Azərbaycanda üzümün məhsuldarlığı artır

Dövlət Statistika Komitəsinin operativ məlumatına görə, bu il 147,6 min ton üzüm yığılıb ki, bu da 2013-cü il dekabrın 1-də olduğundan 600 ton çoxdur. Bu il bazar piştaxtaları alıcıları bolluqla sevindirməyib, üzümün qiyməti isə kifayət qədər yüksək – bir kiloqramı 1,5 manat olub.

Azərbaycanda üzümün həm süfrə, həm də texniki növü yetişdirilir. Üzümçülük müəssisələrinin (“Aqro-Azərinvest”, “AZGRANATA”, “Vinagro”, “CASPİAN COAST WINERY & VINEYARDS” və s.) mülkiyyətində 4,8 min ha-ya yaxın üzümlük var, bunun 3,8 ha-sı məhsuldardır. Bu, ölkənin üzüm plantasiyalarının təxminən 30%-ni təşkil edir. 2013-cü ildə özəl təsərrüfatlardan alınan üzümdən başqa, bu təsərrüfatlar 29,2 min ton öz məhsullarından istifadə ediblər.

Bu gün Azərbaycanda əsasən məhsuldar üzüm növləri yetişdirilir. 2008-2009-cu illərdə bir hektarda məhsuldarlıq orta hesabla 74 sentnetr təşkil edirdisə, 2013-cü ildə bu göstərici 91 s-ə çatıb.

Dövlət Gömrük Komitəsinin məlumatına görə, bu ilin 9 ayı ərzində Azərbaycandan 342,9 min dollarlıq 453,3 ton üzüm ixrac edilib. Ötən il Azərbaycan üzümçüləri ölkədən 1179,8 ton üzüm çıxarıblar. Xaricdən mövsüm ərzində 1,4 min tondan çox üzüm alınıb. Azərbaycan böyük həcmdə kişmiş idxal edir. 2013-cü ildə kişmiş alışı 1542,6 ton təşkil edibsə (805,3 min dollar), bu ilin üç rübü ərzində idxal həcmi 343,6 ton (181,1 min dollar) təşkil edib.

1985-ci ildə alkoqol əleyhinə kampaniya dövründə Azərbaycanda üzüm sahələri 267,8 min ha-dan 181,4 min ha-ya qədər azalıb. Üzümlüklərin kəsilməsi təmayülü 1996-1998-ci illərdə aqrar islahatlar və şərab zavodlarının özəlləşdirilməsi zamanı da davam edib. Bunun nəticəsində üzüm plantasiyalarının sahəsi 20,5 min ha-ya qədər azalıb.

Bu ilin 11 ayı ərzində Azərbaycanda 937,7 min dekalitr şərab istehsal edilib ki, bu da 2013-cü ilin müvafiq dövründən 38,2% çoxdur.  08B