Media-icmal 30.06.20

Koronavirusla bağlı ölkədəki vəziyyət, kirayə sahə təqdim olunması qaydalarındakı problemlər, Kür çayında suyun azalmasının səbəbləri və s. məsələlər medianın aparıcı mövzuları sırasındaır...

Öncə vətəndaşlıq məsuliyyəti

"Azərbaycan" qəzeti "Azərbaycan böyük fəlakətdən qorundu" sərlövhəli məqalədə ölkədə koronavirus pandemiyası ilə bağlı vəziyyəti dəyərləndirir.

Müəllif bildirir ki, koronavirus pandemiyasına qarşı mübarizə davam edir, amma hazırda pandemiya ilə bağlı vəziyyət heç də ürəkaçan ssenari üzrə getmir.

Azərbaycana gəlincə, müəllif deyir ki, ilk vaxtlardan ölkə rəhbərliyi bu məsələyə ciddi yanaşdı, pandemiyaya qarşı qabaqlayıcı və məhdudlaşdırıcı tədbirlər yoluxma sürətini azaltdı, insan itkisi minimum sayda oldu.

Müəllif əlavə edir ki, modul tipli xəstəxanaların qurulması koronavirusla mübarizəyə inanılmaz töhfə verdi, beş belə xəstəxana fəaliyyətdədir, daha beş xəstəxananın tikilməsi gözlənilir.

Müəllifin sözlərinə görə, infeksiyanın erkən aşkarlanması, testlərin aparılması üçün 23 laboratoriya fəaliyyət göstərir.

Müəllifə görə, görülən tədbirlər nəticə versə də karantin rejiminin yumşaldılması ilə bəzi vətəndaşlar karantin qaydalarına əməl etməyiblər. Bu da virusun yoluxmasını təkrar sürətləndirib.

Müəllif deyir ki, gündəlik yoluxma sayı 500-ün üzərinə qalxıb, odur ki, hazırda yoluxma sayı çox olan bir çox şəhər və rayonlarda iki həftəlik xüsusi karantin rejimi tətbiq olunub.

Müəllif hesab edir ki, indiki halda hər bir şəxs vətəndaşlıq borcunu yerinə yetirməli, qaydalara riayət etməli, sağlamlığı və həyatı təhlükəyə atmamalıdır.

"Bizimyol.info.az"da "Kasıblara pulsuz mənzillərin veriləcəyinə dair xəbərlərlə bağlı ekspertdən açıqlama" sərlövəhli məqalədə Mənzil Məcəlləsindəki dəyişiklik şərh edilir.

Belə ki, Mənzil Məcəlləsinə ə dəyişiklik olunması barədə qanun imzalanıb.

Qanuna əsasən, sosial kirayə müqavilələri əsasında bu məcəllə ilə və digər qanunvericilik aktları ilə müəyyən edilmiş əsaslarla yaşayış sahələrinə ehtiyacı olan aztəminatlı vətəndaşlara, o cümlədən sosial müdafiəyə ehtiyacı olan aztəminatlı gənclərə dövlət və ya bələdiyyə mənzil fondunun yaşayış sahələri veriləcək.

Müəllif deyir ki, bu sərəncam bir sıra informasiya resurslarında "kasıblara pulsuz mənzillər verilməsi" kimi paylaşılıb.

İqtisadçı Natiq Cəfərli isə şərhində deyib ki, qanunun icra mexanizmi olmadan onun həyata keçməsi real görünmür.

"Əslində bu qaydalar var idi, hətta valideyn himayəsindən məhrum olan gənclərin xüsusi təyinatlı internatlardan buraxıldıqdan sonra icra strukturlarının və bələdiyyələrin mənzil fondundan mənzillə təmin edilməsi barədə qaydalar var idi", deyə məsələnin yeni olmadığını vurğulayır.

Onun sözlərinə görə, indi bu qaydaların sərhədləri genişləndirilib. "Amma bu, praktikada necə həyata keçiriləcək? Bunun icra mexanizmi yoxdur. Tutaq ki, aztəminatlı ailə bu mənzil və ya torpaqla təmin edilməsə, hara müraciət etməlidir? Bu barədə məlumat verilmir".

Ekspertə görə, ortalıqda belə məsələləri tənzimləyən icra mexanizmi yoxdur, bu qaydaların olmaması onun reallaşmasını, həyata keçirilməsini çətinləşdirir və bir çox hallarda mümkünsüz edir.

Kürdə su azalır: səbəblər 

"Oxu.az" saytı "Kür çayının suyu quruyur, problemlər artır" sərlövhəli məqalədə, müəllif problemlə bağlı fikirlərini bildirir.

Müəllifin sözlərinə görə, Kür çayının Salyan rayonu ərazisindən keçən hissəsində suyun səviyyəsi xeyli azalıb, hətta həyətyanı sahələrdə su quyuları quruyub.

Məqalə müəllifi vurğulayır ki, son 10 gün ərzində Kür çayında suyun səviyyəsi 1-1,5 metr aşağı düşüb. 

Müəllif deyir ki, vahiməli, coşub-daşan Kürə baxdıqda gölməçələr və kiçik adalar görünür və vəziyyətin belə həddə olması su nasoslarının da fəaliyyətinə mənfi təsirini göstərir. 

Yazı müəllifi əlavə edir ki, su nasosları indiki halda tam gücü ilə işləmir, öz növbəsində, bu hal Kürun suyundan suvarma üçün istifadə olunan rayonların ərazisində məhsuldarlığı aşağı salıb. 

Bununla yanaşı, vurğulanır ki, çayda suyun səviyyəsinin həddən artıq aşağı düşməsi su quyularına da təsirsiz ötüşməyib.

Müəllifə görə, məsələ təkcə bununla bitmir, hətta həyətlərdə qazılmış su quyuları da quruyub.

Mütəxəssislərin fikirlərinə istinad edən müəllif bunu da deyir ki, Mingəçevir Su Anbarında suyun tənzimlənməsi problemi həll olunmayınca vəziyyət kritik olaraq qalacaq.

Xatırladaq ki, bu, yeni məsələ deyil. Son zamanlar bu məsələ ilə bağlı xeyli açıqlamalar verilib. Daha çox Kür çayında suyun azalması narahatlıq doğurur. Bəzi mütəxəssislər bunu yağıntıların az düşməsi, çayın deltasında təmizlik işləri aparılmaması ilə izah edirlər.