Mətbuat-Monitorinq 11.06.14

Rəsmi qəzetlər dövlət başçısı İlham Əliyevin polad istehsalı kompleksinin fəaliyyətilə bağlı “Azərbaycan Polad İstehsalı Kompleksi” QSC-yə 5 milyon manat, Goranboy rayonunun Goranboy-Yuxarı Ağcakənd avtomobil yolunun tikintisi üçün 7,2 milyon manat vəsaitin ayrılması haqda sərəncamlarının mətnlərini ilk səhifələrə yerləşdiriblər.

“Azadlıq” qəzeti bu gün Vaşinqtonda ABŞ Helsinki komissiyasının Azərbaycanla bağlı keçirəcəyi dinləmələri “kritik dinləmələr” adlandıraraq ilk səhifəyə çıxarıb.

Ermənistan dövlət başçısı Sarkisyana “sizinlə bir millətə mənsub olmaqdan xəcalət çəkirəm” deyən erməni yazıçısı Lyubik Çibuxçyan Azərbaycandan sığınacaq istəyib. 

“Freedom House” beynəlxalq hüquq təşkilatının hesabatında vətəndaş cəmiyyəti institutları üçün ən pis mühitin Rusiya, Azərbaycan və Qazaxıstanda olması əksini tapır.

Rusiya prezidenti Putin xarici ölkələrin daxili işlərinə müdaxilə vasitəsi şeçdiyi “rus dilinin qorunması” siyasətilə bağlı prezident yanında Rus dili üzrə Şuranın yaradılması haqda fərman imzalayıb.

“Hafka” ləqəbli iş adamı Hafiz Məmmədov ikinci liqada təmsil edilən futbol komandası “Sheffield Wednesdau”nun səhmlərinin 100%-ni də alıb.

SSRİ-nin dağılmasında mühüm rol oynamış Belarusun eks-prezidenti Stanislav Şuşkeviç Avrasiya İqtisadi İtiifaqını “SSRİ-nin yenidən qayıtması” adlandırıb.

Azərbaycanda şəbəkələşmiş korrupsiya olduğunu bəyan edən ABŞ-ın Korenqi Fondu Qərb ölkələrini bütünlükdə “oğru hakimiyyətlərə” qarşı tədbir görməməkdə ittiham edir.

“Ekspress”  rəsmi Kremlin Azərbaycanı Avrasiya İqtisadi İtiifaqına dəvət etməsini “rusların əl çəkməməsi və şirnikləndirməsi” kimi dəyərləndirir.

Qəzet Şamaxıda doğuşla bağlı uşaq ölümünə rayon mərkəzi xəstəxanasının şöbə müdiri Nəzakət Abdulrazaqvanın heç nə olmamış kimi “belə şeylər çox olur” cavabını nəzərə çatdırır.

Ölkə yollarında qəzalara toxunan qəzet son 5 ayda yol qəzalarında 404 nəfərin öldüyünü, 1003 nəfərin xəsarət aldığını qeyd edir.

“Exo” qəzeti ekspertlərə istinadən Azərbaycanda insanların özlərini “xoşbəxt saymaları” üçün ayda 1000 manatdan az maaş almamasını şərt olaraq göstrərir.

“Novoe Vremya”  Azərbaycanın NATO-ya qəbul edilə bilməsi haqda danışıqları Rusiyaya təziyq vasitəsi kimi dəyərləndirərək önə çəkib.

“Freedom House” beynəlxalq hüquq təşkilatının vətəndaş cəmiyyəti institutlarının ağır durumuna görə Azərbaycanı tənqidə məruz qoymasına qəzet “dəyişmək və nəticə çıxarmaq vaxtı” mövqeyini ifadə edir.   

“Bizim yol”  Bakı dairəvi yolunun birinci və ikinci hissələrinin təmirə dayanmasını yazaraq bunu “hər kilometri 5,3 milyon manata başa gələn yol çökdü” deyə ilk səhifəyə yerləşdirib.

Qəzet paytaxtda sənədsiz tikilən 500 min evin taleyilə bağlı hökumətin qərar  verməməsini “yüz minlərlə insanın təzyiq altında saxlanması” kimi dəyərləndirir.

Sosial şəbəkələrdə fəallığına görə həbs edilən Lənkəran sakini Şaiq Ağayev məhkəmə prosesində istintaq zamanı amansız işgəncələrə məruz qalmasını hakimə “elə işgəncələr verirdilər ki, ölüm işinə də imza atardım” anladıb.   

“Yeni Müsavat” ölkənin Seysmoloji Xidmətnin Mingəçevir SES altında zəlzələ ocağı olması haqda verdiyi xəbəri ilk səhifəyə çıxarıb.

Qəzet RF prezidenti Putinin Avrasiya İqtisadi İttifaqına qoşulması haqda rəsmi Bakıya məktubunu Azərbaycanı “yeni SSRİ”yə dəvət” adlandıraraq önə verib.

Vətəndaşlığa qəbul və vətəndaşlıqdan çıxmaq haqda qanuna dəyişiklikləri təhlükəli sayan hüquqşünas Əlövsət Əliyev bu dəyişikliklər qəbul edildiyi halda 1,5 milyon ölkə vətəndaşının dövlət həyatında iştirak haqqını itirəcəyini bildirib. 

Əmanətlərin Sığortalanması Fondunun Azərbaycan banklarına qoyulan  əmanətlərin ancaq 32%-nin qorunmasına təminat verdiyini yazan qəzet 6,6 milyard manat əmanətin 4,5 milyard manatının bata biləcəyini nəzərə çatdırır.