…bu il ölkəyə xeyli müasir tipli təcili tibbi yardım maşını gətirilib, hazırda koronavirus xəstələri üçün 46 xəstəxana, 45 laboratoriya, 11 modul tipli xəstəxana və 2 hospital fəaliyyət göstərir. Aparılan test sayı ölkə üzrə 1 milyonu ötüb. Məqsəd Azərbaycan vətəndaşının sağlamlığının daha etibarlı şəkildə qorunmasıdır”, -müəllif bildirir.

Yazıda vurğulanır ki, virusla səmərəli mübarizə aparan tibb müəssisələrindən biri də Bakı Şəhər Təcili və Təxirəsalınmaz Tibbi Yardım Stansiyasıdır (TTTYS), stansiyaya gündə təxminən 2000-2500 çağırış daxil olur, fasiləsiz iş rejimi təşkil edilib.

“Bizimyolinfo.az”  saytı isə “Ermənistan təyyarələri Rusiyadan silah daşıyır” sərlövhəli məqalədə Ermənistana silah daşınması gündəmin müzakirəsinə gətirilir.

Müəllif deyir ki, son bir neçə gün ərzində Ermənistana aid nəqliyyat-yük təyyarələri bir-birinin ardınca Rusiya aeroportlarına enir.

Müəllifə görə, Ermənistan Hərbi Hava Qüvvələrinin EK-76345 nömrəli (əvvəlki bort nömrəsi 76310 olub, bu yaxınlarda qeydiyyatını dəyişib) təyyarəsi Rostovdakı Platov aerportunda yüklənir. “Atlantic European Airlines” şirkətinə məxsus olan və Ermənistanın maraqları üçün istifadə edilən EK-76074 (əvvəlki bort nömrəsi 76004 olub) bort nömrəli İl-76 təyyarəsi isə oktyabrın 23-də Mineralnıy Vodı aerportunda yüklənirdi. Yüklərin xarakterinin nədən ibarət ola biləcəyini təxmin etmək lazımdır”,- məlumatda deyilir.

Müəllif Ukrayna hərbi ekspertlərinə istinadən deyir ki, Moskva Azərbaycanın hücumunu dayandırmaq üçün Ermənistana silah sistemləri göndərir.

Ekspertlərə görə, Ermənistanın hazırda hava hücumundan müdafiə sistemlərinə çox ehtiyacı var və onunla Qarabağda erməni ordusunun zirehli texnikasını, canlı qüvvəsini məhv edən Azərbaycan aviasiyasını dayandırmaq istəyirlər.

Xatırladaq ki, azərbaycan prezidenti İlham Əliyev oktyabrın 26-da xalqa müraciətində Ermənistana bir aydır durmadan silahlar, o cümlədən ən yeni silahlar daşındığını bildirib.

“Metbuat.az”  saytında  yer alan “ABŞ-da əldə edilən atəşkəs razılaşması qalıcı ola bilməz – şərh” sərlövhəli məqalədə müəllif Ermənistanla Azərbaycan arasında sülh əldə edilməsi barədə tarixçi Elnur Kəlbizadə ilə söhbətləşir.   

E.Kəlbizadə deyir ki, ABŞ-da əldə edilən atəşkəs razılaşması qalıcı ola bilməz: “Bu razılaşmanın qalıcı olması regionda ən azı iki dövləti narazı salır. Bunlardan biri  Rusiya, digəri isə İrandır”. 

O qeyd edib ki, Rusiyada əldə olunan razılaşmadan sonra atəşkəsin Ermənistan tərəfdən pozulması, paralel olaraq həmin dövrdə ABŞ-dan humanitar yardım adı altında müxtəlif təyyarələrin Yeravana uçması bir çox sualları ortaya çıxardı.

Müəllifə görə, əslində Paşinyan hökuməti Rusiyada atəşkəsə getməklə, sonra isə bilərəkdən bu atəşkəsi pozmaqla Rusiyanın nüfuzuna zərbə vurmaq kimi məkrli məqsəd güdürdü. Bu nüfuz zədələndikdən sonra Ermənistanın məhz ABŞ-a üz tutması təsadüfi sayılmaz. “İndi Rusiyada yaxşı başa düşürlər ki, ABŞ vasitəçiliyilə əldə olunan istənilən atəşkəs Rusiyanın regiondakı nüfuzunu zədələyir”.

Müəllif  deyir ki, İran da atəşkəsin ABŞ-ın vasitəçiliyilə əldə olunmasını arzulamır, çünki XX əsrin 90-cı illərində İranın vasitəçiliyilə əldə olunan bütün razılaşmalar məhz digər dövlətlərin onu dəstəkləməməsi səbəbindən pozulub.

“Bu baxımdan hesab etmirəm ki, bu atəşkəs qalıcı olacaq” –  politoloq qeyd edib.

“Yenisabah.az”  saytı “Koronavirus 2021-ci ilin yayına qədər davam edəcək“ – Tibbi Ərazi Bölmələrini İdarəetmə Birliyinin (TƏBİB) rəsmisi” sərlövhəli məqalədə koronavirus infeksiyasına yoluxmanın səbəbləri araşdırılır .

TƏBİB İdarə Heyəti yanında tibbi-elmi komitənin sədri, professor Akif Qurbanov hesab edir ki, Azərbaycanda pandemiyanın ikinci dalğası başlamayıb,

“ Bu gün gördüklərimiz, sadəcə, yoluxanların sayının artmasıdır. Biz əvvəldən xəbərdarlıq etmişdik ki, payız-qış mövsümünün başlaması ilə yoluxanların sayında artım olacaq”,- A.Qurbanov indiki mərhələni dəyərləndirir.

Onun fikrincə, bu dövrdə koronavirus da daxil olmaqla tənəffüs yolu xəstəlikləri şiddətlənməyə başlayır, vətəndaşlar daha məsuliyyətli olmalı, maska ​​taxmalı və sosial məsafəni qorumalıdırlar.

A.Qurbanov  vurğulayır ki, ölkədəki epidemioloji vəziyyət tam nəzarət altındadır, bütün tibbi qurumlar gücləndirilmiş iş rejimində işləyirlər: “…istənilən pandemiya bir ildən çox davam edib. Proqnozlarımıza görə, koronavirus növbəti ilin yayına qədər davam edəcək. Peyvəndləmə başlasa, kollektiv immunitet yaranar və 2021-ci ilin payızına qədər COVID-19-dan qurtula bilərik”, - A.Qurbanov bildirib.