Mətbuat-Monitorinq 14.11.15

Rəsmi qəzetlər dövlət başçısı İlham Əliyevin Böyük Britaniya nümayəndə heyətini qəbul etməsi haqda xəbəri, kiçik sahibkarlığa dövlət köməyi haqda qanuna dəyişikliyi, diplomat Arif Məmmədovun fövqəladə və səlahiyyətli səfir rütbəsindən məhrum edilməsi haqda sərəncamın mətnini ilk səhifələrdə yerləşdiriblər. 

“Azadlıq” qəzeti MTN-in keçmiş şefi Eldar Mahmudovun keçmiş rabitə naziri Əli Abbasovu şantaj edərək səlahiyyətlərini yerinə yetirməyə mane olmasını manjetə çıxarıb. Bundan əlavə, qəzet “MTN işi” ətrafında üzə çıxan yeni cinayətlər və həbslər haqda genişhəcmli məqalə dərc edib. Ekspertlər MTN-də üzə çıxan cinayətlərə səbəb kimi bəzi nazirliklərin öz istintaq idarəsi yaratmaqla öz maraqlarından çıxış etmələrini göstərib.

Yasamal Rayon Məhkəməsinin Milli Şuranın sədri Cəmil Həsənlinin qızı Günel Həsənli ilə bağlı qərarından verilən apellyasiya şikayətinə dair proses başa çatır,  müdafiə tərəfin dəlillərinə baxmayaraq, G.Həsənli yenə də törətmədiyi yol-nəqliyyat qəzasında ititham edilir.

Bu günlərdə barəsində həbs qətimkan tədbiri dəyişdirilərək ev dustaqlığına buraxılan Arif Yunusun evdə olduğu ilk gecədə vəziyyəti kəskin pisləşib.

Ədliyyə Nazirliyi Razi Nurulla adlı şəxsin AXCP adından “qurultay” keçirməsini bəhanə edərək AXCP qurultayının nəticələrini tanımaqdan imtina edib, tərəflərə məsələni məhkəmə vasitəsilə həll etməyi tövsiyə edib.    

Hüquqşünaslar Ədliyyə Nazirliyinin bu addımını hüquqi nihilizm adlandırıblar.    

Mühacirətdə olan keçmiş polis zabiti Tural Məhərrəmov “Ədalətsizliyə mübarizə” adlı bloq yaratdğına görə ana-bacısının “bandotdel”ə aparılaraq incidildiyini yazır. 

Qəzet Nəqliyyat və Rabitə nazirliklərinin birləşdiriləcəyini yazaraq bir çox ölkələrin təcrübəsində bu nümunənin olduğunu nəzərə çatdırır.

Hazırda 44 dollar olan neftin dəyərinin daha da aşağı düşəcəyini yazan qəzet bununla bağlı Azərbaycanın 2016-cl il büdcəsinin təhlükədə olması barədə xəbərdarlıq edir.

Ölkədə iqtisadi durumun ağırlaşdığı bir vaxtda SOCAR-da 23 min nəfərin ixtisar edildiyini, bank sistemində 2 mindən çox ixtisar olunacağını yazan qəzet yaxın 6 ayda ixtisarların daha intensiv olacağını bildirir.

“Ekspress” “MTN işi” ilə bağlı cinayətlərdə Rabitə Nazirliyinin iştirakı faktlarına “Rabitə Nazirliyinin başqa nazirliyin poliqonuna çevrilməsi” mövqeyini diqqət mərkəzinə çəkib.

Qəzet ölkə prokurorluğuna isnadən Rabitə Nazirliyindəki yoxlamalarda 95 milyon manat dövlət vəsaitinin mənimsənilməsinin aşkar edildiyini bildirir.

AzAL-ın mətbuat xidməti Bakı-Cəncə-Bakı və Bakı-Qəbələ-Bakı aviareyslərinin gəlirli olmadığı üçün ləğv edildiyini təsdiqləyib.

“Novoe Vremya”  vətəndaşların müraciətlərinə rəsmi qurumların ən geci 15 gün əzrində cavab verməsi haqda imzalanan fərmana “qanunlar təkcə qəbul edilməməlidir, həm də işləməlidir” mövqeyini önə çəkib.

Ölkənin xarici borcunun 7 milyard manata çatmasını qəzet “Azərbaycanın aktiv şəkildə borca girməsi” kimi şərh edir.

“Bizim yol”  Rabitə Nazirliyində 100 milyon manata yaxın vəsaitin talan olunmasını ilk səhifədə yerləşdirib.

Qəzet “MTN işi” olayları ilə  bağlı nazirliyin 120 əməkdaşının sistemdən xaric edildiyini, bunlardan 80 nəfərinin MTN-in keçmiş naziri Eldar Mahmudovun yaxın qohumları və dostları olduğunu yazır.

“Yeni Müsavat”  “MTN işi”nə önəm verərək vaxtilə Bakı Telefon Qovşağının rəhbəri Nəriman Salmanovun vəzifədən işgəncə ilə uzaqlaşdırıldığını nəzərə çatdırır. Qəzet vəzifədən azad edilən rabitə naziri Əli Abbasovun “MTN işi” ilə bağlı korrupsiya idarəsində dindirildiyini, onun 8 il azadlıqdan məhrum oluna biləcəyini iddia edir. Bununla yanaşı qəzet MTN və Rabitə Nazirlyindən sonra yoxlamaların Vegilər Nazirliyinə çatacağını qeyd edir.

Keçmiş deputat Şahlar Əsgərov mövcud idarəçiliklə təhsil sistemini inkişaf etdirməyin, universitet qurmağın və yaxşı təhsil ənənələrini qorumağın mümkünsüz olduğu barədə bəyanat səsləndirib.

Dövlət Neft Şirkətinə tabe olan “Azəriqaz” sistemində kütləvi ixtisarlara hüquq müdafiəçisi Mirvari Qəhrəmanlı “5 ildən çoxdur ki, hər il struktur islahatları adı ilə minlərlə işçi ixtisara salınır” şərhini verib.

Dini Komitə falçılıq, cadugərlik kimi əməllərin dələduzluq müddəasından çıxarılaraq Cinayət və İnzibati Xətalar məcəlləsinə salınmasını təklif edir.