Qanunlara mürtəce düzəlişlər hakimiyyətin vətəndaşların fəallığı qarşısında qorxusunu göstərir

“Qrantlar haqqında”, “Dini etiqad azadlığı haqqında” və “Qeyri-hökumət təşkilatları (ictimai birliklər və fondlar) haqqında” qanunlara düzəlişlərin qüvvəyə minməsi vətəndaş cəmiyyətinə qarşı repressiyaları gücləndirəcək, bu barədə objective.tv-yə müsahibəsində “Hüquqi düşüncə” ictimai birliyinin sədri Samir İsayev bildirib.

Təcrübə göstərir ki, xoşagəlməz QHT-lər istənilən yolla böyük məbləğdə cərimə olunacaq, əmlakları müsadirə olunacaq, rəhbərliyi isə (erməni lobbisinin casusu damğası ilə) “ictimai qınağa” məruz qoyulacaq. Bu metodlara hüquq müdafiəçisi İlham Əmiraslanovun işi misal ola bilər, onun evinə tabel silahı atdılar, Qənimət Zahidovu yalançı şahidlik sayəsində xuliqanlığa görə həbs etdilər və s.

Dünən Xaçmazda prezident seçkilərinin potensial iştirakçıları üçün regioanal treninq həyata keçirən iki (qız və oğlan) fəalı həbs ediblər. DİN-in mətbuat xidmətinin məlumatına inansaq, onlar iki polisi döyüblər. Normal ölkədə peşəyə uyğun olmayan polisləri dərhal işdən qovurlar, onların döyülmüş üzlərini göstərmirlər, Azərbaycanda isə şou yaratmaqdan utanmırlar, deyə hüquqşünas bildirib.

İndi QHT-lər onsuz da Maliyyə Nazirliyi, Dövlət Statistika Komitəsi, Vergilər Nazirliyi qarşısında 20 növ sənədlə hesabat verir və qrantlar və donorlar haqqında bütün məlumatlar var. 

QHT-lər tərəfindən maliyyə hesabatlılığının pozulması bütün pozuntular arasında cəmi 1,5% təşkil edir, buna görə də qanunvericiliyin sərtləşdirilməsinə heç bir zərurət yoxdur.

Belə ki, 2010-cu ildə Ədliyyə Nazirliyinə qrant alınması haqqında 577, 2011-ci ildə 887, 2012-ci ildə 1054 müqavilə təqdim edilib. QHT-lər hüquqi nöqteyi-nəzərdən cəmiyyətin ən məsuliyyətli və savadlı hissəsidir və bu sahdə 20 illik fəaliyyət ərzində hesabat vermək mədəniyyəti formalaşıb. Buna görə qanunvericiliyin sərtləşdirilməsi üçün obyektiv şərt yoxdur.

Deputat Qənizadənin təşəbbüsü əsassızdır və bir qrup şəxslərin fantaziyasının bəhrəsidir – onun əsaslandırılması üçün araşdırmalar, sorğular həyata keçirilməyib. Müəllifin dəlilləri absurddur – Azərbaycanda qrant sazişləri Aİ, ABŞ və digər aparıcı Qərb ölkələrinin fondları ilə bağlanır. Orada isə cinayətkar yolla əldə olunmuş pulların yuyulması və terrorizmə qarşı rəsmi Bakıdan daha vicdanla mübarizə aparılır. Heç bir yerli QHT nüfuzu şübhə doğuran ölkələrlə işləmir.

Vətəndaş cəmiyyəti fəalının fikrincə, hakimiyyət görür ki, son vaxtlar onun üçün həyəcanverici olan hadisələr (Qubada, İsmayıllıda, Binə ticarət mərkəzində, Təhsil Nazirliyi qarşısında və s. etirazlar) siyasi partiyalar tərəfindən təşkil edilmir. Bu, vətəndaş cəmiyyəti fəallarının və sosial şəbəkələrin iştirakı ilə güclənən kortəbii narazılıqlardır. Buna görə repressiv mexanizmin gücü siyasi deyil, vətəndaş müxalifətinə yönləndirilib. -17D-