Məhkəmə AXCP fəalını ev dustaqlığına buraxmadı

Bakı/18.09.20/Turan: Sentyabrın 18-də Nəsimi rayon məhkəməsi Solmaz Mustafayevanın sədrliyi ilə Xalq Cəbhəsi Partiyasının Rəyasət Heyətinin üzvü Məmməd İbrahimin həbs qətimkan tədbirinin ev dustaqlığı ilə əvəz olunması haqqında vəsatətini təmin etməyib.

Vəkil Əsabəli Mustafayevin Turan-a verdiyi məlumata görə, prosesdə Məmməd İbrahim özü də iştirak edib. O, həbsinin qanunsuz olduğunu bildirib. O, həmçinin qeyd edib ki, həbsdə saxlanıldığı müddət ərzində heç bir istintaq tədbiri həyata keçirilməyib. O, 14-15 iyul küçə nümayişlərinin təşkili ilə heç bir əlaqəsi olmadığını təkrar edib. Nəsimi rayon məhkəməsinin qərarından apellyasiya şikayəti veriləcək, deyə vəkil bildirib.

Xatırladaq ki, iyulun 14-15-də Bakıda çoxminlik orduya dəstək nümayişi keçirilib. Nümayiş iştirakçıları bütün gecə boyunca mitinq ediblər və onların bir hissəsi mühafizəçilərin müqaviməti ilə qarşılaşmadan parlamentin binasına daxil olub, binaya kiçik zərər vurub.

Bu, hakimiyyətin baş verənlərdə AXCP-ni ittiham etməsi və partiya üzvlərinin kütləvi həbslərinə başlaması üçün bəhanə olub. Onlarla fəala qarşı iğtişaşların təşkili, hakimiyyəti ələ keçirməyə cəhd və polisə müqavimət ittihamları ilə cinayət işləri açılıb. Bu zaman həbs olunan AXCP üzvlərinin, demək olar ki, heç biri yürüşdə iştirak etməyib. Məmməd İbrahim də onlardan biridir. O da digər fəallar kimi 4 aylıq istintaq müddəti üçün həbs edilib. -16D-