Mətbuat icmalı

Rəsmi və iqtidaryönlü qəzetlər baş məqalə yerində prezident İlham Əliyevin “Qarabağ” futbol komandasının qəbulundan reportajı, bu komandaya bir milyon manat, ilin ən yaxşı müəlliminə 5 min, ən yaxşı məktəbinə isə 10 min manat mükafat verməsi barədə sərəncamları, birinci xanımın “Atəşgah məbədi” qoruğunda olmasını dərc edib. Digər qəzetlər isə Rusiyada böhran, bu böhranın Azərbaycana təsirləri, Türkiyədə siyasi münasibətlər mövzudunda yazılara birinci  səhifələrində yer veriblər.

“Azadlıq” qəzeti 

Putinin adamı kimi təqdim edilən  azərbaycanlı əsilli Rusiya vətəndaşı Söyün Sadıqov iddia edir ki, Vaşinqton Azərbaycana qarşı erməni diversantlar hazırlayır. “Məndə olan informasiyaya görə, Ermənistan ərazisində xüsusi  ərazi  var ki, orada artıq 3 ildir amerikan konstruktorları erməni millətçilərini təxribatçı kimi hazırlayırlar”, - Sadıqov qeyd edib.

“Cavanşir Feyziyev niyə Vahid Əhmədovu  təkzib etdi?” məqaləsində dərman bazarının hakim ailənin monopoliyasında olduğu iddia edilir. “Dərman biznesi əvvəllər ölkə başçısı İlham Əliyevin mərhum əmisi Aqil Əliyevin inhisarında olub. Bazarda ona məxsus “Riad” şirkəti hegemonluq edirdi. Lakin bir neçə il əvvəl “Riad”ın hegemonluğuna son qoyuldu. Bazar “Avromed”in nəzarətinə keçdi. “Riad”ın isə yalnız 100 apteki dərmanla təmin etmək haqqı tanınıb”, qəzet yazır.

“İlham Əliyev əsassız nikbindir” məqaləsində iqtisadçı Nemət Əliyev bildirir ki, dünyada iqtisdadiyyatı, büdcəsi neftdən asılı elə bir ölkə yoxdur ki, neftin qiymətinin düşməsi ona təsir etməsin. İlham Əliyev neftin qiymətinin düşməsinin Azərbaycanda hiss edilməyəcəyini bildirib. “Keçən illə müqayisədə neft hasilatı 1,2 milyon ton azalıb. Deməli, həm hasilat, həm də qiymət aşağı düşür. Bu isə o deməkdir ki, ölkənin bütün makroiqtisadi göstəriciləri pisləşməyə doğru gedir”, - Nemət Əliyev qeyd edib.

Neftin ucuizlaşması Bakı metropoliteninin yeni stansiyalarının tikintisinin dayandırılmasına səbəb olub. Tikinti idarəsinin 1500 işçisindən  900 nəfəri öz hesabına məzuniyyətə göndərilib.

“Yeni Müsavat”

“Hacı İbrahim Nehrəmli Amerikada mühüm görüşlər keçirib” məqaləsində “Xəzər dənizi sahilində yeni tikilməkdə olan  “Khazar İslands” şəhərciyinin ABŞ-da uğurlu təqdimatından danışılır. Nehrəmlinin rəhbərliyi ilə “Avesta Konsern” şirkətinin nümayəndələri ABŞ Memarlıq İnstitutu, Florida ştatının Qubernatorluğu və “Green Point İnternational”ın təşkilatçılığı ilə Mayami İnşaat və Memarlıq Həftəsində iştirak edib.

YAP icra katibinin müavini Siyavuş Novruzov təhsil naziri olmaq istəyir. Qəzet bunu hazırki təhsil naziri Mikayıl Cabbarovun YAP rəsmiləri və Siyavuş Novruzov tərəfindən tənqid edilməsi ilə əsaslandırır.

“Bələdiyyə seçkilərində exit-poll keçirəcək təşkilata etimad yoxdur” məqaləsində bildirilir ki, exit-pollu keçirəcək “ELS” Müstəqil Araşdırmalar təşkilatı hakimyyətin təşkilatı sayılır. “Bu qurum cəmiyyətdə və  siyasi qüvvələr arasında hətta MSK-dan da etimadsız təşkilat kimi tanınır”, - Müsavat Partiyasının başqan müavini Elman Fəttah bildirib.

Fəaliyyətini  dayandırmış “Zerkalo” qəzetinin baş redaktoru Elçin Şıxlı müsahibəsində bildirib ki, qəzetin fəaliyyətini davam  etdirsəydi daha bir neçə müxbir tutulacaqdı.  Qəzetin şərhçisi  Rauf Mirqədirov həbsdədir.

Politoloq Vəfa Quluzadə bidlrib ki, Putinin vəziyyətdən çıxış  yolu yoxdur. “Putinin çökməsi Qarabağ məsələsinin həlli ilə nəticələnəcək”.

”Nəqliyyat nazirinin adı hallanan işdə şok korrupsiya faktları” məqaləsində Göyçay rayonundakı qanun pozutularından bəhs edilir. Belə ki nəqliyyat naziri Ziya Məmmədovun qohumu Mənsur Məmmədov bu rayonun İcra Hakimiyyətinin başçısıdır.  “Belə ki, nəqliyyat şefinə yaxın olan “Modern-Servis” və “Ruslan-Montaj-Demontaj”  firmalarının rəhbəri Çingiz Səlimov rayonun Potu-Hüngütlü bələdiyyəsinin ərazisində tikdiyi milyonlarla dəyəri olan  “Göy-göl” istirahət mərkəzinə  görə İcra Hakimiyyətinə, yelli bələdiyyəyə, Dövlət Reyestr Xidmətinin regional şöbəsinə, Göyçay İşıq İdarəsinə, Ekologiya İdarəsinə, Vergilər İdarəsinə böyük məbləğdə rüşvət verib”, - məqalədə yazılır.

“Exo”

“Rusiya rublunun məznnəsinin  düşməsindən Azərbaycan 270 milyon manatdan çox vəsait itirib?” məqaləsində Rusiyadakı iqtisadi böhranın Azərbaycana təsirlərindən danışılır.

Qəzet yeni ilədək Rusiyada yaşayan 100 min azərbaycanlının Azərbaycana qayıdacağı ehtimalının olduğunu bildirir.

“Bizim yol”

Rusiya banklarında dollar ala bilməyənlər Azərbaycana axışır

“Vətəndaşın əmlakına 5 il “həbs” məqaləsində Milli Məclisin “Bələdiyyə torpaqları haqqında” qanuna edilmiş dəyişikliyin məntiqsiz olduğu iddia edilir. Belə ki, yeni dəyişikliyə görə, fərdi  yaşayış evi üçün bələdiyyədən torpaq sahəsi əldə edən şəxs onu özgəninkiləşdirə bilməz.

“Ekspress”

Dini Qurumlarla İş üzrə Dövlət Komitəsinin sədri Mübariz Qurbanlı bildirib ki, Azərbaycanda islam dəyərlərinə zidd olan ayrı-ayrı qruplar, radikallaşmış dəstələr  fəaliyyət göstərir, lakin onların nə istimai, nə də sosial dayaqları yoxdur. Onun sözlərinə görə, aparılan işlər, maarifləndirmə nəticəsində radikalizmdə səngimə və azalma görünür.

O həmçinin məscidlərin mühafizə  sistemlərinin qurulmasının davam etdirildiyini bildirib.