Məhkəmə Elnur Seyidovun qanunsuz həbsini ləğv etmədi
Bakı Ağır Cinayətlər Məhkəməsində ötən gün “Texnikabank”ın Müşahidə Şurasının sabiq sədri Etibar Əliyev, Yasamal filialının həbsdə olan sabiq müdiri Azər Cəfərli, filialın sabiq müdir müavini Elnur Seyidov (AXCP sədri Əli Kərimlinin qaynı) və başqalarının cinayət işi üzrə məhkəmənin hazırlıq davam etdirilib.
Məlumat üçün deyək ki, bu iş üzrə ümumilikdə 25 nəfər təqsirləndirilir. Təqsirləndirilən şəxslərin əksəriyyəti zaminə buraxılıb və maraqlıdır ki, onların da bir çoxu hazırda “Texnikabank”da yüksək vəzifələrdə çalışır.
Hakim Ramella Allahverdiyevanın sədrliyi ilə keçirilən hazırlıq iclası saat 17:00-a təyin olunsa da təxminən 30 dəqiqə gec başladı. Hakim məhkəmə heyətini proses iştirakçıalrına elan edən kimitəqsirləndirilən şəxslərin vəkillərinin ötən prosesdə verdiyi vəsatətlərə baxılması üçün müşavirə otağına yollandı.
Məlumat üçün bildirək ki, Elnur Seyidovun vəkilləri Əsabəli Mustafayev və Fəxrəddin Mehdiyev müdafiə etdikləri şəxs barəsində həbs-qətimkan tədbirinin müddətinin martın 6-da başa çatdığı üçün onun həbsdə qanunsuz saxlanması barədə məhkəmənin qərar verməsini istəyib və barəsində olan cinayət işinə xitam verilməsi haqda vəsatət qaldırıblar.
Əsabəli Mustafayev cinayət işinin icraatına xitam verilməsi barədə vəsatətini əsaslandırarkən xatırladıb ki, Elnur Seyidova 178.3.1 və 178.3.2-ci, yəni dələduzluq yolu ilə vətəndaşları aldadaraq onların külli miqdarda əmlakını ələ keçirmə maddələri ilə ittiham irəli sürülüb. Ancaq cinayət işinin materiallarında ümumi məbləğ 925 manat göstərilib. Əsabəli Mustafayev bildirib ki, belə olan təqdirdə ən yaxşı halda Elnur Seyidova verilən ittiham 178.1-ci maddəyə tövsif edilməlidir: “Ancaq bu halda da zərərçəkənin ərizəsi olmalıdır.
Belə bir ərizə isə yoxdur. Başqa tərəfdən bu məbləğ bank xidməti zamanı tutulub. Burada kiminsə pulunu mənimsəməkdən söhbət getmir. Başqa bir məqam isə ondan ibarətdir ki, Elnur Seyidov saxta kredit müqaviləsi əsasında 148 min manat pulu kredit götürərək mənimsəyib. Ancaq bəlli olub ki, Elnur Seyidov həbs olunana qədər bu kreditin 80 faizi ödənilib. Müqavilənin saxta olmasına gəlincə, bu müştərilə filial müdiri və müavini arasında imzalanıb. Yəni həm müdirin həm müavinin imzası var. Bu halda hansı saxtakarlıqdan söhbət gedə bilər?!”.
Fəxrəddin Mehdiyev isə Elnur Seyidovun qanunsuz həbsdə saxlanılmasını həm də onun xəstəliyi ilə əsaslandırıb. O, bildirib ki, Elnur Seyidov dağınıq skeloroz xəstəliyindən əziyyət çəkir. Bu barədə yerli və beynəlxalq tibb ocaqlarının arayışları var.
Vəkil deyib ki, dağınıq skleroz xəstəliyi başqa ağır xəstəliklərlə eyni səviyyədədir. Məhz buna görə də bu xəstəliyə tutulmuş insanlara dövlət qayğısı barədə xüsusi hüquqi akt olunub. Bu prezident fərmanıdır: “Təəssüf ki, istintaq bunları nəzərə almayaraq Elnur Seyidovu qanunsuz olaraq həbsdə saxlayıb. Bir məqamı da xüsusi vurğulamaq istəyirəm. Elnur Seyidov barəsində həbs-qətimkan tədbirinin müddəti əslində dekabr ayında başa çatıb. Mart 6-da isə müstəsna müddət başa çatıb. Buna baxmayaraq müdafiə etdiyim şəxs məhkəmə qərarı olmadan hələ də qanunsuz olaraq həbsdə saxlanılır”.
Müşavirədən qayıdan hakim nə Elnur Seyidovun, nə də başqa təqsirləndirilən şəxslərin vəkillərinin təqdim etdiyi vəsatətləri təmin etdi.
İş vaxtı bitdiyi üçün məhkəmə prosesi 3 aprel saat 15:00-a təyin edildi.
Rəy yaz