Mətbuat-Monitorinq 08.05.14

Rəsmi qəzetlər dövlət başçısı İlham Əliyevin Bakı şəhər 4 saylı “ASAN xidmət” mərkəzinin açılışında iştirakı haqda xəbəri ilk səhifələrə yerləşdiriblər.

“Azadlıq” qəzeti hakim Əliyevlər ailəsinin ailə biznesinə dair “Əliyevlərin Hollandiyadan başlayan ailə bzinesi” araşdırması haqda xəbəri manjetə çıxarıb.

Qəzet qeyd edir ki, QHT rəhbəri Anar Məmmədlinin barəsində cinayət işini “əsaslı” göstərmək üçün ofis icarəyə verənlər, kompüter alınan mağaza sahibi də istintaqa cəlb edilib.

Polkovnik Rüfət Əmirov Müdafiə Nazirliyinin mənəvi- psixoloji hazırlıq və ictimaiyyətlə əlaqələr İdarəsinin rəisi təyin edilib.

Siyasətçilər NİDAçı gənclərə uzunmüddətli həbs cəzası verilməsini “hakimiyyətin “NİDAçılardan qisas alması” kimi dəyərləndirirlər.

Ölkə idarəetmə sistemində son kadr təyinatları ilə bağlı açıqlama verən şərhçilər  durumu “Paşayevlərin təklənməsi” kimi qiymətləndiriblər.

Qəzet Dubaydan Qazaxıstana mal aparan və Azrbaycandan tranzit kimi keçən türk iş adamı Mutlu Uskunu Azərbaycan gömrük əməkdaşları saxlayıb, hər hansı səbəb olmadığı halda ona qarşı qaçaqmalçılıq iddiası ilə cuinayət işi açılıb.  

“Ekspress” ATƏT-in Minsk Qrupunun ABŞ-dan olan həmsədri Uorlikin Qarabağ münaqişəsinin tənzimlənməsilə bağlı 6 elementdən ibarət təklifli paketi haqda xəbəri ilk səhifəyə çıxarıb.

Təhsil Nazirliyi dərs ilinin maksimum iki həftə uzadılacağı haqda açıqlama verərək müəllimlərin bu addımdan narazı ola   biləcəklərini istisna etməyib.

“Exo” ictimai birliklərə istinadən ölkəyə gətirilən dərman preparatlarının 30-40%-nin saxta olduğunu bildirir.

“Novoe Vremya” Fransa prezidentinin bu günlərdə Azərbaycana gözlənilən səfərinə diqqət çəkərək bu səfərə “Fransa prezidenti Azərbaycana Ermənistanın maraqlarını “sırımaq” üçün gəlir?” mövqeyini sərgiləyir.

“Yeni Müsavat” iddia edir ki, qəzetin müxbiri Fərahim İlqaroğlunun bu yaxınlarda zorakılığa məruz qalmasının arxasında nazir Ziya Məmmədov və deputat Elton Məımmədov qardaşlarına yaxın adamlar dururlar.

PA ictimai-siyasi şöbəsinin müdiri Əli Həsənovun Milli İnformasiya Təhlükəsizliyi Konsepsiyası təklifini ekspertlər iqtidarı ciddi tənqidlərdən qorumaq üçün “qanundan cəza vasitəsi kimi istifadə etmək cəhdi” adlandırırlar.    

Hüquq müdaifəçisi Arif Yunusun şəxsi hesabındakı pulunu əsas olmadan verməkdən imtina etdiyinə görə vəkil bankı məhkəməyə verib, bank isə addımına şərh vermir.