Mətbuat-Monitorinq 16.02.13

Rəsmi qəzetlər dövlət başçısı İlham Əliyevin qəbulları, imzaladığı sərəncamlar haqqında yazır. Bundan əlavə, bu qəzetlərdə yazıçı Əkrəm Əylislinin, aparıcı müxalifət qüvvələrinin şərə, böhtana, təhqirə məruz qoyulması kampaniyası davam edir.  

“Azadlıq” qəzeti barəsində həbs-qətimkan tədbiri seçilən keçmiş deputat Gülər Əhmədovanın şantaj olunduğunu yazaraq, təcridxanada səhhətinin pisləşməsini manjetə çıxarıb. 

İctimai siyasi bloka dair bölmədə dövlət başçısının İsmayıllı və Şamaxı rayon icra başçılarını vəzifələrindən azad etməsi “dəyişiklik imitasiyası” kimi dəyərləndirilir.

Sabirabadda məktəb direktorunun evindən 20 kq narkotik maddə çıxdığı nəzərə çatdırılır. 

Media Hüququ İnstitutunun direktoru Rəşid Hacılı “Azadlıq” qəzetinin 30 min manat cərimə olunmasını “qəzeti çökdürmək qərarı” sayır.

Britaniyalı deputatlar AŞPA-dakı həmkarlarının Əliyev rejiminə dəstəyini “AŞPA-nın nüfuzuna ciddi zərbə” hesab ediblər. 

Ombudsman Elmira Süleymanova kitab yandırılmasını “faşistlərə xas hərəkət” kimi dəyərləndirib. 

Yazıçı Əkrəm Əylisli müəllifi olduğu “Daş yuxular” əsərinə iqtdiarın mövqeyini “stalinizmlə feodalizmin sintezi olan yanaşma” kimi qiymətləndirib.

“Zerkalo” qəzeti ABŞ və RF-nin Cənubi Qafqaz uğrunda “əlbəyaxa döyüş”ə  hazırlaşmasına “zaman gözləmir” mövqeyi ifadə edir. 

Şəxsiyyət əleyhinə cinayətə təhrikə baxmayaraq, DİN-in Müasir Müsavat Partiyasının sədri Hafiz Hacıyevi həbsə almamasına qəzet ironik “yazıçının qulağını kəsmək nəsə yaxşı şey deyil” münasibəti ifadə edir. 

“Ekspress” qəzeti deputatların məmurları ciddi tənqidə məruz qoymasına “deputatlar məmuralara qarşı” mövqeyi ifadə edir.

“Exo” qəzeti ölkə vətəndaşlarının təmtəraqa ildə 300 milyon manat sərf etdiyini, bu məbləğin 80%-nin xaricdən idxal olunan mallara sərf olunduğunu yazır. 

Azərbaycan sakinlərinin gündə 400 litr su məsrəf etdiyini yazan qəzet bunun Avropa ilə müqayisədə 4 dəfə çox olduğunu nəzərə çatdırır.  

“Novoe Vremya” qəzeti parlamentdə deputatların məmurları ciddi tənqidə məruz qoymalarını “hakimiyyət böhranın aşkar olması” sayır.

“Bizim yol” qəzeti siyasi qurum və QHT-lərə ianə və qrant yardımlarına qadağa qoyan qanunun qəbulunu “parlamentin repressiya qanunları”nı qəbul etməsi sayır. 

“Yeni Müsavat” qəzeti iki icra başçısının vəzifələrindən azad olunmasını “icra başçıları üçün “qiyamət günü”” adlandırır. 

Prezidentliyə namizədliyini dəstəkləyən 7 partiya rəhbərilə görüşdə Müsavat Partiyası başqanı İsa Qəmbərin mövqeyi “hakimiyyətə hazırlaşın” mesajı kimi hallandırılır. 

Dövlət başçısı İlham Əliyevin vəzifəli şəxslərə xəbərdarlığından sonra bəzi vəzifəli şəxslərin övladrlanı “ev dustağı” etdiyi, bəzilərinin isə problem olmasın deyə ölkədən çıxardıqları iddia edilir. 

Barəsində həbs-qətimkan tədbiri seçilən keçmiş deputat Gülər Əhmədovanın “Monika” gözəllik salonunu iki ayrı firmaya icarəyə verildiyi bildirilir. 

Rəsmi Bakının QHT-lərlə bağlı qanunvericiliyi sərtləşdirməsi adı tez-tez müxtəlif inqilabi proeselərə dəstəkdə hallanan Soros Fondunun Bakıya qayıtması ilə əlaqələndirilir.