Media-icmal 31.1018

Bölgələrdə aqrar sahənin inkişafı, kredit faizlərinin enməməsinin səbəbləri, deputatlardan qanun dəyişikliklərinə etirazlar və s. məsələlər bugünki (31 oktyabr 2018-ci il) medianın aparıcı mövzularındandır...

Aqrar sahənin bölgələrdə inkişafı

"Azərbaycan" qəzeti "Yeni müəssisələr, yollar, xidmət obyektləri..." sərlövhəli məqalədə ölkədə aqrar sahənin inkiafını dövlət başçısı İlham Əliyevin bu günlərdə olmuş Qax və Şəki rayonlarına səfəri fonunda dəyərləndirir.

Müəllif deyir ki, bu səfərlər də əhali ilə görüşlər, istehsal və sosial təyinatlı obyektlərin açılışı ilə müşayət edilib: "Hər iki rayonda istifadəyə verilən digər istehsalat sahələri, reallaşan sosial infrastruktur layihələri iqtisadi inkişafa, əhalinin rifahına xidmət edir", deyə müəllif bu müəssisələrin əhəmiyyətini qiymətləndirir.

Yazı müəllifi deyir ki, Qaxda "Ulu Aqro" MMC-nin açılışı ilə ölkədə yaradılan aqroparkların biri də artıb, bütünlükdə isə ölkədə 45 aqroparkın yaradılması nəzərdə tutulur.

Bu ilin sonuna qədər 13 aqroparkın fəaliyyətə başlamasının planlaşdırıldığını deyən müəllif onlardan birinin də Qax Aqroparkı olduğunu bildirir: "Bu aqroparkın yaradılmasına dövlət xətti ilə 13 milyon manatdan çox investisiya qoyulub. Bütün infrastruktur dövlət tərəfindən yaradılıb. Azərbaycanın bu ərazisinin də gözəl təbii şəraiti, münasib iqlimi, bərəkətli torpağı var. Burada suvarma sistemlərinin, ilk növbədə, pilot və damcılama sistemlərinin qurulması məhsuldarlığın artmasına kömək edəcək".

Müəllif bildirir ki, Qaxın Ağyazı qışlaq otlağı ərazisində yerləşən aqroparkın yaradılması üçün meliorativ tədbirlərə 9 milyon manat, elektrik təminatına 4,7 milyon manat investisiya qoyulub, ümumi ərazisi 2094 hektar olan aqroparkın 1268 hektarı suvarılan sahədir.

Yazı müəllifinin sözlərinə görə, rayonda texniki bitkilərdən meyvəçiliyə kimi bütün sahələrdə ciddi artımlar var və təkcə meyvə şili sahəsində 15,2 milyon manatlıq məhsulun istehsalı gözlənilir.

Müəllif istehsalın artırılmasının əsas şərtlərindən biri kimi rahat yol infrastrukturunu göstərir və bu mənada uzunluğu 44,5 kilometr olan, 13 məntəqəni birləşdirən Qax-Qıpçaq-Ağyazı avtomobil yolunun 4 min nəfər əhalinin rahat gediş-gəlişinə imkan verdiyini bildirir.

Müəllif Qax Damazlıq İpəkçilik Stansiyasının istifadəyə verilməsini bölgədə mühüm yeniliklərdən biri sayır və onun yenidən qurulmasına Prezidentin Ehtiyat Fondundan 4,5 milyon manat vəsait ayrıldığını bildirir.

Müəllifə görə, bu müəssisənin istifadəyə verilməsi bütün ölkədə ipəkçiliyin maddi-texniki bazasının yaxşılaşdırılmasında müstəsna rol oynayacaq.

Bütün bunlar bir daha təsdiq edir ki, Azərbaycanın hər yerində olduğu kimi, Şəki və Qax rayonlarında da aqrar sahə yeni inkişaf mərhələsinə qədəm qoyub, bu isə yeni iş yerlərinin açılmasına, ixrac potensialının gücləndirilməsinə xidmət edir.

Ekspert: kredit faizləri azalmayacaq

"Bizimyol.info"saytında isə "Azərbaycan Mərkəzi Bankı kimə istəyir kredit verir, kimə istəmir vermir" sərlövhəli məqalə oxumaq olar.

Müəllif oktyabrın 30-da Mərkəzi Bankın İdarə Heyətinin qərarı ilə, uçot dərəcəsinin 10%-dən 9,75%-ə, faiz dəhlizinin aşağı həddinin isə 8%-dən 7,75%-ə endirilməsini ekspert Əkrəm Həsənovla şərh edir.

Bank üzrə ekspert Əkrəm Həsənov "bizimyol.info"ya şərhində bildirir ki, Mərkəzi Bankın bu qərarı imitasiya xarakterlidir və kredit faizlərini azaltmaq gücünə malik olmayacaq.

Ə.Həsənovun şərhinə görə, Mərkəzi Bank bu qərarı ilə demək istəyir ki, inflyasiya problemi yoxdur və kreditləşməni artırmaq istəyi nümayiş etdirir.

Ekspert isə bu qərarın kredit faizlərini azaltmayacağını onunla əsaslandırır ki, Mərkəzi Bank 2018-ci ilin əvvəlindən bu yana uçot dərəcəsini 15 faizdən 10 faizə qədər endirib, amma buna baxmayaraq, kreditləşmənin həcmində artım, verilən kreditlərin faizlərində azalma olmayıb.

"Bu qərarla banklar daha aşağı faizli kreditlər təklif edə bilmədilər", deyə ekspert bu sahədə gerçək durumun nədən ibarət olduğunu bildirir.

Ekspertin sözlərinə görə, buna səbəb Mərkəzi Bankın elan etdiyi uçot dərəcəsinin faizinə uyğun banklara və bank olmayan kredit təşkilatlarına kredit verməməsidir: "Daha doğrusu, Mərkəzi Bank bütün kommersiya banklarına kredit götürməsi üçün bərabər şərait yaratmayıb.

Ə.Həsənov vurğulayır ki, bütün dünyada Mərkəzi Banklar kreditləri hərrac keçirməklə verirlər və kredit istəyən banklar da hərraclarda iştirakçı olurlar.

Ekspertin bu məsələdə iddiası bundan ibarətdir ki, Azərbaycan Mərkəzi Bankı bu prinsiplərə riayət etməyərək kimə istəyir kredit verir, kimə istəmirsə kredit vermir.

Ə.Həsənov ağırlıq vurğusunu bu məsələnin üzərinə qoyur ki, hərrac olarsa, kreditləşmə şəffaf olacaq və ancaq bu halda banklar daha aşağı faizli kreditlər təklif edə biləcəklər.

Deputatlardan qanuna etiraz

"Oxu.az" saytında isə "Aqil Abbas: Bəlkə valideynlərimi çağırıb töhmət verəsiniz?" sərlövhəli məqalə diqqət çəkir.

Sayt "Milli Məclisin Daxili Nizamnaməsi haqqında" və "Deputatın etik davranış qaydaları haqqında" qanunlara edilən dəyişikliklərə deputat Aqil Abbasın reaksiyasına yer verib.

A.Abbasın bildirdiyinə görə, bu dəyişikliklər hüquqi qüvvəyə mindikdən sonra parlamentin üç iclasına gəlməyən deputatın mandatı ləğv edilə bilər.

Deputat nəzərdə tutulan bu dəyişiklilərin mahiyyətinə etirazını ifadə edərək deyir: "Bəlkə valideynlərimi çağırıb töhmət verəsiniz?".

Bundan əlavə, parlament üzvü İntizam Komsisyyasının deputatı mandatdan məhrum etməsini səlahiyyət həddindən kənara çıxmaq sayaraq bildirir: "Bəyəm məni İntizam Komissiyası deputat seçmişdi?!".

Deputata 50 manatdan artıq məbləğdə hədiyyə verildikdə bununla bağlı İntizam Komissiyasının məlumatlandırılmasını da A.Abbas absurd sayır və belə bir örnək verir: "Sizə misal deyim. Getmişəm, məsələn, Füzuli rayonuna. Bir dostum mənə 150 manatlıq qoyun kəsib verib. İndi onun 100 manatlıq hissəsini kəsib İntizam Komissiyasına verəcəyəm?!".

Daha bir belə reaksiya isə deputat Musa Quliyevdən gəlib və bu reaksiya özünü "Deputatdan sərt reaksiya: Bizi xalq seçir" sərlövhəli məqalədə göstərir.

YAP-çı deputat Musa Quliyev bu dəyişiklikləri deputatlara hörmətsizlik sayır: "Sanki biz seçkili orqanın üzvləri yox, təyinatlı orqanın üzvləriyik. Milli Məclis və deputatlarla bağlı qanunlara təklif olunan dəyişikliklər məhz bu anlamı verir, bununla deputatlara hörmət edilmir, biz gəldi, gedərik, parlament qalandır".

Deputat hesab edir ki, bu qanun mütləq beynəlxalq ekspertizadan keçirilməlidir.

Dəyişiklikdə nəzərdə tutulur ki, deputat istefa verməsi barədə iclasda fikir desə və o, stenoqrama düşsə, sonra fikrini dəyişə bilməz.

Deputat buna da etiraz ifadə edir: "İndi nə olar kimsə əsəbiləşə bilər, ağzından nəsə çıxar, sabah özünə gələndə fikrini dəyişə bilər. Amma bu, qəbul edilmir. Bu, düzgün deyil".