Bu gün Səbail rayon Məhkəməsində Azər Tağıyevin sədrliyi ilə jurnalist Xədicə İsmayılovanın Bakı Şəhər Prokurorluğuna qarşı iddiasına baxılıb.
Jurnalist özünü öldürmə həddinə çatdırma ittihamı ilə üç ay ərzində əsassız olaraq həbsdə saxlanılmasına görə kompensasiya ödənilməsini tələb edir. İşə üçüncü şəxs qismində Maliyyə Nazirliyi də cəlb olunub.
İclasda vəkil Yalçın İmanov xatırladıb ki, İsmayılova 2014-cü il dekabrın 5-də CM-in 125-ci maddəsi ilə ittiham olunaraq həbs edilib. O, 2015-ci il martın 6-na qədər həbsdə saxlanılıb. 2015-ci il sentyabrın 1-də Bakı Ağır Cinayətlər Məhkəməsi İsmayılovanın iqtisadi cinayətlərə görə 8,5 il müddətinə azadlıqdan məhrum edilməsi barədə qərar çıxardıqda isə CM-in 125-ci maddəsi üzrə ona bəraət verilib.
Beləliklə, 2014-cü il dekabrın 5-dən 2015-ci il martın 6-na qədər, yəni 91 gün İsmayılova qanunsuz olaraq həbsdə saxlanılıb.
İmanov qeyd edib ki, iddiaçı ona dəyən maddi ziyanın ümumi ölçüsünü 9030 manat olaraq qiymətləndirib.
Belə ki, o, “Azadlıq radiosu”nda hər ay 2 min manat maaş alırdı və rəsmi vergi ödəyicisi idi. Vəkil Vergilər Nazirliyindən 2011-2014-cü illərdə İsmayılovanın gəlirinin 100 min manatdan çox olduğu və onun 4 min manatdan çox vergi ödədiyi haqqında sənəd təqdim edib.
Bundan başqa, həbsdə saxlanılarkən İsmayılovanın hüquqi yardım, keçirdiyi mədə əməliyyatı ilə əlaqədar dietik qidanın hazırlanması və çatdırılması ilə bağlı xərcləri olub.
Mənəvi ziyanı isə İsmayılova 20 min manat olaraq qiymətləndirib.
Amma Bakı Prokurorluğunun və Maliyyə Nazirliyinin nümayəndələri iddiaya qarşı çıxıblar.
Növbəti məhkəmə iclası sentyabrın 23-nə təyin edilib.
* Xatırladaq ki, mayın 25-də Azərbaycan Ali Məhkəməsi jurnalistə qarşı mənimsəmə və vəzifə səlahiyyətlərindən sui-istifadə ittihamlarını ləğv edib və real həbs müddətini 3,5 il şərti cəza ilə əvəz edib. Avqustun 8-də isə şərti cəza müddəti 2 il 3 aya endirilib. -06D-
Cəmiyyət
-
"Göytəpə" sərhəd dəstəsinin xidməti ərazisində ümumi çəkisi 7 kiloqram 145 qram narkotik vasitəni ölkə ərazisinə keçirməyə cəhd edən İran vətəndaşı 1984-cü il təvəllüdlü Mollayı Meysən Allahbaxış saxlanılıb. Bu barədə yanvarın 31-də Azərbaycan Dövlət Sərhəd Xidməti məlumat yayıb.
-
Yanvarın 31-də saat 12 radələrində Ağcabədi rayonunun Hindarx qəsəbəsində yerləşən evlərdən birində 5 nəfərin ölməsi, 2 nəfərin yaralanması ilə nəticələnən partlayış baş verib. Xəbəri Baş Prokurorluğun mətbuat xidməti yayıb. Faktla bağlı Ağcabədi rayon prokurorluğunda araşdırma aparılır.
-
Şənbə günü Bakıda hava şəraiti dəyişkən buludlu, yağmursuz olacaq. Şimal-şərq küləyi əsəcək. Havanın temperaturu gecə 5-7 dərəcə, gündüz 8-12 dərəcə olacaq. Nisbi rütubət 70-80% təşkil edəcək.
-
Yanvarın 29-da Azərbaycanda bələdiyyə seçkiləri keçirildi. 118 dairə üzrə seçkilərdə 16 mindən çox namizəd iştirak etdi. Mərkəzi Seçki Komissiyasının (MSK) saytında artıq lider namizədlərin adları açıqlanıb. Seçkidən saatlar sonra isə MSK sədri Məzahir Pənahov brifinqdə bildirmişdi ki, 685 bələdiyyənin 413-ü artıq formalaşmış hesab edilir, lider namizədlərin sayı 7 min 791 nəfərdir. Onun sözlərinə görə, bütün dairələrdə seçkilər normal keçib və rəhbərlik etdiyi quruma heç bir şikayət daxil olmayıb. Halbuki, müstəqil namizədlər və ekspertlər seçkilərin gedişatında pozuntuların olduğunu deyirlər.
Rəy yaz