Məhkəmə prokurorluğun üzərinə Gülalıyevin işində həkimlərin məsuliyyətini yenidən araşdırmaq öhdəliyi qoyub

Bakı/15.04.22/Turan: Nəsimi rayon məhkəməsi prokurorluğun hüquq müdafiəçisi Oqtay Gülalıyevin işində həkimlərin məsuliyyətinin olmaması haqqında qərarını ləğv edib.

Prokurorluq bir illik araşdırmadan sonra 2021-ci ilin dekabrında belə bir nəticəyə gəlib ki, YNH-dən sonra gün ərzində Gülalıyevi müayinə və müalicə edən həkimlərin hərəkətlərində cinayət tərkibi olmayıb. Fəalın ailəsi bu qərardan məhkəməyə şikayət edib.

Aprelin 14-də Bakının Nəsimi rayon məhkəməsi şikayətə baxaraq, prokurorluğun qərarını ləğv edib. Məhkəmə prokurorluğun kifayət qədər araşdırma aparmadığı qənaətinə gəlib. Həkimlərin məsuliyyətinin yenidən araşdırılması üçün materiallar prokurorluğa göndəriləcək, deyə vəkil Şəhla Hümbətova bildirib.

Fəalın ailəsi hesab edir ki, məhz Gülalıyevə vaxtlı-vaxtında və keyfiyyətli tibbi yardım göstərməyən həkimlərin təqsiri ucbatından o, komaya düşüb. Qəzadan sonra hüquq müdafiəçisi şəhər kliniki mərkəzinə gətirildikdə onun huşu yerində idi və nitqi normal idi. Amma zərərçəkmiş bir gün diaqnoz qoyulmadan orada saxlanılıb, daha sonra özəl "Baku City Hospital" xəstəxanasına göndərilib.

Həmin klinikaya daxil olduqdan 13 saat sonra fəalı əməliyyat ediblər. Həm də əməliyyat Səhiyyə Nazirliyinin müdaxiləsindən sonra Neyrocərrahiyyə Mərkəzinin mütəxəssislərinin iştirakı ilə edilib.

* Məşhur hüquq müdafiəçisi Oqtay Gülalıyevi 2019-cu il oktyabrın 29-da Bakının mərkəzində piyada keçidində maşın vurub.

Yanvarın 25-də Bakının Nəsimi rayon məhkəməsi hüquq müdafiəçisi Oqtay Gülalıyevin sağlamlığına ağır zərər vuran sürücü Kənan Abdullayevi cəzasını məntəqə tipli cəzaçəkmə müəssisəsində çəkməklə, 2 il 3 ay müddətinə azadlıqdan məhrum edib. Məhkəmə onu 263.1-1-ci (yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan zərərçəkmiş şəxsin sağlamlığına ağır zərər dəyməsinə səbəb olduqda) maddəsi ilə təqsirli bilib. Bundan başqa, Abdullayev üç il müddətinə avtomobil sürmək hüququndan məhrum edilib. -06B-