Media-icmal 29.06.21

Media saytları ölkə həyatının aktual məsələlərini dəyərləndirirlər.

“Bizimyolinfo.az” saytında “Mal-qaranı bayıra buraxmırlar ki, susuzluqdan ölməsin” sərlövhəli məqalədə bəhs olunan məsələ dəyərləndirililir. 

Müəllif deyir ki, Biləsuvar rayonunun Təzəkənd və Yuxarı Cürəli kəndinin qurumuş su arxı görünür, bu və digər kəndlərə su İmişlidən gələn Əzizbəyov kanalı ilə 20 gündə bir dəfə bir gün verilir.

Əvvəllər 5 manata olan 2 tonluq su indi 8 manatdır, bu aylarda da insanlar heyvanatın ölməməsi üçün su almağa məcburdurlar.

Məsələ ilə bağlı danışan Biləsuvardan deputat Bəhruz Məhərrəmov deyir ki, iki dəfə artezian quyusu qazdırılıb, amma 4-5 aydır ki, su quyusunu işə sala bilmirlər, 2 dəfə işə salıblar və bir neçə saatdan sonra motor yanıb.

Deputat deyir ki, su problemi Biləsuvarın təməl məsələsidir, problemi aradan qaldırmaq üçün Bolqarçay su anbarı bərpa olunmalı, rayona əlavə içməli su xətti çəkilməlidir.

“Modern.az” saytında isə “Komandirin çaydaşıyanı da medal alırsa… - deputat müharibə veteranlarının narazılığından danışdı” sərlövhəli məqalədə 44 günlük Vətən müharibəsində əsgər və zabitlərin döyüş hünərləri dəyələndirilir.

Məsələ ilə bağlı açıqlama verən deputat Fazil Mustafa deyir ki, ona da çoxsaylı müraciət olub və müharibə işirakçılarının dəyərləndirilməsində subyektivizm ciddi rol oynayır: “Onların içərisində orden və medallara layiqli insanlar kifayət qədərdir. Amma haqqı çatmayanlar da var. Bəzi iştirakçılar komandirlərdən məhz buna görə şikayətlər edirlər. Çünki bəziləri var ki, özünə yaxın olanları siyahıya salır. Belə məsələlərin əslində xüsusi nəzarət qrupu tərəfindən araşdırılmasına ehtiyac var. Əgər araşdırılmadan qiymətləndirilmə aparılsa, narazılıq həmişə olacaq”, deyə deputat bildirir.

Deputat əlavə edir ki, veteran statusunun verilməsi üçün düzgün qiymətləndirmə aparılmazsa, bu, narazılığı daha da artıra bilər, bəzən olur ki, haqqı çatmayanların adı orden və medal siyahısında olur. Bu isə haqqı çatan şəxslərin narazılığına səbəb ola bilir. Ona görə, gözlənilən nəticəni əldə etmək üçün mütləq nəzarət mexanizmi olmalıdır, haqqı çatan insanlara dəyər vermək lazımdır”.

“Moderator.az” saytında isə “İcazə verməsəydilər, bundan yaxşı idi… -əməkdar artist yeni toy qaydalarını qınadı” sərlövhəli məqalədə iyulun 1-dən toy mərasimlərinin keçirilməsi qaydalarını müğənni Firuzə İbadova dəyərləndirir. 

İyulun 1-dən ölkədə toy şənliklərinin müəyən qaydalar çərçivəsində keçirilməsinə icazə verilib, amma bu şərtlərə birmənalı münasibət yoxdur.

F.İbadova toylarda iştirak edə bilmək üçün yeni toy qaydalarının və vaksin vurulmasının şərt kimi irəli sürülməsini qəbul etmir: “Yeni toy qaydaları heç də ürəyimcə olmadı. Şəxsən mən toya getmək üçün vaksin vurdurum və problem varsa, ölüm, uşaqlarım başsız qalsın kimi halları qəbul etmirəm”, deyə müğənni izah edir.

Müğənni vaksin vurulması ilə toy keçirilməsi arasında bir əlaqə görmədiyini diqqətə çatdırır: “Elə ondansa toylara icazə verməyəydilər. Şəxsən yeni toy qaydaları xoşuma gəlmədi. Vallah, toylara icazə verməsəydilər, bundan daha yaxşı idi. Bu, hamısından yaxşı idi. İnsanlar çox incidilir, belə olmaz”, deyə F.İbadova bildirir.